ད་ལོའི་ཟླ་དང་པོ་ནས་ཟླ་བརྒྱད་པའི་ཟླ་མཇུག་བར། མཚོ་སྔོན་ཞིང་ཆེན་མི་ཤུགས་ཐོན་ཁུངས་སྤྱི་ཚོགས་འགན་སྲུང་ཐིན་གྱིས་བསྡོམས་པས་མི་བཀོལ་སྡེ་ཁག་སྟོང་བཞི་དང་བདུན་བརྒྱ་གྱ་བརྒྱད་ལ་ཞིབ་བཤེར་བྱས་པ་དང་ཞིང་བ་ཞོར་ལས་པའི་གླ་ཕོགས་ཆད་ལུས་བྱས་པའི་གྱོད་དོན་སྟོང་གཅིག་ལྷག་ཐག་གཅོད་བྱས་ཏེ་ཞིང་བ་ཞོར་ལས་པ་ཁྲི་གཅིག་དང་སྟོང་བཞིར་དུས་འགྱངས་ཆད་ལུས་བྱས་པའི་གླ་ཕོགས་སྒོར་དུང་ཕྱུར་གཅིག་དང་བྱེ་བ་བདུན་བྱིན་པ་དང་། ཞིང་བ་ཞོར་ལས་པའི་གླ་ཕོགས་འགན་སྲུང་མ་དངུལ་སྒོར་དུང་ཕྱུར་གསུམ་བསྡུ་ལེན་བྱས་པ་དང་ན་ནིང་གི་དུས་མཉམ་དང་བསྡུར་ན་བརྒྱ་ཆའི་དགུ་དང་གྲངས་ཆུང་དགུ་ཡིས་ཇེ་མང་དུ་སོང་ནས་ནུས་ཡོད་སྒོས་ཞིང་བ་ཞོར་ལས་པའི་ཁྲིམས་མཐུན་ཁེ་དབང་དང་སྤྱི་ཚོགས་འཆམ་མཐུན་བརྟན་འཇགས་ལ་སྲུང་སྐྱོབ་བྱས།
ཉེ་བའི་ལོ་འགའི་རིང་ལ། མཚོ་སྔོན་ཞིང་ཆེན་གྱིས་ཞིང་བ་ཞོར་ལས་པའི་གླ་ཕོགས་སྟེར་བའི་བྱ་བའི་ཐད་ན་ནིང་གི་གྱོད་གཞི་ཐག་གཅོད་བྱེད་པ་དང་གླ་ཕོགས་ཆད་པའི་མི་གྲངས་ཇེ་ཉུང་དུ་གཏོང་བ། ཆད་ལུས་བྱས་པའི་མ་དངུལ་ཇེ་ཉུང་དུ་གཏོང་བ། མང་ཚོགས་རང་བཞིན་གྱི་དོན་རྐྱེན་བྱུང་ཚད་ཇེ་ཉུང་དུ་གཏོང་བའི་དམིགས་འབེན་སྲ་བརྟན་དུ་གཏོང་བའི་རྨང་གཞིའི་སྟེང་གླ་ཕོགས་ཆད་ལུས་བྱེད་པ་སྔོན་འགོག་དང་ཞིབ་བཤེར་བྱེད་པ་གཉིས་ཟུང་འབྲེལ་དང་རྩ་ལག་མཉམ་བཅོས། ཕྱོགས་བསྡུས་སྲིད་ཇུས་ལག་བསྟར་བྱས་ཏེ་གྲུབ་འབྲས་མངོན་གསལ་བླངས། ཞིང་བ་ཞོར་ལས་པའི་གླ་ཕོགས་ཆད་ལུས་གྱོད་གཞི་ཐག་གཅོད་བཟང་བོ་བྱེད་རྒྱུ་དེ་ནི་ངལ་རྩོལ་པའི་ཁྲིམས་མཐུན་ཁེ་དབང་དང་ཐད་ཀར་འབྲེལ་ཡོད་པར་མ་ཟད། སྤྱི་ཚོགས་ཡོངས་ཀྱི་འཆམ་མཐུན་བརྟན་འཇགས་ལ་ཡང་ཐད་ཀར་འབྲེལ་ཡོད། དེ་བས། ཞིང་ཆེན་མི་ཤུགས་ཐོན་ཁུངས་སྤྱི་ཚོགས་འགན་སྲུང་ཐིན་གྱིས་གྲོང་ཁྱེར་སོ་སོ་དང་ཁུལ་སོ་སོས་ཞིང་བ་ཞོར་ལས་པའི་གླ་ཕོགས་འགན་སྲུང་མ་དངུལ་བསྡུ་ལེན་བྱེད་པའི་ཞིབ་བཤེར་བྱ་བ་བཟང་བོར་སྒྲུབ་ནས་དཔེར་མཚོན་གྱོད་དོན་ཐག་གཅོད་བྱེད་པའི་ཤུགས་ཚད་ཇེ་ཆེར་གཏོང་དགོས་པ་དང་། ཧུར་ཐག་གིས་འབྲེལ་ཡོད་སྡེ་ཁག་དང་མཉམ་འབྲེལ་བཟང་བོ་བྱས་ཏེ་སྲིད་གཞུང་གི་དངུལ་གཏོང་ལས་གཞིའི་གླ་ཕོགས་ཆད་པར་ཞིབ་བཤེར་བྱེད་པའི་བྱ་བ་བཟང་བོར་སྒྲུབ་དགོས་པའི་རེ་བ་བཏོན།
