ཁྲའོ་ཞན་ཀྲུང་དབྱང་འཕྲིན་གཏོང་ཁང་གིས་ཚེས4ཉིན་བསྒྲགས་པ་ལྟར་ན། ཁྲའོ་ཞན་ངལ་རྩོལ་ཏང་གི་སྤྱི་ཁྱབ་ཧྲུའུ་ཅི། རྒྱལ་སྲིད་ཨུ་ཡོན་ཀྲང་ཅིན་ཀྲིན་ཨིན་གྱིས་ཁྲའོ་ཞན་གྱི་ཐན་ཁི་འཁོར་ལོའི་བཟོ་གྲྭ་ཞིག་ལ་རྟོག་ཞིབ་བྱས་པ་དང་། སྐམ་དམག་གིས་ཐན་ཁི་འཁོར་ལོ་དང་ཁྲབ་ལྡན་འཁོར་ལོ་གསར་བ་དག་བཀོལ་ནས་དུས་རབས་སྔོན་མའི་ཁྲབ་ལྡན་མཚོན་ཆའི་ཚབ་བྱེད་པ་ནི་དྲག་ཤུགས་འཛུགས་སྐྲུན་དང་སྐམ་དམག་གི་དེང་རབས་ཅན་མངོན་འགྱུར་བྱེད་པའི་གནད་དོན་གལ་ཆེན་ཞིག་ཡིན་པ་ནན་བཤད་བྱས།
བསྒྲགས་པ་ལྟར་ན། ཁྲའོ་ཞན་རྒྱལ་སྲུང་ཚན་རིག་གླིང་དང་ཐན་ཁི་འཁོར་ལོའི་བཟོ་གྲྭའི་བཟོ་བ་དང་ལག་རྩལ་མི་སྣས་ཐན་ཁི་འཁོར་ལོ་དང་ཁྲབ་ལྡན་མཚོན་ཆ་ཞིབ་འཇུག་གསར་སྤེལ་བྱེད་པ་དང་། དེའི་འཐབ་འཛིང་ནུས་པ་མཐོར་འདེགས་གཏོང་བའི་ཐད་ནས་གྲུབ་འབྲས་མངོན་གསལ་བླངས་ཡོད་པ་རེད།
ཅིན་ཀྲིན་ཨིན་གྱིས་བསྟན་དོན། ཚན་རྩལ་བྱ་བ་བྱེད་མཁན་གྱིས་སྒུལ་ཤུགས་བརྒྱུད་འབྲེལ་སྒྲིག་ཆས་ཆ་ཚང་ཞིག་གསར་སྤེལ་བྱས་ཏེ་ཐན་ཁི་འཁོར་ལོའི་འཕྲུལ་ཆས་བྱེད་ནུས་མཐོར་འདེད་བཏང་ཡོད་པ་དང་། སྔར་ལས་ལྷག་པའི་སྒོ་ནས་རྣམ་པ་གསར་བའི་རང་འགུལ་ཅན་གྱི་འགོག་སྲུང་ཕྱོགས་བསྡུས་ཚོགས་པ་དང་འགོག་སྲུང་བྱེད་ཐབས། གློག་རྡུལ་འཐབ་འཁྲུག་གི་ཕྱོགས་བསྡུས་ཚོགས་པ་བཅས་རིམ་འཕར་བྱས་ཡོད་ལ། གྲུབ་འབྲས་དེ་དག་ལ་ཁྲའོ་ཞན་ལུགས་ཀྱི་ཐན་ཁི་འཁོར་ལོའི་ལག་རྩལ་གཙོ་བོར་གོང་འཕེལ་ཆེན་པོ་བྱུང་བ་མཚོན་ཡོད་ཟེར།
ཅིན་ཀྲིན་ཨིན་གྱིས་བསྟན་དོན། དམག་དོན་བཟོ་ལས་ཁེ་ལས་དང་འབྲེལ་ཡོད་ཁེ་ལས་ཀྱི་དེང་རབས་ཅན་ལ་སྐུལ་འདེད་བཏང་སྟེ། རྩེར་སོན་ཆུ་ཚད་ལྡན་པའི་གཞི་རྒྱ་ཆེ་བའི་ཐན་ཁི་འཁོར་ལོ་དང་མེ་སྒྱོགས་ཀྱི་རང་བདག་ཐོན་སྐྱེད་ནུས་པ་འཛུགས་སྐྲུན་བྱས་ནས། གང་མགྱོགས་སྒོས་ཁྲའོ་ཞན་གྱི་དྲག་ཆས་སྟོབས་ཤུགས་ཀྱི་ཁྲབ་ལྡན་མཚོན་ཆའི་མ་ལག་གསར་བསྒྱུར་བྱེད་དགོས་ཟེར།
བསོད་ནམས་ཚེ་རིང་གིས་བསྒྱུར།
