ཐུར་ཁེའི་ཙུང་ཐུང་ཨེ་ཨར་ཏའོ་ཨན་དང་ཞི་ལཱའི་ཙུང་ལི་མུས་ཙོ་ཐཱ་ཅི་སི་གཉིས་ཀྱིས་ཚེས13ཉིན་ཐུར་ཁེའི་རྒྱལ་ས་ཨན་ཁཱ་ལཱ་ནས་བསྟན་དོན། ཐུར་ཁེ་དང་ཞི་ལཱ་རྒྱལ་ཁབ་གཉིས་བར་འགལ་བ་ཡོད་ཀྱང་། རྒྱལ་ཁབ་གཉིས་ཀྱི་འབྲེལ་བའི་འཕེལ་རྒྱས་ཀྱི་རྣམ་པ་བཟང་བོ་སྲུང་འཛིན་བྱེད་པར་དོན་སྙིང་གལ་ཆེན་ལྡན་ཟེར།
ཨེ་ཨར་ཏའོ་ཨན་གྱིས་ཉིན་དེར་ཨན་ཁཱ་ལཱ་ནས་འཚམས་འདྲིར་ཡོང་བའི་མུས་ཙོ་ཐཱ་ཅི་སི་དང་གྲོས་མོལ་བྱས། ཨེ་ཨར་ཏའོ་ཨན་གྱིས་གྲོས་མོལ་བྱས་རྗེས་ཀྱི་མཉམ་འབྲེལ་གྱི་གསར་འགྱུར་སྒྲོག་སྤེལ་ཚོགས་འདུའི་སྟེང་བཤད་རྒྱུར། ཐུར་ཁེ་དང་ཞི་ལཱའི་བར་འགལ་བ་ཡོད་ཀྱང་། རྒྱལ་ཁབ་གཉིས་ཀྱིས་གྲོས་མོལ་ཐབས་ལམ་བཀག་མེད་ཡོང་བ་སྲུང་འཛིན་བྱས་ཏེ། མཉམ་ལས་ཀྱི་གྲོས་རིམ་བཟང་བོར་དོ་སྣང་བྱེད་བཞིན་ཡོད་ཟེར།
ཨེ་ཨར་ཏའོ་ཨན་གྱིས་བཤད་རྒྱུར། སེ་ཕུའུ་ལུའུ་སིའི་གནད་དོན་ཐད་ནས་སེ་ཕུའུ་ལུའུ་སི་གླིང་ཕྲན་གྱི་དོན་དངོས་གནས་ཚུལ་ལ་གཞིགས་ནས་འདྲ་མཉམ་དང་དུས་གཏན་གྱི་ཐག་གཅོད་ཇུས་གཞི་འཚོལ་ཞིབ་བྱས་ཏེ། ས་ཁུལ་དེའི་ཞི་བདེ་དང་གཏན་འཇགས་ལ་ཤུགས་སྣོན་བྱེད་དགོས་ཟེར།
མུས་ཙོ་ཐཱ་ཅི་སི་ཡིས་བསྟན་དོན། ཞི་ལཱ་དང་ཐུར་ཁེའི་འབྲེལ་བ་དང་། ཕན་ཚུན་རྒྱུས་ལོན་བྱེད་པའི་སྣང་ཚུལ་དེ་བཟང་བའི་ཕྱོགས་སུ་འཕེལ་རྒྱས་སུ་འགྲོ་བཞིན་ཡོད་ལ། ཞི་ལཱ་ཡིས་ཐུར་ཁེ་ཡོ་རོབ་གླིང་མནའ་འབྲེལ་ནང་ཞུགས་པའི་འཕེལ་རིམ་ལ་རྒྱབ་སྐྱོར་བྱེད་རྒྱུ་ཡིན་ཟེར།
ཐུར་ཁེ་དང་ཞི་ལཱ་རྒྱལ་ཁབ་གཉིས་ནི་བྱང་ཆིངས་རྩ་འཛུགས་ཀྱི་ཁོངས་གཏོས་རྒྱལ་ཁབ་ཡིན་ཡང་། རྒྱལ་ཁབ་གཉིས་ཀྱི་མངའ་ཁོངས་དང་གྲངས་ཉུང་མི་རིགས། གནས་སྤོར་སྡོད་དམངས་སོགས་གནད་དོན་རབ་དང་རིམ་པའི་ཐད་ནས་དུས་ཡུན་རིང་བོར་འགལ་བ་བྱུང་ཡོད། ཐག་གཅོད་ཇུས་གཞི་འཚོལ་ཞིབ་བྱེད་ཆེད། ཉེ་བའི་ལོ་འགའི་རིང་ལ་རྒྱལ་ཁབ་གཉིས་ཀྱིས་གྲོས་མོལ་ཐེངས་མང་བོ་སྤེལ། ཉིས་སྟོང་བཅུ་བདུན་ལོའི་ཟླ་བཅུ་གཉིས་པར། ཨེ་ཨར་ཏའོ་ཨན་གྱིས་ཞི་ལཱ་རུ་དུས་ཡུན་ཉིན་གཉིས་ཀྱི་འཚམས་འདྲི་བྱས་པ་དང་། དེ་ནི་གཅིག་སྟོང་དགུ་བརྒྱ་ང་གཉིས་ལོའི་ཚུན་ལ་ཐུར་ཁེ་རྒྱལ་ཁབ་ཀྱི་མགོ་ཁྲིད་པས་ཐོག་དང་པོར་ཞི་ལཱ་རུ་འཚམས་འདྲི་བྱས་པ་རེད། དེའི་རྗེས་སུ་རྒྱལ་ཁབ་གཉིས་ཀྱི་འབྲེལ་བ་ཡང་བསྐྱར་འགྱུར་ལྡོག་བྱུང་། ཉིས་སྟོང་ཉེར་གཉིས་ལོའི་ཟླ་བཅུ་གཉིས་པར། མུས་ཙོ་ཐཱ་ཅི་སི་ཡིས་ཐུར་ཁེ་རུ་འཚམས་འདྲི་བྱས། ཉིས་སྟོང་ཉེར་གསུམ་ལོའི་ཟླ་བཅུ་གཉིས་པར། ཨེ་ཨར་ཏའོ་ཨན་གྱིས་ཡང་བསྐྱར་ཞི་ལཱ་རུ་འཚམས་འདྲི་བྱས་ནས། ཕྱོགས་གཉིས་ཀྱིས་ཡཱ་ཏེན་མཛའ་མཐུན་ཁྱིམ་མཚེས་རྒྱལ་ཁབ་ཀྱི་བསྒྲགས་གཏམ་བཀོད།
བསོད་ནམས་ཚེ་རིང་གིས་བསྒྱུར།
