ཚེས14ཉིན། མཉམ་འབྲེལ་རྒྱལ་ཚོགས་སུ་སྡོད་པའི་ཀྲུང་གོའི་འཐུས་ཚབ་གཞོན་པ་ཏའེ་པེན་གྱིས་བདེ་འཇགས་ལས་འཛིན་ལྷན་ཚོགས་ཀྱིས་སུའུ་ཏན་ལྷོ་མའི་གནད་དོན་ལ་གྲོས་ཞིབ་བྱེད་སྐབས་གཏམ་བཤད་སྤེལ་ནས། རྒྱལ་སྤྱིའི་སྤྱི་ཚོགས་ཀྱིས་སུའུ་ཏན་ལྷོ་མའི་ཆབ་སྲིད་བར་བརྒལ་ཐད་ཀྱི་བདག་དབང་དང་གཙོ་ཁྲིད་དབང་ཆར་བརྩི་འཇོག་ཏན་ཏིག་བྱས་ཏེ། གནོན་ཤུགས་སྤྲད་ནས་ཐེ་ཇུས་བྱེད་པའམ་ཡང་ན་ཕྱི་ཕྱོགས་ཀྱི་ཚད་གཞི་བཙན་འགེལ་མི་ཡོང་བར་བྱེད་དགོས་པ་ནན་གྱིས་བསྟན།
ཏའེ་པེན་གྱིས་བཤད་རྒྱུར། མིག་སྔར་སུའུ་ཏན་ལྷོ་མས་བསྐྱར་དར་གྲོས་མཐུན་དོན་འཁྱོལ་དང་ཆབ་སྲིད་བར་བརྒལ་ལ་སྐུལ་འདེད་གཏོང་རྒྱུ་དེ་གནད་འགག་གི་དུས་སྐབས་སུ་གནས་ཡོད་པས་རྒྱལ་སྤྱིའི་སྤྱི་ཚོགས་ཀྱིས་སུའུ་ཏན་ལྷོ་མའི་ཞི་བདེ་འཕེལ་རྒྱས་ལ་དགེ་མཚན་ལྡན་པའི་རྒྱབ་སྐྱོར་བྱེད་དགོས། རྒྱལ་སྤྱིའི་སྤྱི་ཚོགས་ཀྱིས་སུའུ་ཏན་ལྷོ་མས་བསྐྱར་དར་གྲོས་མཐུན་སྔར་ལས་དོན་འཁྱོལ་བྱེད་པར་རྒྱབ་སྐྱོར་བྱེད་པ་དང་། ཕྱོགས་སོ་སོས་ཆབ་སྲིད་ཀྱི་གྲོལ་མོལ་དང་ཕན་ཚུན་མཐུན་སྒྲིལ་ཡིད་ཆེས་བྱེད་ཤུགས་ཆེ་རུ་གཏོང་བར་སྐུལ་མ་བཏང་ནས། འདེམས་བསྐོ་ཆེན་མོ་བྱེད་པར་ཆབ་སྲིད་ཀྱི་ཐུན་མོང་ངོས་ཟིན་གཅིག་སྒྲིལ་བྱེད་དགོས། སུའུ་ཏན་ལྷོ་མའི་འདེམས་བསྐོའི་མ་དངུལ་ཐད་ཀྱི་དཀའ་ངལ་དང་འགྲན་སློང་ལ་མཐོང་ཆེན་བྱས་ནས། འདེམས་བསྐོ་ཨུ་ཡོན་ལྷན་ཁང་དང་མཉམ་འབྲེལ་ལྟ་སྐུལ་དང་དཔྱད་འཇོག་བསྐྱར་སྒྲིག་ཨུ་ཡོན་ལྷན་ཁང་སོགས་སྒྲིག་གཞི་གཙོ་བོས་འགན་འཁྲི་སྒྲུབ་པ་དང་། གཅིག་གྱུར་དཔུང་སྡེའི་བཀོད་སྒྲིག་ལ་མ་དངུལ་གཏོང་བ་སོགས་ཐོན་ཁུངས་སྔར་ལས་མང་པོ་འདོན་སྤྲོད་བྱེད་དགོས། སུའུ་ཏན་ལྷོ་མར་རང་ཉིད་ཀྱི་རྒྱལ་ཁབ་ཀྱི་གནས་ཚུལ་དང་ད་ལྟའི་གནས་ཚུལ་ཡོད། སུའུ་ཏན་ལྷོ་མའི་མི་དམངས་ལ་རང་གི་རྒྱལ་ཁབ་ཀྱི་ལས་དབང་ཐག་གཅོད་བྱེད་པའི་དབང་ཆ་ཡོད།
ཏའེ་པེན་གྱིས་བསྟན་དོན། ཀྲུང་གོ་ཕྱོགས་ཀྱིས་སུའུ་ཏན་ལྷོ་མའི་སྲིད་གཞུང་གིས་འབྲེལ་ཡོད་ཚོ་པ་དང་དེ་མིན་རིགས་རྒྱུད་སོ་སོའི་བར་གྲོས་མོལ་བྱས་ནས། ས་ཞིང་དང་རྩྭ་ར། གནས་སྤར་ནས་ཕྱུགས་འཚོ་བ་སོགས་རྩོད་གཞིའི་གནད་དོན་ཐད་ཡུན་རིང་ཐག་གཅོད་ཇུས་གཞི་འཚོལ་ཞིབ་བྱས་ཏེ་མྱུར་དུ་ཞི་བདེ་འདུམ་འགྲིག་ཡོང་བར་རྒྱབ་སྐྱོར་བྱེད་རྒྱུ་ཡིན། རྒྱལ་སྤྱིའི་སྤྱི་ཚོགས་དང་སུའུ་ཏན་ལྷོ་མར་སྡོད་པའི་མཉམ་འབྲེལ་རྒྱལ་ཚོགས་ཀྱི་ཆེད་མངགས་ཚོགས་པ(སུའུ་ཏན་ལྷོ་མར་སྡོད་པའི་མཉམ་འབྲེལ་རྒྱལ་ཚོགས་ཀྱི་ཚོགས་པ)ཡིས་སུའུ་ཏན་ལྷོ་མའི་སྲིད་གཞུང་གིས་བདེ་འཇགས་ནུས་པའི་འཛུགས་སྐྲུན་ལ་ཤུགས་སྣོན་རྒྱག་པ་དང་བདེ་འཇགས་སྡེ་ཁག་གི་བཅོས་སྒྱུར་ལ་སྐུལ་འདེད་གཏོང་བར་མུ་མཐུད་དུ་རྒྱབ་སྐྱོར་བྱས་ཏེ། མི་སེར་ལ་སྲུང་སྐྱོབ་བྱེད་པའི་ནུས་པ་ཆེ་རུ་གཏོང་དགོས། རྒྱལ་སྤྱིའི་སྤྱི་ཚོགས་ཀྱིས་ད་དུང་སུའུ་ཏན་གྱི་གདོང་ཐུག་གིས་སུའུ་ཏན་ལྷོ་མའི་བདེ་འཇགས་གནས་བབ་ལ་ཐེབས་པའི་ཤུགས་རྐྱེན་ལ་དོ་སྣང་བྱས་ཏེ། སུའུ་ཏན་ལྷོ་མར་རོགས་རམ་བྱས་ནས་དྲག་ཆས་པ་རྒྱལ་མཚམས་བརྒལ་བར་བཀག་འགོག་བྱེད་པ་དང་། རྒྱལ་མཚམས་བརྒལ་བའི་ཉེས་གསོག་དང་མཚོན་ཆ་ཆུང་གྲས་ཁྲིམས་འགལ་ངང་འདྲེན་འཚོང་བྱེད་པར་རྡུང་རྡེག་བཏང་སྟེ། སུའུ་ཏན་ལྷོ་མའི་བདེ་འཇགས་དང་བརྟན་འཇགས་སྲུང་སྐྱོང་ལེགས་པོ་བྱེད་དགོས།
ཏའེ་པེན་གྱིས་བཤད་རྒྱུར། སུའུ་ཏན་ལྷོ་མའི་རྒྱལ་ཁབ་བཙུགས་པའི་དུས་ཡུན་མི་རིང་བ་དང་དཔལ་འབྱོར་གྱི་རྨང་གཞི་ད་དུང་ཉམས་ཞན་ཡིན། འཛམ་གླིང་དངུལ་ཁང་དང་མཉམ་འབྲེལ་རྒྱལ་ཚོགས་གསར་སྤེལ་འཆར་གཞི་ཧྲུའུ་སོགས་འཕེལ་རྒྱས་རོགས་ཟླ་དང་སྲོལ་རྒྱུན་གྱི་ཞལ་འདེབས་འབུལ་མཁན་ཕྱོགས་ཀྱིས་དམངས་ཚིས་འགན་ལེན་དང་དཔལ་འབྱོར་འཕེལ་རྒྱས་སོགས་ཀྱི་ཐད་ནས་སུའུ་ཏན་ལྷོ་མར་རྒྱབ་སྐྱོར་སྔར་ལས་མང་པོ་བྱས་ནས། སུའུ་ཏན་ལྷོ་མའི་དཔལ་འབྱོར་དང་དམངས་འཚོ་བརྟན་པོ་ཡོང་བར་རོགས་རམ་བྱེད་དགོས། རྒྱལ་སྤྱིའི་སྤྱི་ཚོགས་ཀྱིས་སུའུ་ཏན་ལྷོ་མའི་མི་ཆོས་དང་ལེན་མ་དངུལ་མི་འདང་བའི་འགྲན་སློང་དྲག་པོ་ལ་མཐོང་ཆེན་བྱས་ནས་མི་ཆོས་རོགས་སྐྱོར་བྱེད་ཤུགས་ཆེ་རུ་བཏང་སྟེ། སུའུ་ཏན་ལྷོ་མའི་མི་ཆོས་ཀྱི་དགོས་མཁོ་སྐོང་དགོས། སུའུ་ཏན་ལྷོ་མའི་མཉམ་འབྲེལ་རྒྱལ་ཚོགས་ཀྱི་དམག་གཏོང་རྒྱལ་ཁབ་གཙོ་བོ་ཡིན་པའི་ཀྲུང་གོ་ཕྱོགས་ཀྱིས་སུའུ་ཏན་ལྷོ་མའི་མཉམ་འབྲེལ་རྒྱལ་ཚོགས་ཀྱི་བྱ་བར་མུ་མཐུད་དུ་བློ་བརྟན་འགྱུར་མེད་ཀྱིས་རྒྱབ་སྐྱོར་བྱས་ཏེ་སུའུ་ཏན་ལྷོ་མའི་ཞི་བདེ་དང་དར་རྒྱས་ཡོང་བར་ལེགས་སྐྱེས་འབུལ་རྒྱུ་ཡིན།
གཡང་འབུམ་རྒྱལ་གྱིས་བསྒྱུར།
