ཉིན་གསུམ་གྱི་རིང་ལ་སྤེལ་བའི་ཐེམ་ཆེན་རྫོང་གི་དྲུག་པའི་ཀླུ་རོལ་གནས་སྐོར་རིག་གནས་དུས་ཆེན་ནི་གནས་སྐོར་རིག་གནས་ཕྱོགས་ཀྱི་མཚན་སྙན་གྲགས་རྒྱས་པའི་དམིགས་བྱ་ཁོ་ན་མིན་པར་མང་ཚོགས་ཀྱི་འཚོ་བའི་ཁྲོད་ཀྱི་སྒྱུ་རྩལ་དུས་ཆེན་གཟབ་རྒྱས་ཤིག་ཀྱང་ཡིན།
ཐེམ་ཆེན་རྫོང་གི་དྲུག་པའི་ཀླུ་རོལ་གནས་སྐོར་རིག་གནས་དུས་ཆེན་གྱི་སྐབས་སུ་མཚོ་ནུབ་མི་རིགས་ཆོས་ལུགས་ལས་དོན་ཨུ་ཡོན་ལྷན་ཁང་གིས་གཙོ་སྒྲུབ་དང་ཐེམ་ཆེན་རྫོང་མི་རིགས་ཆོས་ལུགས་ལས་དོན་ཅུའུ་དང་ཐེམ་ཆེན་རྫོང་རིག་གནས་ལུས་རྩལ་རྒྱང་སྒྲོག་བརྙན་འཕྲིན་གནས་སྐོར་ཅུའུ་ཡིས་སྒྲུབ་འགན་འཁུར་བའི་མཚོ་ནུབ་བོད་ཀྱི་བཤད་པའི་འགྲན་སྡུར་སྐབས་དང་པོ་ཐེམ་ཆེན་རྫོང་ནས་བསྡུས།
བོད་མི་རིགས་ཀྱི་སྲོལ་རྒྱུན་རིག་གནས་ནི་ལོ་རྒྱུས་ཀྱི་རྒྱུན་རིང་ཞིང་བརྗོད་བྱའི་གཏིང་ཟབ་པ། ནང་དོན་ཕུན་སུམ་ཚོགས་པོ་ལྡན་པས། བཤད་པའི་ཆ་ནས་ཀྱང་སྟོན་བཤད་དང་མདའ་བཤད། ཇ་བཤད་དང་ཆང་བཤད། ད་དུང་འདོ་རིགས་རྟ་ཡི་རྟ་བཤད། གཡང་དཀར་ལུག་གི་ལུག་བཤད། སྐྲ་བཤད་དང་སྦྲ་བཤད་སོགས་མང་པོ་ཡོད། ད་ལྟ་དུས་རབས་ཀྱི་འཕེལ་རྒྱས་དང་རིག་གནས་སྣ་ཚོགས་ཀྱི་འབྲེལ་འདྲིས་ཀྱི་དབང་གིས་སྲོལ་རྒྱུན་རིག་གནས་གང་མང་ཞིག་ཉམས་དང་ཉམས་བཞིན་ཡོད་པས། ཐེངས་འདིའི་འགྲན་སྡུར་ཀྱང་བོད་ཀྱི་བཤད་པའི་རིག་གནས་མ་ཉམས་གོང་སྤེལ་དང་ཉམས་པ་སོར་ཆུད་བྱ་ཆེད་མཚོ་ནུབ་བོད་ཀྱི་བཤད་པའི་འགྲན་སྡུར་སྐབས་དང་པོ་བསྡུས་པ་རེད།
གཏེར་ལམ་རྗོང་དང་ཐེམ་ཆེན་རྫོང་ནས་ཡོང་བའི་འགྲན་ཞུགས་པ་བཅུ་ལྷག་ཐེངས་འདིའི་བཤད་པའི་འགྲན་བསྡུར་ལ་ཞུགས་ཤིང་། འགྲན་ཞུགས་པ་རེ་རེའི་རང་ཉིད་ཀྱི་སྨྲ་སྒོ་ལས་ཐོན་པའི་གཏམ་གྱི་མངར་ཆ་དང་། དཔེ་ཡི་བང་མཛོད། གཏམ་གྱི་སྒོ་མོ་རྣམ་གསུམ་ལས་གཉེན་གྱི་དར་ལུགས་དང་། ཇ་ཡི་འབྱུང་ཁུངས་དང་དགེ་མཚན། གནས་རི་དང་ཡུལ་མཆོག་ལ་མཆོད་པར་བརྗོད་པ་སོགས་ཡང་མེས་ནས་དར་བའི་བསྟོད་པའི་ཆེ་བརྗོད་ཀྱི་གོམས་སྲོལ་ནོར་བུའི་བཅུད་ལ་ལྟད་མོ་བ་རྣམས་ཀྱིས་དགའ་བསུ་ཆེན་པོ་ཐོབ།
མཇུག་མཐར་ཐེམ་ཆེན་གྱི་འགྲན་ཞུགས་པ་བྷ་ཁོ་ལ་བྱ་དགའ་ཨང་དང་པོ་ཐོབ་པ་དང་། གཏེར་ལམ་རྫོང་གི་འགྲན་ཞུགས་པ་རྡོ་རྗེ་རྒྱལ་མཚན་དང་། ཐེམ་ཆེན་རྫོང་གི་འགྲན་ཞུགས་པ་རྒྱ་དཔོན་རྡོ་རྗེ་ལ་བྱ་དགའ་ཨང་གཉིས་པ་ཐོབ། དེ་མིན་ཐེམ་ཆེན་རྫོང་གི་འགྲན་ཞུགས་པ་ཁོན་ཐར་སྐྱིད་དང་གཏེར་ལམ་གྱི་འགྲན་ཞུགས་པ་དབང་རྒྱལ། གཏེར་ལམ་གྱི་འགྲན་ཞུགས་པ་ཆོས་སྐྱོང་རྡོ་རྗེ་བཅས་ལ་བྱ་དགའ་ཨང་གསུམ་པ་ཐོབ།
གསར་འགོད་པ། མཚོ་ནུབ་རྒྱང་སྒྲོག་བརྙན་འཕྲིན་ཁང་གི་བདེ་སྐྱིད་སྒྲོལ་མ།
