ཚེས15ཉིན།   གསར་འགོད་པས་ཚོང་དོན་པུའུ་ནས་ཤེས་རྟོགས་བྱུང་བ་ལྟར་ན། ཟླ11པའི་ཚེས14ཉིན།   ཀྲུང་གོའི་ཚོང་དོན་པུའུ་ཡི་པུའུ་ཀྲང་ཝང་ཝུན་ཐའོ་དང་ཕེ་རུའི་ཕྱི་ཕྱོགས་ཚོང་དོན་ཡུལ་སྐོར་པུའུ་ཡི་པུའུ་ཀྲང་ལའེ་ཨང་གཉིས་ཀྱིས་སོ་སོའི་རྒྱལ་ཁབ་སྲིད་གཞུང་གི་ཚབ་བྱས་ནས།  ཕེ་རུའི་ལི་མ་རུ《<ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་སྲིད་གཞུང་དང་ཕེ་རུ་སྤྱི་མཐུན་རྒྱལ་ཁབ་སྲིད་གཞུང་གི་རང་མོས་ཉོ་ཚོང་གྲོས་མཐུན>རིམ་སྤོར་བྱ་རྒྱུའི་སྐོར་གྱི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་སྲིད་གཞུང་དང་ཕེ་རུ་སྤྱི་མཐུན་རྒྱལ་ཁབ་སྲིད་གཞུང་གི་ཆོད་ཡིག》ལ་མིང་རྟགས་བཀོད།

ཀྲུང་གོ་དང་ཕེ་རུ་ཕྱོགས་གཉིས་ཀྱིས2009ལོའི་ཟླ4བར་རང་མོས་ཚོང་དོན་གྲོས་ཆོད་ལ་མིང་རྟགས་བཀོད་པ་དང2018ལོའི་ཟླ11པར་ཀྲུང་གོ་དང་ཕེ་རུའི་རང་མོས་ཚོང་དོན་གྲོས་ཆོད་རིམ་སྤོར་གྲོས་མོལ་བྱེད་འགོ་བརྩམས་ནས། 2024ལོའི་ཟླ6པར་དངོས་སུ་ལེགས་འགྲུབ་བྱ་རྒྱུ་རེད། དེ་སྔའི་རང་མོས་ཚོང་དོན་གྲོས་ཆོད་ཀྱི་རྨང་གཞིའི་ཐོག་རིམ་སྤོར་གྲོས་ཆོད་ཡི་གེ་དེས་ཐོག་མའི་ཐོན་ཡུལ་གྱི་སྒྲིག་སྲོལ་དང་། འགག་སྒོའི་གོ་རིམ་དང་ཚོང་དོན་སྟབས་བདེ་ཅན། འཕྲོད་བསྟེན་དང་སྐྱེ་དངོས་འཕྲོད་བསྟེན་བྱེད་ཐབས།ཤེས་བྱའི་བདག་དབང་། ཞབས་ཞུའི་ཚོང་དོན། ཚོང་དོན་མི་སྣ་གནས་སྐབས་མཐའ་མཚམས་ནས་འཛུལ་བ་དང་མ་དངུལ་གཏོང་བ་སོགས་གྲོས་ཆོད7གྱི་སྔར་ཡོད་ས་བཅད་སྔར་ལས་འཐུས་ཚང་དུ་བཏང་བ་དང་། ཚད་གཞི་དང་ཚད་ལོན་གྱི་ཞིབ་དཔྱད་གཏན་འཁེལ་མཉམ་ལས་དང་།འགྲན་རྩོད་སྲིད་ཇུས།གློག་རྡུལ་ཚོང་དོན།མཛམ་གླིང་གི་མཁོ་སྤྲོད་སྦྲེལ་ཐགཁོར་ཡུག་དང་ཚོང་དོན་སོགས་ས་བཅད5གསར་དུ་བསྣན་ཡོད་པ་རེད། རིམ་སྤོར་གྲོས་ཆོད་ཡི་གེར་མིང་རྟགས་བཀོད་པ་དེས་ཕྱོགས་གཉིས་ཀྱི་ཚོང་དོན་མ་འཇོག་མཉམ་ལས་ཀྱི་སྦས་ཤུགས་སྔོག་འདོན་ཐུབ་རྒྱུ་དང་།རྒྱལ་ཁབ་གཉིས་ཀྱི་ཁེ་ལས་ལ་དེ་ལས་ལེགས་པའི་ཚོང་གཉེར་ཁོར་ཡུག་བསྐྲུན་རྒྱུ། ཕྱོགས་གཉིས་ཀྱི་མ་འཇོག་ལ་སྔར་ལས་སྲུང་སྐྱོང་དང་སྐུལ་འདེད་གཏོང་རྒྱུ་བཅས་ལ་ཕན་པ་ཡོད་པར་མ་ཟད། རྒྱལ་ཁབ་གཉིས་ཀྱི་ཁེ་ལས་དང་མི་དམངས་ལ་དེ་ལས་མང་བའི་ཁེ་ཕན་དངོས་ཐོབ་རྒྱུ་རེད།

མིང་རྟགས་བཀོད་རྗེས་ཕྱོགས་གཉིས་ཀྱིས་རང་རང་སོ་སོའི་རྒྱལ་ནང་གི་བཅའ་ཁྲིམས་ཞིབ་མཆན་གོ་རིམ་ཁག་སོ་སོར་བསྒྲུབས་ནས་རིམ་སྤོར་གྲོས་ཆོད་ཡི་གེ་སྔ་མོ་ནས་ལག་བསྟར་བྱེད་ཐུབ་པར་སྐུལ་འདེད་གཏོང་རྒྱུ་རེད།

གཡང་འབུམ་རྒྱལ་གྱིས་བསྒྱུར།