ན་ནིང་གི་ཚུན་ལ། མཚོ་བྱང་བོད་རིགས་རང་སྐྱོང་ཁུལ་མདའ་བཞི་རྫོང་གིས་ནུས་ལྡན་བྱེད་ཐབས་སྤྱད་དེ། རྣམ་པ་གསར་པའི་འོག་གི་སྤྱི་ཚོགས་འགལ་བ་ཐག་གཅོད་བྱེད་པའི་བྱེད་ཐབས་གསར་པ་ཧུར་ཐག་གིས་འཚོལ་ཞིབ་བྱས་པ་དང་ད་ཡོད་ཀྱི་ཁྲིམས་འཛིན་ཐོན་ཁུངས་ལ་བརྟེན་ནས་མདའ་བཞི་རྫོང་གི་འགལ་བ་དང་རྩོད་གཞི་ཞིབ་བཤེར་ཐག་གཅོད་བྱེད་པའི་མཛུབ་སྟོན་ལྟེ་གནས་བཙུགས་པ་དང་ཏང་ཨུ་དང་སྲིད་གཞུང་གི་འགོ་ཁྲིད་འོག དམངས་གཙོ་དང་འདྲ་མཉམ་གྱིས་སྤྱི་ཚོགས་འགལ་བ་ཐག་གཅོད་བྱེད་པའི་བགྲོད་ལམ་གསར་བ་ཞིག་བཏོད།
རྒྱུས་ལོན་བྱུང་བ་ལྟར་ན། མཛུབ་སྟོན་ལྟེ་གནས་དེས་མི་དམངས་འདུམ་འགྲིག་ལྟེ་གནས་གཅིག་དང་ཞང་གྲོང་གི་མི་དམངས་འདུམ་འགྲིག་ལྟེ་གནས་དྲུག དགོན་པའི་འདུམ་འགྲིག་ཨུ་ཡོན་ལྷན་ཁང་གསུམ་ལ་དོ་དམ་དང་མཛུབ་སྟོན་བྱེད་བཞིན་ཡོད་པ་དང་། འདུམ་འགྲིག་མི་སྣ་བཞི་བརྒྱ་ལྷག་ཡོད། མཛུབ་སྟོན་ལྟེ་གནས་དེས་འདུམ་འགྲིག་བྱ་བའི་གཟབ་ནན་རང་བཞིན་ནས་འགོ་བརྩམས་ཏེ་གཙོ་བོར་རྫོང་ཡོངས་ཀྱི་འདུམ་འགྲིག་ཨུ་ཡོན་ལྷན་ཁང་སོ་སོ་དང་འདུམ་འགྲིག་ལྟེ་གནས་སོགས་ལ་ལས་སྒོའི་མཛུབ་སྟོན་དང་དོ་དམ་གྱི་འགན་ཁུར་ཡོད་པ་དང་། འདུམ་འགྲིམ་བྱས་པའི་གྱོད་གཞིར་ཞིབ་བཤེར་བྱེད་པ། མང་ཚོགས་ཀྱི་བཅའ་ཁྲིམས་འདྲི་རྟོག་དང་ལེན་བྱེད་པ། བཅའ་ཁྲིམས་ཞབས་ཞུ་དང་བཅའ་ཁྲིམས་དྲིལ་སྒྲོག་བྱ་འགུལ་སྤེལ་ཏེ་རྫོང་ཡོངས་ཀྱི་སྤྱི་ཚོགས་འགལ་བ་དང་རྩོད་གཞིའི་གནད་ཚུལ་ཐད་ཀྱི་མང་ཚོགས་ཀྱི་བསམ་འཆར་ལ་དབྱེ་ཞིབ་བྱེད་པ་དང་འགལ་བ་དང་རྩོད་གཞི་ཐག་གཅོད་བྱས་པའི་ཉམས་མྱོང་སྤྱི་སྡོམ་བྱེད་པ་སོགས་ཀྱི་བྱ་བ་བཟང་བོར་སྒྲུབ་བཞིན་ཡོད།
མིག་སྔར། རྫོང་ཡོངས་ཀྱིས་རྫོང་དང་གྲོང་རྡལ། སྡེ་བ་བཅས་རིམ་པ་གསུམ་གྱི་མཉམ་སྒུལ་འདུམ་འགྲིག་རྣམ་པའི་བྱེད་ཐབས་གལ་ཆེན་མངོན་འགྱུར་བྱས་པ་དང་མདའ་བཞི་རྫོང་གི་རྣམ་པ་མང་པོའི་འགལ་བ་རྩོད་གཞི་འདུམ་འགྲིག་བྱ་བའི་རྣམ་པ་གསར་བ་བསྐྲུན། ཉིས་སྟོང་བཅུ་དྲུག་ལོ་ནས་ད་ལྟའི་བར། བསྡོམས་ནས་རིགས་སོ་སོའི་འགལ་བ་དང་རྩོད་གཞི་ཉིས་བརྒྱ་སོ་ལྔར་ཞིབ་བཤེར་ཐག་གཅོད་བྱས་པ་དང་། འདུམ་འགྲིག་བྱས་ཚད་བརྒྱ་ཆའི་གོ་བརྒྱད་དང་ལེགས་གྲུབ་བྱུང་ཚད་བརྒྱ་ཆའི་བརྒྱ་ཡིན།
