ཚེས20ཉིན། འཛམ་གླིང་ཆུའི་གླེང་སྟེགས་སྐབས་བཅུ་པ་ཧིན་རྡུ་ཉི་ཞི་ཡའི་པ་ལིས་གླིང་ཕྲན་དུ་སྤེལ། འདི་ནི་འཛམ་གླིང་ཆུའི་གླེང་སྟེགས་དེ་ཨེ་ཤ་ཡ་ཤར་ལྷོའི་རྒྱལ་ཁབ་དུ་ཐོག་མར་སྤེལ་བ་རེད།

ཐེངས་འདིའི་གླེང་སྟེགས་ཀྱིས་ཆུས་ཐུན་མོང་དར་རྒྱས་ལ་སྐུལ་འདེད་གཏོང་ཞེས་པ་བརྗོད་དོན་དུ་བཟུང་ཞིང་། ཆུའི་བདེ་འཇགས་དང་དར་རྒྱས། མིའི་རིགས་དང་རང་བྱུང་ཆུ་བཀོལ། གནོད་འཚེ་ཉུང་གཏོང་དང་དོ་དམ། བཅོས་སྐྱོང་མཉམ་ལས་དང་ཆུའི་ཕྱི་འབྲེལ། རྒྱུན་མཐུད་ཐུབ་པའི་ཆུའི་དངུལ་གསོག ཤེས་ཡོན་དང་གསར་གཏོད་སོགས་ཀྱི་གྲོས་གཞི་དམིགས་སུ་བཟུང་ནས་གྲོས་ཚོགས་ཐེངས་མང་བསྡུ་རྒྱུ་རེད།

ཧིན་རྡུ་ཉི་ཞི་ཡའི་ཙུང་ཐུང་ཙོ་ཁི་ཡིས་མགོ་རྩོམ་མཛད་སྒོའི་སྟེང་བཤད་རྒྱུར། འཛམ་གླིང་རྒྱལ་ཁབ་སོ་སོས་སྐྱིད་སྡུག་མཉམ་མྱོང་དང་མཉམ་ལས་ལ་ཤུགས་སྣོན་བྱས་ཏེ། ལག་རྡང་མཉམ་སྦྲེལ་གྱིས་གོ་ལ་ཧྲིལ་བོའི་རང་བཞིན་གྱི་ཆུའི་འགྲན་རྩོད་ལ་ཁ་གཏད་འཇལ་ནས་ཐུན་མོང་དར་རྒྱས་མངོན་འགྱུར་བྱེད་པའི་རེ་བ་བྱས་ཡོད་ཟེར།

འཛམ་གླིང་ཆུའི་ལས་འཛིན་ལྷན་ཚོགས་ཀྱི་ཀྲུའུ་ཞི་ལོ་ཁི་ཧྥུའུ་ཞུན་གྱིས་བཤད་རྒྱུར། ནམ་ཟླའི་འགྱུར་ལྡོག་དང་མི་གྲངས་འཕར་སྣོན། གྲོང་ཁྱེར་ཅན་གྱི་འཕེལ་རྒྱས། མི་རྣམས་ཀྱི་འཚོ་བའི་ཆུ་ཚད་སོགས་ཇེ་མཐོར་སོང་བ་དང་བསྟུན་ནས། ཆུའི་དགོས་མཁོ་ལྡབ་འགྱུར་གྱིས་ཇེ་མཐོར་འགྲོ་བཞིན་ཡོད། ཐེངས་འདིའི་གླེང་སྟེགས་འདི་ཆུའི་ཐོན་ཁུངས་ལ་སྲུང་སྐྱོབ་བྱེད་པའི་བྱེ་བྲག་གི་འགུལ་སྐྱོད་ཀྱི་གནད་འགག་གོ་རིམ་ཞིག་ཏུ་གྱུར་ནས། གོ་ལ་ཧྲིལ་བོས་ཆུའི་བདེ་འཇགས་དང་དར་རྒྱས་ཀྱི་ཆེད་དུ་མཉམ་དུ་འབད་བརྩོན་བྱེད་རྒྱུར་སྐུལ་འདེད་གཏོང་ཐུབ་པའི་རེ་བ་བཅངས་ཡོད་ཟེར།

གླེང་སྟེགས་ལ་ཞུགས་པའི་ཀྲུང་གོ་ཆུ་བེད་པུའུ་ཡི་པུའུ་ཀྲང་ལི་གོ་དབྱིན་གྱིས་བཤད་རྒྱུར། ཆུའི་གནོད་འཚེ་དང་ཆུའི་ཐོན་ཁུངས། ཆུའི་སྐྱེ་ཁམས། ཆུའི་ཁོར་ཡུག་བཅས་ནི་ཀྲུང་གོ་དང་འཛམ་གླིང་སྟེང་གི་རྒྱལ་ཁབ་མང་པོ་མཉམ་དུ་འཕྲད་པའི་ཆུའི་གནད་དོན་ཆེན་པོ་བཞི་ཡིན་པས། ཀྲུང་གོ་རྒྱལ་སྤྱིའི་སྤྱི་ཚོགས་དང་མཉམ་དུ། མིའི་རིགས་ཀྱི་ལས་སྐལ་གཅིག་མཐུན་ཚོགས་པ་འཛུགས་པའི་ཁྲོད་ཀྱི་ཆུའི་བཅོས་སྐྱོང་གི་ལེའུ་གསར་བ་འབད་པས་རྩོམ་པའི་ཐད་ནས་སྔར་ལས་མང་བའི་བྱས་རྗེས་འཇོག་རྒྱུར་འཐད་པ་ཡིན་ཞེས་བཤད།

ལི་གོ་དབྱིན་གྱིས་ཆུ་གྲོན་ཆུང་སྔོན་ལ་འཇོག་པ་དང་བར་སྟོང་དོ་སྙོམ། མ་ལག་བཅོས་སྐྱོང་། ཤུགས་མཉམ་འདོན་བཅས་ཀྱི་ཆུ་སྐྱོང་བསམ་ཕྱོགས་རྒྱུན་འཁྱོངས་བྱས་ཏེ། གོ་ལ་ཧྲིལ་བོའི་ཆུའི་འགྲན་རྩོད་ལ་ཁ་གཏད་ནུས་ལྡན་འཇལ་རྒྱུ་དང་། གོ་ལ་ཧྲིལ་བོར་ཆུས་དམངས་བདེ་དམངས་སྐྱིད་ཀྱི་འཚོ་བ་བསྐྲུན་ཤུགས་ཇེ་དྲག་ཏུ་གཏོང་དགོས་ཤིང་། ཆུའི་ཁྱབ་ཁོངས་ཀྱི་བཅོས་སྐྱོང་དམར་མཚམས་ཤུགས་ཆེན་པོས་སེལ་ཐུབ་བྱེད་པ་དང་།  ཞོད་འགོག་བདེ་འཇགས་དང་ཆུ་འདོན་བདེ་འཇགས། འབྲུ་རིགས་བདེ་འཇགས། སྐྱེ་ཁམས་བདེ་འཇགས་སོགས་ཕྱོགས་ཀྱི་མཐུན་སྦྱོར་མཉམ་ཤུགས་ལ་ཁག་ཐེག་བྱས་ནས། གོ་ལ་ཧྲིལ་བོའི་ཆུའི་བཅོས་སྐྱོང་གི་འཕེལ་རིམ་ལ་མྱུར་དུ་སྐུལ་འདེད་གཏོང་དགོས་པའི་གྲོས་གཞི་བཏོན།

ཐེངས་འདིའི་གླེང་སྟེགས་དེ་ཚེས18ཉིན་ནས་ཚེས25ཉིན་བར་སྤེལ་རྒྱུ་རེད། 1997ལོར་གླེང་སྟེགས་ཐོག་མ་སྤེལ་བའི་ཚུན་ལ། འཛམ་གླིང་ཆུའི་གླེང་སྟེགས་དེ་སྤྱིར་བཏང་ལོ་གསུམ་རེའི་ནང་ཐེངས་གཅིག་རེར་སྤེལ་ཞིང་། མིག་སྔར་ཆུ་དོན་ཁྱབ་ཁོངས་ཀྱི་སྒྲིག་གཞི་ཆེས་ཆེ་བའི་རྒྱལ་སྤྱིའི་འདུ་ཚོགས་ཤིག་ཏུ་གྱུར་ཡོད་ཅིང་། འཛམ་གླིང་ཆུའི་ལས་འཛིན་ལྷན་ཚོགས་དང་གཙོ་སྒྲུབ་རྒྱལ་ཁབ་སྲིད་གཞུང་གིས་མཉམ་དུ་གཙོ་སྒྲུབ་བྱེད་ཀྱིན་ཡོད། འཛམ་གླིང་ཆུའི་གླེང་སྟེགས་སྐབས་དགུ་པ་དེ2022ལོར་སེ་ནེ་ཀལ་དུ་སྤེལ།

རིག་འཛིན་སྒྲོལ་མས་བསྒྱུར།