འབར་མའི་མགོ་ཁྲིད་པ་མེན་ཨང་ལའེ་ཡིས་ཚེས21ཉིན་ནེ་པུས་ཏུའུ་ནས་བསྟན་དོན། འབར་མ་དང་ཀྲུང་གོའི་བར་མཛའ་མཐུན་ལོ་རྒྱས་ཡུན་རིང་ལྡན་པ་དང་། འབར་མ་ཕྱོགས་ཀྱིས་ཀྲུང་གོའི་བར་གྱི་འབྲེལ་བར་མཐོང་ཆེན་བྱེད་ལ། འབར་མ་དང་ཀྲུང་གོའི་ཁྱབ་ཁོངས་སོ་སོའི་མཉམ་ལས་འཕེལ་རྒྱས་སུ་གཏོང་བར་འབད་འབུངས་བྱེད་པ་དང་། རྒྱལ་ཁབ་གཉིས་ཀྱི་སྲོལ་རྒྱུན་མཛའ་བརྩེ་སྲ་བརྟན་དུ་གཏོང་བ་དང་དེར་ཤུགས་སྣོན་བྱས་ནས་རྒྱལ་ཁབ་གཉིས་ཀྱི་མི་དམངས་ལ་བདེ་སྐྱིད་བསྐྲུན་དགོས་ཟེར།
མེན་ཨང་ལའེ་ཡིས་ཉིན་དེར་འབར་མ་རུ་སྡོད་པའི་ཀྲུང་གོའི་གཞུང་ཚབ་ཆེན་མོ་མཱ་ཅཱ་ཡིས་སྤྲད་པའི་རྒྱལ་ཡིག་དང་ལེན་བྱེད་སྐབས་བཤད་རྒྱུར། འབར་མ་དང་ཀྲུང་གོ་རྒྱལ་ཁབ་གཉིས་ཀྱིས་ཐོག་མཐའ་བར་གསུམ་དུ་ཞི་བདེ་མཉམ་གནས་ཀྱི་རྩ་དོན་ལྔའི་དགོངས་དོན་བརྩི་སྲུང་བྱས་ནས་མཛའ་མཐུན་མཉམ་ལས་འཕེལ་རྒྱས་སུ་གཏོང་བཞིན་ཡོད། འབར་མ་ཕྱོགས་ཀྱིས་ཤུགས་ཆེན་པོས་འབར་མ་རུ་ཡོད་པའི་ཀྲུང་གོའི་མི་སྣའི་ལས་གཞིའི་བདེ་འཇགས་ལ་སྲུང་སྐྱོབ་བྱེད་པ་དང་། ཟོལ་མེད་ཀྱིས་འབར་མ་དང་ཀྲུང་གོའི་མཐའ་མཚམས་བདེ་འཇགས་ལ་སྲུང་སྐྱོབ་བྱས་ནས། ཀྲུང་གོའི་བདེ་འཇགས་དང་ཁེ་ཕན་ལ་གནོད་སྐྱེལ་བའི་བྱ་སྤྱོད་གང་རུང་འབྱུང་བར་གཏན་འགོག་བྱེད་བཞིན་ངེས་ཡིན་ཟེར།
མཱ་ཅཱ་ཡིས་བསྟན་དོན། ཀྲུང་གོ་ཕྱོགས་ཀྱིས་བློ་བརྟན་འགྱུར་མེད་ཀྱིས་འབར་མའི་བར་གྱི་མཛའ་མཐུན་སྲིད་ཇུས་ལ་སྐུལ་འདེད་གཏོང་བ་དང་། འབར་མ་ཕྱོགས་ཀྱིས་ཀྲུང་གོའི་བར་གྱི་འབྲེལ་མཐུད་ལ་ཤུགས་སྣོན་བྱས་ནས་ཀྲུང་གོ་དང་འབར་མའི་ལས་སྐལ་གཅིག་མཐུན་ཚོགས་པ་མཉམ་འཛུགས་བྱེད་པར་དགའ་བསུ་ཞུ་བཞིན་ཡོད། འབར་མ་ཕྱོགས་ཀྱིས་ཟོལ་མེད་ཀྱིས་འབར་མ་རུ་ཡོད་པའི་ཀྲུང་གོའི་མི་སྣའི་ལས་གཞིའི་བདེ་འཇགས་ལ་སྲུང་སྐྱོབ་བྱས་ཏེ། ཕྱོགས་གཉིས་ཀྱི་འགྲོ་འོང་ཐད་བདེ་འཇགས་ཀྱི་ཁོར་ཡུག་ཅིག་བསྐྲུན་དགོས་པའི་རེ་བ་བཏོན།
བསོད་ནམས་ཚེ་རིང་གིས་བསྒྱུར།
