ཨུ་རུ་སིའི་ཙུང་ཐུང་ཕུའུ་ཅིན་གྱིས་ཟླ་གཉིས་པའི་ཚེས་ཉེར་དགུ་ཉིན་ནུབ་ཕྱོགས་རྒྱལ་ཁབ་དག་གིས་ཨུ་རུ་སིའི་ནང་སྲིད་ལ་ཐེ་གཏོགས་བྱེད་རྩིས་བྱས་པར་རྒོལ་གཏམ་བཏང་བ་དང་། ཨུ་རུ་སི་ཡིས་སྒེར་ཚུགས་ཀྱིས་རྒྱལ་ཁབ་འཕེལ་རྒྱས་ཀྱི་བགྲོད་ལམ་གདམ་གསེས་བྱེད་རྒྱུ་ཡིན་པ་ནན་བཤད་བྱས།
ཕུའུ་ཅིན་གྱིས་ཉིན་དེར་ཨུ་རུ་སིའི་གྲོས་ཁང་གོང་ཞོལ་གཉིས་ལ་རྒྱལ་ཁབ་ཀྱི་གནས་ཚུལ་སྙན་ཞུ་བྱེད་སྐབས་བཤད་རྒྱུར། ཨུ་རུ་སི་ཡིས་མི་གང་རུང་གིས་རང་གི་ནང་སྲིད་ལ་ཐེ་གཏོགས་བྱེད་དུ་འཇུག་མི་སྲིད་ཅིང་། ནུབ་ཕྱོགས་རྒྱལ་ཁབ་དག་གིས་འགལ་བ་བཟོས་ནས་ནང་ཁུལ་དུ་ཨུ་རུ་སིའི་ནུས་པ་ཇེ་ཞན་དུ་གཏོང་བར་རེ་བཞིན་ཡོད་ཀྱང་། ཁོ་ཚོའི་གཡོ་ཇུས་དེ་ནོར་འཆུག་ཡིན། ཨུ་རུ་སིའི་མི་རྣམས་ཀྱིས་ཞི་བདེའི་འཚོ་བའི་ཁེ་དབང་ལ་སྲུང་སྐྱོབ་བྱས་ཏེ། སྒེར་ཚུགས་ཀྱིས་རྒྱལ་ཁབ་འཕེལ་རྒྱས་ཀྱི་བགྲོད་ལམ་གདམ་གསེས་བྱེད་རྒྱུ་ཡིན་ཟེར།
ཕུའུ་ཅིན་གྱིས་བསྟན་དོན། ཨུ་རུ་སི་ཡིས་ཨ་མེ་རི་ཁ་དང་མཉམ་དུ་འཐབ་ཇུས་གཏན་འཇགས་གནད་དོན་ལ་གྲོས་བསྡུར་བྱེད་འདོད་ཡོད་ཀྱང་། ཨུ་རུ་སིའི་རྒྱལ་ཁབ་བདེ་འཇགས་གནད་དོན་ལས་འདས་པའི་གྲོས་མོལ་བྱེད་མི་སྲིད་ཟེར། ཁོས་བཤད་རྒྱུར། ཨ་མེ་རི་ཁས་ཨུ་རུ་སི་ཕམ་ཉེས་སུ་གཏོང་རྩིས་ཡོད་ཀྱང་། ཨུ་རུ་སིའི་བར་འཐབ་ཇུས་གཏན་འཇགས་ཐད་ནས་གྲོས་མོལ་བྱེད་པའི་གྲོས་གཞི་བཏོན་ཡོད། བྱ་སྤྱོད་དེ་གཡོ་རྫུན་ཁོ་ན་རེད། ནུབ་ཕྱོགས་རྒྱལ་ཁབ་དག་གིས་ཨུ་རུ་སི་དམག་ཆས་འགྲན་རྩོད་གསར་བའི་ནང་ཞུགས་སུ་བཅུག་ནས། ཨུ་རུ་སི་དུས་རབས་ཉི་ཤུ་བའི་ལོ་རབས་བརྒྱད་ཅུའི་ལམ་རྙིང་དུ་ཞུགས་སུ་འཇུག་འདོད་ཡོད་ཟེར། ཕུའུ་ཅིན་གྱིས་ཨུ་རུ་སིར་ཐེ་གཏོགས་བྱས་པ་ལས་ཉིང་རྡུལ་མཚོན་ཆའི་གཞི་རྒྱ་ཆེ་བའི་འཁྲུག་རྩོད་འབྱུང་སྲིད་པའི་ཉེན་བརྡ་བཏང་།
ཕུའུ་ཅིན་གྱིས་ནན་གྱིས་བསྟན་དོན། ཨུ་རུ་སིའི་འཐབ་ཇུས་ཉིང་རྡུལ་སྟོབས་ཤུགས་ཀྱིས་ཕྱོགས་ཡོངས་ནས་དོགས་ཟོན་བྱེད་པའི་རྣམ་པར་གནས་ཡོད། དེའི་སྔོན་ཨུ་རུ་སིའི་རྒྱལ་སྲུང་ཁྱབ་ཁོངས་ཀྱི་འཕེལ་རྒྱས་སུ་གཏོང་བའི་འཆར་གཞི་ཚང་མ་དངོས་འབེབས་བྱས་ཡོད་ལ། ཨུ་རུ་སི་ཡིས་མུ་མཐུད་དུ་མདུན་ལྗོངས་བཟང་བའི་མཚོན་ཆའི་མ་ལག་རབ་དང་རིམ་པ་གསར་སྤེལ་བྱེད་པར་འབད་འབུངས་བྱེད་རྒྱུ་ཡིན་ཟེར།
བསོད་ནམས་ཚེ་རིང་གིས་བསྒྱུར།
