ཉེ་ལམ། གསར་འགོད་པས་མཚོ་སྔོན་ཚོང་གཏམ་གྲོས་ཚོགས་ཀྱི་ལག་བསྟར་ཨུ་ཡོན་ལྷན་ཁང་ནས་ཤེས་གསལ་བྱུང་བ་ལྟར་ན། ཟླ་དྲུག་པའི་ཚེས་བཅུ་བདུན་ཉིན་བར། མཚོ་སྔོན་ཚོང་གཏམ་གྲོས་ཚོགས་ཀྱི་རྨང་གཞིའི་བྱ་བ་དག་དངོས་སུ་ལེགས་འགྲུབ་བྱུང་ནས། རྩ་འཛུགས་སྟ་གོན་བྱ་བ་འགྲུབ་ལ་ཉེ།
རྒྱུས་ལོན་བྱུང་བ་ལྟར་ན། ཟླ་དྲུག་པའི་ཚེས་བཅུ་བདུན་ཉིན་གྱི་ཕྱི་དྲོའི་དུས་ཚོད་བཞི་དང་སྐར་མ་སུམ་ཅུའི་བར་ཏུ། དྲ་ཐོག་ནས་ཚོང་གཏམ་གྲོས་ཚོགས་སྟེང་ཞུགས་པར་ཐོ་འགོད་བྱས་ཡོད་པའི་མི་གྲངས་གཞི་ནས་ཁྲི་གཅིག་དང་སྟོང་གསུམ་བདུན་བརྒྱ་བཞི་བཅུར་སླེབས་ཡོད་པ་དང་། ལོ་སྔོན་མ་དང་བསྡུར་ན་མི་སྟོང་གཅིག་བརྒྱ་དང་དྲུག་ཅུའི་ཇེ་མང་དུ་སོང་ཡོད་པ་རེད། ཚོགས་ཞུགས་མི་སྣ་འདི་དག་གི་ཁྲོད་དུ། ཞིང་ཆེན་དང་གྲོང་ཁྱེར་སོ་གཅིག་གི་འཐུས་ཚབ་ཚོགས་པ་དང་། ཀྲུང་དབྱང་གི་ཁེ་ལས་བཅུ་གཅིག་གི་འཐུས་ཚབ་ཚོགས་པ། མགྲོན་པོ་དང་ཚོང་གཉེར་བ་དོན་བཞིའི་འཐུས་ཚབ་ཚོགས་པ་བཅས་དང་། འཛམ་གླིང་ཡོངས་ཀྱི་རྒྱལ་ཁབ་ཉེར་གཅིག་དང་ས་གནས་ཁག་གི་ཚོང་དོན་འཐུས་ཚབ་མི་སྣ་སྟོང་དགུ་དང་ལྔ་བརྒྱ་སོ་ལྔ་ལྷག་ཡོད་ལ། ཚོགས་ཞུགས་བྱེད་རྒྱུ་ཡིན་པའི་ཁེ་ལས་སྟོང་གསུམ་དང་དགུ་བརྒྱ་ལྷག་ཡོད་པ་རེད། ཐེངས་འདིའི་ཚོང་གཏམ་གྲོས་ཚོགས་སྟེང་ཐོ་འགོད་བྱས་པའི་མི་གྲངས་དང་ཁེ་ལས་ནི་ལོ་རྒྱུས་སྟེང་ཆེས་མང་བ་ཞིག་ཡིན་ལ། འདི་ལས་མཚོ་སྔོན་ཞིང་ཆེན་ཁྱོན་ཡོངས་ནས་སྒོ་འབྱེད་འཕེལ་རྒྱས་ཀྱི་མཆོང་སྐྱོད་གསར་བའི་ཕྱོགས་སུ་བསྐྱོད་པར་མངོན་ཡོད།
