གཙང་གསུམ་འགོ་ཁུངས་བསྟན་པ་དར་རྒྱས་འཁེལ་འཐག་བཟོ་གྲྭའི་བལ་དཀར་ཁ་བཏགས་ཀྱི་ཐོན་རྫས་ཁྱབ་སྤེལ་དཔྱད་གླེང་ཚོགས་འདུ་ཁྲིན་ཏུའུ་རུ་བསྡུས།_སྤྱི་ཚོགས་གསར་འགྱུར།

གཙང་གསུམ་འགོ་ཁུངས་བསྟན་པ་དར་རྒྱས་འཁེལ་འཐག་བཟོ་གྲྭའི་བལ་དཀར་ཁ་བཏགས་ཀྱི་ཐོན་རྫས་ཁྱབ་སྤེལ་དཔྱད་གླེང་ཚོགས་འདུ་ཁྲིན་ཏུའུ་རུ་བསྡུས།

2017.12.31 ཁུངས། མཚོ་སྔོན་བོད་སྐད་དྲ་ལམ་རྒྱང་སྒྲོག་བརྙན་འཕྲིན་ཁང་། ཀློག་གྲངས། 44

གཙང་གསུམ་འགོ་ཁུངས་བསྟན་པ་དར་རྒྱས་འཁེལ་འཐག་བཟོ་གྲྭ་དང་། ཀན་ལྷོ་ཁུལ་ཨ་མྱེ་སྐུ་བླ་ཡུལ་སྐོར་རིག་གནས་འཕེལ་རྒྱས་ཀུང་ཟི། གངས་ལྷ་མི་རིགས་མཁོ་ཆས་ལས་སྣོན་ཚད་ཡོད་འགན་འཁྲི་ཀུང་ཟི་བཅས་ཀྱིས་གཙོ་སྒྲུབ་གནང་བའི་བལ་དཀར་ཁ་བཏགས་དང་འབྲེལ་བའི་ཆེས་ཐོག་མའི་བོད་ཀྱི་ཁ་བཏགས་རིག་གནས་དཔྱད་གླེང་ཚོགས་འདུ་སྟེ་གཙང་གསུམ་འགོ་ཁུངས་བསྟན་པ་དར་རྒྱས་འཁེལ་འཐག་བཟོ་གྲྭའི་བལ་དཀར་ཁ་བཏགས་ཀྱི་ཐོན་རྫས་ཁྱབ་སྤེལ་དཔྱད་གླེང་ཚོགས་འདུ་ཟླ་འདིའི་ཚེས30ཉིན་ཁྲིན་ཏུའུ་གྲོང་ཁྱེར་དུ་བསྡུས།

ཐེངས་འདིའི་ཚོགས་འདུའི་སྟེང་ལ་ཕྱོགས་སོ་སོ་ནས་ཕེབས་པའི་ཆེད་མཁས་པ་དང་། ཁེ་ལས་པ། སློབ་ཆེན་དགེ་རྒན། ཚོང་བ་ཆེ་ཆུང་སོགས་བསྡོམས་པའི་མི་སྣ150ལྷག་ཟུར་ཞུགས་བྱས་ཏེ་བོད་ཀྱི་ཁ་བཏགས་རིག་གནས་དང་འབྲེལ་བའི་གཏམ་བཤད་དང་བགྲོ་གླེང་རྒྱ་ཆེར་སྤེལ།

དུས་ཡུན་ཉིན་གཉིས་ལྷག་གི་དཔྱད་གླེང་བརྒྱུད་དེ་ཆེད་མཁས་པ་དང་སྐུ་མགྲོན་དག་གིས་རང་རང་གི་ཚོང་ལས་ལམ་ཁ་ནས་རྙེད་པའི་ཉམས་མྱོང་དང་། ཉམས་མྱོང་དེ་ལས་བསགས་པའི་འབྲས་རྟགས་ཁུར་དུ་བསྣམས་ཏེ་རེབ་འདིའི་ཚོགས་འདུའི་སྟེང་ཞུགས་ཤིང་། བོད་ཀྱི་ཁ་བཏགས་རིག་གནས་དང་འབྲེལ་ཏེ་བལ་དཀར་ཁ་བཏགས་ཀྱི་མིང་ལ་དཔྱད་པ་དང་། ད་ལྟའི་རྒྱུ་ཆ་འགྱིག་རྫས་ཡིན་པའི་ཁ་བཏགས་འགའ་རེས་རང་བྱུང་ཁོར་ཡུག་ལ་བཟོས་དང་བཟོ་བཞིན་པའི་གནོད་འཚེ། འབྱུང་འགྱུར་བལ་དཀར་ཁ་བཏགས་ཀྱི་ཁྲོམ་ར་ཇི་ལྟར་རྒྱལ་སྤྱི་ཅན་དུ་བསྐྱོད་རྒྱུའི་སྐོར། ཁ་བཏགས་ཀྱི་བྱུང་བ་དང་བོད་མིས་ཁ་བཏགས་ལ་བཟུང་བའི་རིན་ཐང་ལྟ་བ་སོགས་ཀྱི་སྐོར་ནས་དགོངས་འཆར་ལྷུག་པོར་བརྗོད།

སྤྱིར་ན་ཁ་བཏགས་ནི་རིག་གནས་ཀྱི་མཚོན་བྱེད་དང་མི་རིགས་ཀྱི་དན་རྟགས་གལ་ཆེན་ཞིག་ཡིན་ལ། གནའ་ནས་ད་བར་བོད་ཀྱི་རྟེན་འབྲེལ་དང་བཀའ་དྲིན་མཚོན་བྱེད་ཅན་ཞིག་ཡིན་པས། བོད་མི་རྣམས་ཀྱི་སྐྱིད་སྡུག་གང་གི་དུས་སུ་ལག་ན་མེད་དུ་མི་རུང་བའི་རྟགས་མཚན་ཞིག་ཏུ་གྱུར་ཡོད། ཡིན་ནའང་ད་ལྟའི་དུས་འདིར་དཔལ་འབྱོར་ཁེ་ཕན་རྐྱང་རྐྱང་ལ་དམིགས་ནས་རྒྱུ་སྤུས་ལ་ཁག་ཐེག་ཅི་ཡང་མེད་པའི་ཁ་བཏགས་ཀྱི་རིགས་སྣ་ཚོགས་བོད་མིའི་འཚོ་བའི་ཁྲོད་དུ་ཐོན་དང་འདོན་བཞིན་ཡོད། དེས་མི་རྣམས་ཀྱི་བདེ་ཐང་ལ་གནོད་པ་བཟོ་བ་མ་ཟད། སྐྱེ་ཁམས་ཁོར་ཡུག་ལའང་འབག་བཙོག་ངེས་ཅན་ཞིག་བཟོ་བཞིན་ཡོད། དེ་བས་གཙང་གསུམ་འགོ་ཁུངས་བསྟན་པ་དར་རྒྱས་འཁེལ་འཐག་བཟོ་གྲྭ་འདིས་འབྲོག་པའི་བལ་ཁུལ་ལ་དེང་རབས་ལག་རྩལ་གྱིས་ལས་སྣོན་བྱས་ཏེ་རྒྱལ་སྤྱིའི་རང་བཞིན་གྱི་རས་སོགས་འཐག་རྒྱུ་གཙོ་བོ་བྱས་ཡོད་དེ་ལྷག་པར་དུ་རང་བྱུང་ཁོར་ཡུག་དང་མི་རིགས་རིག་གནས་ཀྱི་རྒྱབ་ལྗོངས་ལ་མཐུན་པའི་བལ་དཀར་ཁ་བཏགས་ཤིག་གསར་བཟོ་བྱེད་ཐུབ་པ་བྱུང་ཡོད། བལ་དཀར་ཁ་བཏགས་འདིའི་དགེ་མཚན་གཙོ་བོ་ནི་འཛད་སྤྱོད་པས་བཀོལ་སྤྱོད་བྱས་རྗེས་ཕྱིར་བཟོ་གྲྭས་བསྡུ་ཉོ་བྱ་རྒྱུ་ཡིན་པ་དང་། མ་འོངས་པར་བོད་ཀྱི་ཁ་བཏགས་དང་འབྲེལ་བའི་གད་སྙིགས་སྣ་ཚོགས་ཉུང་བ་ནས་མེད་པར་བཟོ་བའི་ཕྱོགས་ལ་ཧུར་བརྩོན་བྱ་རྒྱུ་རེད།

$\"\"$