ཨ་རབ་རྒྱལ་ཁབ་མནའ་འབྲེལ་གྱི་དྲུང་ཡིག་ཆེན་མོ་ཀའེ་ཐི་ཡིས་ཉིན་ཤས་གོང་ཨེ་ཅིབ་ཀྱི་རྒྱལ་ས་ཁེ་རོ་རུ་ཀྲུང་གོ་དང་ཨ་རབ་མཉམ་ལས་གླེང་སྟེགས་ཀྱི་པུའུ་ཀྲང་རིམ་པའི་ཚོགས་འདུ་སྐབས་བཅུ་པར་ཚད་མཐོའི་གདེང་འཇོག་བྱས།
ཀའེ་ཐི་ཡིས་ཨེ་ཅིབ་ཏུ་སྡོད་པའི་ཀྲུང་གོའི་གཞུང་ཚབ་ཆེན་མོ་ལེའོ་ལིས་ཆང་དང་མཇལ་འཕྲད་གནང་སྐབས་བཤད་རྒྱུར། སྐབས་འདིའི་པུའུ་ཀྲང་ཚོགས་འདུར་ཕན་འབྲས་ཡག་ཤོས་ཐོན་ཡོད། ཁོས་ཨ་རབ་དང་ཀྲུང་གོའི་འབྲེལ་བར་སྔར་བྱུང་མྱོང་མེད་པའི་ཆུ་ཚད་མཐོ་བའི་འཕེལ་རྒྱས་བྱུང་བར་བསྔགས་བརྗོད་ཆེན་པོ་གནང་བ་དང་། ཀྲུང་གོས་ཐོག་མཐའ་བར་གསུམ་དུ་ཨ་ཀྲུང་བར་གྱི་འབྲེལ་བ་འཕེལ་རྒྱས་གཏོང་རྒྱུར་མཐོང་ཆེན་གནང་བར་ཚད་མཐོའི་བསྔགས་བརྗོད་བྱས།
ཀའེ་ཐི་ཡིས་བསྟན་དོན། ཨ་རབ་ཕྱོགས་ཀྱིས་ཚོགས་འདུའི་འགོ་རྩོམ་མཛད་སྒོའི་སྟེང་ཀྲུའུ་ཞི་ཞི་ཅིན་ཕིང་གིས་གནང་བའི་གཙོ་དོན་གསུང་བཤད་ལ་ཚད་མཐོའི་མཐོང་ཆེན་བྱེད་ཀྱིན་ཡོད་ལ། ཀྲུང་གོ་ཕྱོགས་དང་མཉམ་དུ་ཨ་ཀྲུང་གི་གཙོ་འཛིན་བར་བྱུང་བའི་ཐུན་མོང་གི་ངོས་འཛིན་དང་པུའུ་ཀྲང་ཚོགས་འདུའི་གྲུབ་འབྲས་མཉམ་དུ་དོན་འཁྱོལ་ཡག་པོ་བྱེད་འདོད་ཡོད་པར་མ་ཟད། “མཉམ་ལས་རྣམ་པ་ཆེན་པོ་ལྔ”མཉམ་དུ་གཏོད་ནས་ཀྲུང་གོ་དང་ཨ་རབ་རྩེ་ཚོགས་སྐབས་གཉིས་པ་མཉམ་དུ་ཡག་པོ་གཉེར་འདོད་ཡོད་ཅེས་གསུངས།
ལེའོ་ལིས་ཆང་གིས་བསྟན་དོན། མིག་སྔར་ཀྲུང་གོ་དང་ཨ་རབ་ཀྱི་འབྲེལ་བ་དེ་ལོ་རྒྱུས་ཀྱི་དུས་སྐབས་ཡག་ཤོས་སུ་གནས་པ་དང་། ཀྲུང་གོ་དང་འཕེལ་རྒྱས་འགྲོ་བཞིན་པའི་རྒྱལ་ཁབ་བར་གྱི་འབྲེལ་བའི་དཔེ་མཚོན་དུ་གྱུར་ཡོད། དུས་མཚམས་རྗེས་མར་ཀྲུང་གོ་ཕྱོགས་ཀྱིས་ཨ་རབ་ཕྱོགས་དང་མཉམ་དུ་ཀྲུང་གོ་དང་ཨ་རབ་བར་གྱི་མཉམ་ལས་གླེང་སྟེགས་འཛུགས་སྐྲུན་ལ་སྔར་ལས་ཤུགས་སྣོན་དང་འཐུས་ཚང་དུ་གཏོང་བ་དང་། ནུས་ཤུགས་ཡོད་རྒུས་ཀྲུའུ་ཞི་ཞི་ཅིན་ཕིང་གིས་བཏོན་པའི་ཀྲུང་གོ་དང་ཨ་རབ་ཀྱི“མཉམ་ལས་རྣམ་པ་ཆེན་པོ་ལྔ”མཉམ་དུ་འཛུགས་རྒྱུ་དོན་འཁྱོལ་བྱས་ཏེ་ཀྲུང་གོ་དང་ཨ་རབ་རྩེ་ཚོགས་སྐབས་གཉིས་པ་ཡག་པོ་གཉེར་ནས་ཀྲུང་གོ་དང་ཨ་རབ་བར་གྱི་ལས་སྐལ་གཅིག་མཐུན་ཚོགས་པ་འཛུགས་སྐྲུན་བྱེད་ཚད་ཇེ་མགྱོགས་སུ་འགྲོ་རྒྱུར་སྐུལ་འདེད་གཏོང་འདོད་ཡོད་ཅེས་གསུངས།
ཤ་བོ་གསེར་མཚོས་བསྒྱུར།
