ཁྲའོ་ཞན་ཀྲུང་དབྱང་འཕྲིན་གཏོང་ཁང་གིས་ཚེས8ཉིན་བསྒྲགས་པ་ལྟར་ན། ཁྲའོ་ཞན་ངལ་རྩོལ་ཏང་གི་སྤྱི་ཁྱབ་ཧྲུའུ་ཅི། རྒྱལ་སྲིད་ཨུ་ཡོན་ཀྲང་ཅིན་ཀྲིན་ཨིན་གྱིས་ཁྲའོ་ཞན་གྱི་གྲུ་གཟིངས་བཟོ་གྲྭ་གཙོ་བོ་ཞིག་ལ་རྟོག་ཞིབ་བྱས་ཏེ། གྲུ་གཟིངས་མང་བོ་ལས་དགོས་པ་དང་མཚོ་དམག་གི་འཐབ་འཛིང་ནུས་པར་ཤུགས་སྣོན་དགོས་པའི་རེ་བ་བཏོན།

ཅིན་ཀྲིན་ཨིན་གྱིས་ནན་གྱིས་བསྟན་དོན། མཚོ་དམག་གི་འཐབ་འཛིང་ནུས་པར་ཤུགས་སྣོན་པའི་གཞི་རྩའི་ཕྱོགས་ནི་དུས་མཉམ་དུ་ཆུ་ཐོག་དང་ཆུ་འོག་གི་གྲུ་གཟིངས་ཀྱི་དེང་རབས་ཅན་གྱི་ཚད་རིམ་ལ་སྐུལ་འདེད་བཏང་ནས་སྔར་ལས་ལྷག་པའི་སྒོ་ནས་འཐབ་འཛིང་ནུས་པ་ཇེ་མཐོར་གཏོང་དགོས་ཟེར། ཁོས་བླངས་པའི་ཉམས་མྱོང་དང་ལག་རྩལ་ལྟར་ན། སྟོབས་དང་ལྡན་པའི་གྲུ་གཟིངས་བཟོ་བའི་ནུས་པ་ཇེ་ཆེར་བཏང་སྟེ། ལག་རྩལ་བཟོ་སྐྲུན་གྱི་སྔོན་ཐོན་རང་བཞིན་མཐོར་འདེགས་གཏོང་བ་དང་། དེང་རབས་ཅན་གྱི་དམག་གྲུ་རིགས་སྣ་ཚོགས་མང་བོ་བཟོ་དགོས་པའི་རེ་བ་བཏོན། ཁོས་ད་རུང་ཡུལ་དངོས་ནས་ཉིང་རྡུལ་སྒུལ་ནུས་ལྡན་པའི་འཐབ་ཇུས་འཕུར་མདའ་ཅན་གྱི་ཆུ་འཛུལ་གྲུ་གཟིངས་བཟོས་པའི་གནས་ཚུལ་ལ་རྒྱུས་ལོན་བྱས།

ཅིན་ཀྲིན་ཨིན་གྱིས་བཤད་རྒྱུར། ཁྲའོ་ཞན་ཕྱོགས་ཀྱིས་དགྲ་བོའི་མཚོ་ཐོག་དང་ཆུ་འོག་གི་དམག་དོན་འགུལ་སྐྱོད་སྣང་མང་དུ་བསྐྱུར་མི་སྲིད་པ་དང་། མཚོ་དམག་གི་སྟོབས་ཤུགས་ལ་བཅོས་བསྒྱུར་བྱས་ཏེ་སྔར་ལས་ལྷག་པའི་སྒོ་ནས་དངོས་ཤུགས་ཇེ་དྲག་ཏུ་གཏོང་བ་དང་། རྒྱ་མཚོའི་བདག་དབང་ལ་སྲུང་སྐྱོབ་བྱས་ཏེ། ཁྲའོ་ཞན་ཕྱེད་གླིང་དང་ས་ཁུལ་གྱི་བདེ་འཇགས་ལ་ཟོལ་མེད་ཀྱིས་འགན་སྲུང་བྱེད་དགོས་ཟེར།

ཁྲའོ་ཞན་ཀྲུང་དབྱང་འཕྲིན་གཏོང་ཁང་གིས་བསྒྲགས་པའི་གནས་ཚུལ་ལས་ཅིན་ཀྲིན་ཨིན་གྱི་ཐེངས་འདིའི་རྟོག་ཞིབ་ཀྱི་བྱེ་བྲག་གི་དུས་ཚོད་ནམ་ཡིན་གསལ་བོར་གླེང་མེད།

བསོད་ནམས་ཚེ་རིང་གིས་བསྒྱུར།