བོད་ཀྱི་དམངས་ཁྲོད་གཉེན་བཤད་ཕྱོགས་བསྒྲིགས་ལས༼བོང་སྟག་ཡུལ་གྱི་གཉེན་བཤད༽འགྲེམ་སྤེལ་གྱི་མཛད་སྒོ་ཟི་ལིང་གྲོང་ཁྱེར་དུ་བསྡུས།
ཉེ་ལམ་བོད་ལྗོངས་སློབ་གྲྭ་ཆེན་མོས་བོད་ཀྱི་དམངས་རྩོམ་མྱུར་སྐྱོབ་ལེགས་བསྒྲིགས་ཀྱི་དཔེ་ཚོགས་སུ་བདམས་པའི་བོད་ཀྱི་དམངས་ཁྲོད་གཉེན་བཤད་ཕྱོགས་བསྒྲིགས་ལས༼བོང་སྟག་ཡུལ་གྱི་གཉེན་བཤད༽ཀྱི་དཔེ་དེབ་འགྲེམ་སྤེལ་གྱི་མཛད་སྒོ་དེ་ཟླ༤པའི་ཚེས༣༠ཉིན་གྱི་སྔ་དྲོ་མཚོ་ནུབ་ཁུལ་རྩོམ་རིག་སྒྱུ་རྩལ་ལྷན་ཚོགས་དང་མཚོ་ནུབ་ཁུལ་རྩོམ་པ་པོ་མཐུན་ཚོགས་གཉིས་ཀྱིས་གཙོ་སྒྲུབ་བྱས་ཏེ་ཟི་ལིང་མགྲོན་ཁང་དུ་གཟབ་རྒྱབ་ངང་ཚོགས། ཐེངས་འདིའི་མཛད་སྒོའི་བགྲོ་གླེང་སྟེང་འབྲེལ་ཡོད་ཀྱི་དབུ་ཁྲིད་དང་ཆེད་མཁས་པ། རྩོམ་པ་པོ། སློབ་ཆེན་སློབ་མ་སོགས་མི་སྣ་ལྔ་བཅུ་ཙམ་ཞུགས་ཡོད་ལ། ཁོ་ཚོས་བོང་སྟག་ཡུལ་གྱི་གཉེན་བཤད་འགྲེམ་སྤེལ་གྱི་མཛད་སྒོ་དང་འབྲེལ་བའི་དམངས་སྲོལ་རིག་གནས་སྔོག་འདོན་དང་དར་སྤེལ་གཏོང་བའི་ཕྱོགས་ནས་བགྲོ་གླེང་ཕུན་སུམ་ཚོགས་པ་བྱས། ཐེངས་འདིའི་དཔེ་ཚོགས་འདིར་དམངས་ཁྲོད་ཀྱི་གཉེན་བཤད་དང་བསང་མཆོད། གླུ་གཞས་བཅས་དེབ་དྲུག་ལེགས་སྒྲིག་བྱེད་དང་བྱེད་མུས་སུ་ཡོད་ཅིང་། དེ་ལས་བོད་ཀྱི་དམངས་ཁྲོད་གཉེན་བཤད་ཕྱོགས་བསྒྲིགས་ལ་དབུས་གཙང་གི་གཉེན་བཤད་དང་ཨ་མདོའི་གཉེན་བཤད། ཁམས་ཀྱི་གཉེན་བཤད་བཅས་རིགས་ཆེན་པོ་གསུམ་གྱིས་གྲུབ་ཡོད། ཨ་མདོའི་གཉེན་བཤད་ཀྱི་ཁོངས་སུ་གཏོགས་པའི་བོང་སྟག་ཡུལ་གྱི་གཉེན་བཤད་འདི་ལ་ལེའུ་ཆེན་པོ་བཅོ་ལྔ་ཡིས་གྲུབ་ཡོད།
མཚོ་ནུབ་ཁུལ་རྩོམ་རིག་སྒྱུ་རྩལ་ལྷན་ཚོགས་ཀྱི་ཀྲུའུ་ཞི་སེ་ཆིན་ཧྥུའུ་ལགས་ཀྱིས་མགོ་འཛིན་གནང་བཞིན་པ།
མཚོ་ནུབ་ཁུལ་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རིན་གཞོན་པ་ཟུར་པ་བསོད་ནམས་དོན་གྲུབ་ལགས་ཀྱིས་ཤིས་ཚིག་འབུལ་བཞིན་པ།
མཚོ་སྔོན་དགེ་ཐོན་སློབ་གྲྭ་ཆེན་མོའི་སློབ་གཙོ་གཞོན་པ་རྒྱ་ཡེ་བཀྲ་བྷོ་ལགས་ཀྱིས་གཏམ་བཤད་གནང་བཞིན་པ།
རྒྱང་སྒྲོག་པ་གྲགས་ཅན་ཕུར་བ་ལགས་ཀྱིས་གཏམ་བཤད་གནང་བཞིན་པ།
བོད་ཀྱི་དམངས་སྲོལ་རིག་གནས་ཆེད་མཁས་པ་གཅན་བཀྲ་བྷོ་ལགས་ཀྱིས་གཏམ་བཤད་གནང་བཞིན་པ།
བོད་ཀྱི་རྩོམ་པ་པོ་གྲགས་ཅན་བ་རེས་ལགས་ཀྱིས་གཏམ་བཤད་གནང་བཞིན་པ།
བུད་མེད་རྩོམ་པ་པོ་གྲགས་ཅན་དཔལ་མོ་ལགས་ཀྱིས་གཏམ་བཤད་གནང་བཞིན་པ།
མཚོ་སྔོན་བོད་ཡིག་ཁྲིམས་ལུགས་ཚགས་པར་ཁང་གི་གཙོ་སྒྲིག་པ་བུན་ཁྲང་རྒྱལ་ལགས་ཀྱིས་གཏམ་བཤད་གནང་བཞིན་པ།
བོད་ཀྱི་སློབ་གསོ་བ་དོ་རྒྱ་བསོད་ནམས་ཚེ་རིང་ལགས་ཀྱིས་གཏམ་བཤད་གནང་བཞིན་པ།
རྩོམ་པ་པོ་བོང་སྟག་རི་ལུ་ཡིས་བཤད་དོན། བོད་ཀྱི་དམངས་ཁྲོད་གཉེན་བཤད་ཕྱོགས་བསྒྲིགས་ཀྱི་དཔེ་དེབ་འདི་ལ་སྟོད་ཆ་དང་སྨད་ཆ་གཉིས་ཡོད་པ་དང་། སྟོད་ཆ་ནི་དབུས་གཙང་ས་ཁུལ་གྱི་གཉེན་བཤད་དང་། སྨད་ཆ་རུ་ཨ་མདོའི་བོང་སྟག་ཡུལ་གྱི་གཉེན་བཤད། སི་ཁྲོན་སྨར་ཁམས་སྒང་གི་གཉེན་བཤད་བཅས་བཀོད་ཡོད། དཔེ་དེབ་འདི་ལས་གཙོ་བོ་བོང་སྟག་ས་ཆ་གཙོ་བྱས་ཏེ། ཨ་མདོའི་ཡུལ་གྱི་གཉེན་བཤད་ཀྱི་གོ་རིམ་ཅུང་ཆ་ཚང་བ་ཞིག་རྒྱ་ཆེའི་ཀློག་པ་པོ་དག་གི་སྤྱན་སྔར་ཕུལ་བ་འདིས། ཕྱི་རབས་པ་མང་པོ་ཞིག་གིས་དམངས་སྲོལ་གྱི་རིག་གནས་སྔོག་འདོན་དང་། རྒྱུད་འཛིན། དར་སྤེལ་གཏོང་བ་བཅས་ལ་མེད་དུ་མི་རུང་བའི་རྒྱུ་ཆ་རྨད་དུ་བྱུང་བ་ཞིག་མཁོ་སྤྲོད་བྱས་ཡོད་ལ། འདིས་གཅིག་ན་བོད་དམངས་ཁྲོད་ཀྱི་རིག་གནས་མི་ཉམས་དར་སྤེལ་གཏོང་བ་དང་སྒོས་སུ་རང་རེའི་བོང་སྟག་ཁོ་ན་མ་ཡིན་པར་ཨ་མདོའི་ཡུལ་གྱི་ཡུལ་སྲོལ་གོམས་འདྲིས་གཅིག་པའི་ས་ཕྱོགས་མང་པོ་ཞིག་གི་ཕྱི་རབས་པ་དག་གིས་དམངས་སྲོལ་རིག་གནས་སློབ་པའི་རྒྱུ་ཆ་མེད་དུ་མི་རུང་བ་ཞིག་ཏུ་འགྱུར་བར་གོར་མ་ཆག་ལ། ངག་རྒྱུན་གྱི་ཚིག་འབྲུ་འདི་དག་ནི་དུས་ཡུན་ངེས་ཅན་ཞིག་འགོར་ན་གསེར་གྱི་རྡོག་པོ་རེ་རེ་ལས་ཀྱང་རིན་ཐང་ཆེ་བ་བརྗོད་དུ་མེད་དོ།།
གསར་འགོད་པ། གནམ་སྐྱབས་རྒྱལ།
