ཕའོ་ལན་གྱི་ཙུང་ལི་ཐུའུ་སི་ཁི་ཡིས་ཚེས25ཉིན་རྒྱལ་ས་ཧྭ་ཧྲ་ནས་ནན་གྱིས་བསྟན་དོན། ཨུ་རུ་སི་དང་ཝུའུ་ཁི་ལན་གྱི་འཁྲུག་རྩོད་མཇུག་སྒྲིལ་བར་དམིགས་པའི་གྲོས་མོལ་ནང་ཡོ་རོབ་གླིང་ཞུགས་དགོས་ཟེར།

ཐུའུ་སི་ཁི་ཡིས་ཉིན་དེར་འཚམས་འདྲིར་ཡོང་བའི་ཡོ་རོབ་གླིང་ལས་འཛིན་ལྷན་ཚོགས་ཀྱི་ཀྲུའུ་ཞི་ཁི་སི་ཐཱ་དང་གྲོས་མོལ་བྱས། ཐུའུ་སི་ཁི་ཡིས་དེའི་རྗེས་སུ་སྤེལ་བའི་མཉམ་འབྲེལ་གྱི་གསར་འགོད་པའི་སྣེ་ལེན་ཚོགས་འདུའི་སྟེང་བཤད་རྒྱུར། ཡོ་རོབ་གླིང་གིས་ཝུའུ་ཁི་ལན་གྱི་གནད་དོན་དང་ཨུ་རུ་སིར་དམིགས་པའི་ལངས་ཕྱོགས་ཐད་ནས་མཐུན་སྒྲིལ་ལ་ཤུགས་སྣོན་པ་ནི་ཁ་ཚ་དགོས་གཏུག་གི་གནད་དོན་ཡིན་པ་དང་། མི་འགྱངས་པར་ཨུ་རུ་སི་དང་ཝུའུ་ཁི་ལན་གྱི་ཞི་བའི་གྲོས་མོལ་ནང་ཡོ་རོབ་གླིང་ཞུགས་དགོས་ལ། དེ་ཡང་ཝུའུ་ཁི་ལན་གྱི་རེ་བའང་ཡིན་ཟེར། དཀའ་ཁག་མང་བོ་འཕྲད་ཡོད་ཀྱང་ཡོ་རོབ་གླིང་གིས་སྔར་བཞིན་ཨ་མེ་རི་ཁའི་བར་གྱི་མཉམ་ལས་ལ་ཤུགས་སྣོན་བྱེད་འདོད་ཡོད་ཟེར།

ཁི་སི་ཐཱ་ཡིས་བཤད་རྒྱུར། ཡོ་རོབ་གླིང་ལས་འཛིན་ལྷན་ཚོགས་ཀྱིས་ཟླ3པའི་ཚེས6ཉིན་དམིགས་བསལ་གྲོས་ཚོགས་བསྡུས་ཏེ། གཙོ་བོ་ཝུའུ་ཁི་ལན་གྱི་རྒྱབ་སྐྱོར་དང་ཡོ་རོབ་གླིང་གི་འགོག་སྲུང་ནུས་པ་མཐོར་འདེགས་གཏོང་བར་ཤུགས་སྣོན་པར་གྲོས་བསྡུར་བྱེད་རྒྱུ་ཡིན་ཟེར། ཁོས་བཤད་རྒྱུར། ཨ་མེ་རི་ཁ་དང་ཨུ་རུ་སི་ཡིས་ཉེ་སྔོན་གྲོས་མོལ་བྱས་པར་ཝུའུ་ཁི་ལན་དང་ཡོ་རོབ་གླིང་གི་ཁེ་ཕན་མ་བསམ་པར་ཞི་བའི་གྲོས་མཐུན་འགོད་སྲིད་པར་སེམས་ཁུར་བྱེད་བཞིན་ཡོད། ཡོ་རོབ་གླིང་རྒྱལ་ཁབ་ཀྱི་མགོ་ཁྲིད་པས་ཁོ་དང་གྲོས་མོལ་བྱེད་སྐབས་ཁས་ལེན་བྱས་དོན། ཡོ་རོབ་གླིང་མནའ་འབྲེལ་གྱིས་ཐུན་མོང་འགུལ་སྐྱོད་སྤེལ་ནས་འགྲན་རྩོད་ཐག་གཅོད་བྱེད་དགོས་པ་དང་། དེའི་ནང་ཡོ་རོབ་གླིང་གི་འགོག་སྲུང་ལ་ཤུགས་སྣོན་པ་དང་ཡོ་རོབ་གླིང་སྐམ་ས་ཆེན་མོའི་ཞི་བདེ་དང་ཝུའུ་ཁི་ལན་གྱི་དུས་ཡུན་རིང་བོའི་བདེ་འཇགས་གི་ཆེད་ཐག་གཅོད་རང་བཞིན་གྱི་བྱས་རྗེས་འཇོག་པ་སོགས་འདུས་ཡོད་ཟེར།

ཐུའུ་སི་ཁི་ཡིས་ད་རུང་ཡོ་རོབ་གླིང་མནའ་འབྲེལ་གྱིས་འགོག་སྲུང་དང་བདེ་འཇགས་ཐད་ཀྱི་དངུལ་གསོག་ཁ་སྣོན་བྱེད་དགོས་པའི་འབོད་སྐུལ་བཏང་།

བསོད་ནམས་ཚེ་རིང་གིས་བསྒྱུར།