ཉེ་ལམ། རྨ་ལྷོ་བོད་རིགས་རང་སྐྱོང་ཁུལ་ཧི་ནན་རྫོང་གཡུ་སྒང་ཉིན་གྲོང་རྡལ་ཨ་རྨོག་སྡེ་བས་རང་སྡེ་བའི་མང་ཚོགས་རྣམས་རྩ་འཛུགས་བྱས་ཏེ་སྡེ་བའི་བྱ་འགུལ་ཁང་དུ་ཏང་གི་ཚོགས་ཆེན་བཅུ་དགུ་པ་ཚོགས་མགོ་བརྩམས་པའི་མཛད་སྒོར་བལྟས་པ་དང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཕུལ་བའི་སྙན་ཞུར་ནན་གྱིས་ཉན།
གཡུ་སྒང་ཉིན་གྲོང་རྡལ་ཨ་རྨོག་སྡེ་བའི་སྡེ་དཔོན་ཚེ་རྡོ་ཡིས་བཤད་རྒྱུར། ང་ཚོས་སྡེ་མི་རྣམས་རྩ་འཛུགས་བྱས་ཏེ་ཚོགས་ཆེན་བཅུ་དགུ་པའི་མགོ་རྩོམ་མཛད་སྒོར་བལྟས་པ་ཡིན་ལ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དུས་ཚོད་གསུམ་དང་ཕྱེད་ཀ་ལྷག་གི་རིང་ལ་ཕུལ་བའི་སྙན་ཞུར་ཉན་པ་ཡིན། ཁོང་གིས་ཕུལ་བའི་སྙན་ཞུ་དེ་ང་ཚོའི་མ་འོངས་པའི་མཛེས་སྡུག་གི་འཚོ་བའི་དུས་རབས་གསར་པའི་འཆར་འགོད་དང་འབྲེལ་ཡོད་ལ། དེས་ང་ཚོ་འབྲོག་པ་མང་ཚོགས་ཡོངས་ལ་སེམས་འགུལ་ཐེབས་སུ་བཅུག་པ་དང་སྐུལ་མ་བཏང་ཟེར།
ཨ་རྨོག་སྡེ་བའི་ཏང་ཀྲི་པུའུ་ཧྲུའུ་ཅི་མ་དོ་དོ་ཡིས་གསར་འགོད་པར་བཤད་རྒྱུར། འདས་པའི་ལོ་འདི་དག་གི་རིང་ལ། ང་ཚོའི་སྡེ་བ་ཡོངས་སུ་ཆུ་དང་གློག་འཐེན་པ་དང་གཞུང་ལམ་དང་ཁང་བ་གསར་པ་འཛུགས་སྐྲུན་བྱས་པར་མ་ཟད། སྡེ་བ་ཡོངས་ཀྱི་དབུལ་ཕོངས་ཁྱིམ་ཚང་ཞེ་གཉིས་པོ་ཚང་མ་དབུལ་ཐར་བྱས་ཟིན་པས། ང་ཚོས་ཏང་དང་རྒྱལ་ཁབ་ཀྱི་ཐུགས་ཁུར་ལ་བཀའ་དྲིན་ཞུ་བཞིན་ཡོད། དེ་ལས་གཞན། འདས་པའི་ལོ་ལྔའི་རིང་ལ། ང་ཚོ་སྡེ་བས་ཏང་དང་རྒྱལ་ཁབ་ཀྱི་མགོ་ཁྲིད་དང་རྒྱབ་སྐྱོར་འོག གཞི་རིམ་ཏང་འཛུགས་དང་སྐྱེ་ཁམས་བཅོས་སྐྱོང་། དབུལ་ཐར་མཁྲེགས་གཏོར། རྨང་གཞིའི་སྒྲིག་ཆས་འཛུགས་སྐྲུན་སོགས་ཕྱོགས་མང་པོའི་ཐད་གྲུབ་འབྲས་མངོན་གསལ་བླངས་ཡོད་ཟེར། ཁོས་ད་རུང་བཤད་རྒྱུར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་སཕུལ་བའི་སྙན་ཞུ་དེ་ང་ཚོ་འབྲོག་པ་མང་ཚོགས་ཀྱི་ཐོན་སྐྱེད་འཚོ་བ་དང་དམ་པོར་འབྲེལ་ཡོད་པས། ཁོང་གིས་ཕུལ་བའི་སྙན་ཞུར་ཉན་རྗེས་ང་ཚོ་འབྱོར་འབྲིང་སྤྱི་ཚོགས་སུ་སྐྱོད་པའི་ཆོད་སེམས་སྔར་ལས་ཇེ་བརྟན་དུ་བཏང་ཟེར།
ཨ་རྨོག་སྡེ་བའི་སྡེ་མི་རྣམས་ཀྱིས་ལང་ལོང་གིས་བསྟན་དོན། ལོ་འདི་དག་གི་རིང་ལ། ང་ཚོའི་ཉིན་རྒྱུན་གྱི་འཚོ་བ་དང་འབྲེལ་བ་དམ་ཟབ་ཡོད་པའི་ཆུ་དང་གློག་ཁྱིམ་ཚང་རེ་རེར་འཐེན་པ་དང་། གཞུང་ལམ་དང་ཁང་བ་གསར་པ་འཛུགས་སྐྲུན་བྱས་ལ། སྨན་བཅོས་འགན་སྲུང་དང་རྒན་གསོའི་འགན་སྲུང་སོགས་ཀྱི་ཁྲོད་ཞུགས་སུ་བཅུག་པ་དང་། ཕྱུགས་ཟོག་གི་ཉེན་ཚབ་དང་རྩྭ་སའི་བྱ་དགའི་ཁ་གསབ་དངུལ་སོགས་བྱིན་པས་ང་ཚོའི་འཚོ་བ་སྔར་ལས་བདེ་སྐྱིད་ལྡན་པར་གྱུར་ཡོད་ལ། ང་ཚོས་ལྷག་བསམ་རྣམ་དག་གིས་ཏང་དང་རྒྱལ་ཁབ་ལ་བཀའ་དྲིན་ཞུ་བཞིན་ཡོད་ཟེར།
