ཨུ་རུ་སིའི་ལྷོ་ཕྱོགས་དམག་ཁུལ་གྱིས་གཞི་རྒྱ་ཆེ་བའི་དམག་དོན་སྦྱོང་བརྡར་སྤེལ། 
2019.08.27 ཁུངས། ཞིན་ཧྭ་གསར་འགྱུར་དྲ་བ། ཀློག་གྲངས། 0

ཨུ་རུ་སིའི་ལྷོ་ཕྱོགས་དམག་ཁུལ་གྱི་གསར་འགྱུར་ཁྲུའུ་ཡིས་ཚེས་ཉེར་དྲུག་ཉིན་སྤྱི་སྒྲོག་སྤེལ་ཏེ། ལྷོ་ཕྱོགས་དམག་ཁུལ་གྱིས་ཉིན་དེ་ནས་བཟུང་གཞི་རྒྱ་ཆེ་བའི་དམག་དོན་སྦྱོང་བརྡར་སྤེལ་མགོ་བརྩམས་ཟེར། 

སྤྱི་སྒྲོག་ལས་བཤད་རྒྱུར། ཐེངས་འདིའི་དམག་དོན་སྦྱོང་བརྡར་ལ་ཨུ་རུ་སིའི་ལྷོ་ཕྱོགས་དམག་ཁུལ་གྱི་དམག་སྤྱི་ཏི་བོ་ཨར་ནེ་ཁི་ཧྥུའུ་ཡིས་བཀོད་འདོམ་བྱེད་པའི་འགན་ཁུར་ཡོད་ཅིང་། ཨུ་རུ་སིའི་སྐམ་དམག་ཨང་བརྒྱད་པ་དང་། ཨང་ཞེ་དགུ་བ། ཨང་ང་བརྒྱད་པ། མཁའ་སྲུང་དམག་དཔུང་། མཚོ་ནག་གི་གྲུ་གཟིངས་རུ་ཁག ལི་ཧེ་ས་ཁུལ་གྱི་གྲུ་གཟིངས་རུ་ཁག་སོགས་དམག་དོན་སྟོབས་ཤུགས་སྦྱོང་བརྡར་ལ་ཞུགས་རྒྱུ་རེད། དམག་དོན་སྦྱོང་བརྡར་དེ་ལོ་སི་ཐའོ་ཧྥུའུ་ཀྲིག་དང་། ཧྥུའུ་ཨར་ཅཱ་ཀི་ལེ་ཀྲིག ཨ་སི་ཐི་ལཱ་ཧན་ཀྲིག སི་ཐཱ་ཧྥུའུ་ལོ་པའོ་ཨར་མཐའ་མཚམས་ས་ཁུལ། ཁི་ལཱ་སི་ནོའུ་ཏཱ་ཨར་མཐའ་མཚམས་ས་ཁུལ་བཅས་ཀྱི་མདའ་འཕེན་ར་བ་མང་བོ་ནས་སྤེལ་རྒྱུ་རེད་ཟེར། 

སྤྱི་སྒྲོག་ལས་བསྟན་དོན། ཐེངས་འདིའི་དམག་དོན་སྦྱོང་བརྡར་ལ་ཞུགས་པའི་དཔོན་དམག་སྟོང་བརྒྱད་པའི་ཉིས་བརྒྱར་བསླེབ་ཡོད་པ་དང་། མཚོན་ཆ་དང་སྒྲིག་ཆས་སྟོང་གཉིས་དང་ལྔ་བརྒྱ་ལྷག་བཀོལ་སྤྱོད་བྱས་ཡོད་ལ། དེའི་ནང་འཐབ་འཛིང་གནམ་གྲུ་སུམ་ཅུ་དང་གྱེན་འཕུར་གནམ་གྲུ་དྲུག་ཅུ ཐན་ཁི་འཁོར་ལོ་བརྒྱ་ལྷག དམག་གྲུ་འགའ་བཅས་འདུས། 

ཐེངས་འདིའི་དམག་དོན་སྦྱོང་བརྡར་གྱི་ནང་དོན་གཙོ་བོ་ནི་དམག་རིགས་མང་བོས་རོགས་རེས་འཐབ་འཁྲུག་བྱེད་པའི་ནུས་པར་སྦྱོང་བརྡར་བྱས་ཏེ། སྔར་ལས་ལྷག་པའི་སྒོ་ནས་ཨུ་རུ་སིའི་ལྷོ་ཕྱོགས་མཐའ་མཚམས་ས་ཁུལ་གྱི་བདེ་འཇགས་ལ་སྲུང་སྐྱོབ་བྱེད་པའི་ཆེད་རེད། སྤྱི་སྒྲོག་ལས་ཐེངས་འདིའི་དམག་དོན་སྦྱོང་བརྡར་དེ་དུས་ནམ་ཞིག་ལ་མཇུག་རྫོགས་པ་གསལ་བོར་ཁྱབ་སྒྲོག་བྱས་མེད། 



ལོ་ཙཱ་བ། བསོད་ནམས་ཚེ་རིང་།