གཡུང་དྲུང་བོན་གྱི་བཀའ་འགྱུར་ཆེན་མོའི་དཔེ་བསྡུར་ཚོགས་འདུ་ཁྲིན་ཏུའུ་རུ་ཚོགས།
སྤྱི་ཟླ1པོའི་ཚེས19ཉིན་གྱི་ཕྱི་དྲོར། སི་ཁྲོན་མི་རིགས་དཔེ་སྐྲུན་ཁང་གི་རྒྱལ་ཁབ་རིམ་པའི་ལས་གཞི་སྟེ«ཀྲུང་ཧྭའི་བཀའ་བསྟན་ཆེན་མོ་ལས་གཡུང་དྲུང་བོན་གྱི་བཀའ་འགྱུར་ཆེན་མོ»ཡི་དཔེ་བསྡུར་ཚོགས་འདུ་དེ་ཁྲིན་ཏུའུ་རུ་ཚོགས།
ཐེངས་འདིའི་ཚོགས་འདུའི་ཐོག་གཡུང་དྲུང་བོན་མཉམ་འབྲེལ་ལྷན་ཚོགས་ཀྱི་ཚོགས་གཙོ་གཞོན་པ། གཡུང་དྲུང་བོན་གྱི་བཀའ་འགྱུར་དཔེ་རྙིང་འཚོལ་བསྡུ་ཚན་ཆུང་གི་གཙོ་འགན་པ་སྣང་སྤྲུལ་ཤེས་རབ་འོད་ཟེར་རྒྱལ་མཚན་དང་། དྲུང་ཡིག་ཆེན་མོ་དགེ་བཤེས་བསྟན་འཛིན་འབྲུག་གྲགས། དྲུང་ཡིག་ཆེན་མོ་གཞོན་པ་རིན་སྤུངས་ཚུལ་བསྟན། དྲུང་ཡིག་པ་དགེ་བཤེས་བསྟན་འཛིན་རྣམ་རྒྱལ་སོགས་གཡུང་དྲུང་བོན་གྱི་བཀའ་འགྱུར་དཔེ་རྙིང་འཚོལ་བསྡུ་ཚན་ཆུང་གི་ལས་སྣེ་རྣམ་པ་དང་། སི་ཁྲོན་མི་རིགས་དཔེ་སྐྲུན་ཁང་གི་འགོ་གཙོ། སྤྱི་ཁྱབ་རྩོམ་སྒྲིག་པ་ཨ་སྔགས་ཚེ་རིང་བཀྲ་ཤིས་དང་བོད་ཡིག་དཔེ་སྐྲུན་ལྟེ་གནས་ཀྱི་ཀྲུའུ་རེན་འོད་ཟེར། དེ་བཞིན་འབྲེལ་ཡོད་རྩོམ་སྒྲིག་པ་རྣམས་བཅས་ཁྱོན་མི་གྲངས་བཅུ་དགུ་ལྷག་ཚོགས་ཞུགས་བྱས་ཡོད།
ཚོགས་ཐོག་ཏུ་སི་ཁྲོན་མི་རིགས་དཔེ་སྐྲུན་ཁང་གི་འགོ་གཙོ། སྤྱི་ཁྱབ་རྩོམ་སྒྲིག་པ་ཨ་སྔགས་ཚེ་རིང་བཀྲ་ཤིས་ཀྱིས་བོད་ཡིག་དཔེ་སྐྲུན་ལྟེ་གནས་ཀྱི་རྩོམ་སྒྲིག་པ་རྣམས་ངོ་སྤྲོད་བྱས་པ་དང་སྦྲགས། ཐེངས་འདིའི«ཀྲུང་ཧྭའི་བཀའ་བསྟན་ཆེན་མོ་ལས་གཡུང་དྲུང་བོན་གྱི་བཀའ་འགྱུར་ཆེན་མོ»ཡི་དཔེ་བསྡུར་བྱ་བ་དང་། རྣམ་གྲངས་འགངས་ཆེན་འདི་ལག་བསྟར་བྱེད་ཕྱོགས་ཀྱི་སྐོར་ནས་གསུང་གླེང་གལ་ཆེན་གནང་། གཡུང་དྲུང་བོན་གྱི་བཀའ་འགྱུར་དཔེ་རྙིང་འཚོལ་བསྡུ་ཚན་ཆུང་གི་གཙོ་འགན་པ་སྣང་སྤྲུལ་ཤེས་རབ་འོད་ཟེར་རྒྱལ་མཚན་ལགས་ཀྱིས་ཐེངས་འདིའི་ཚོགས་འདུར་ཕེབས་པའི་དགེ་བཤེས་མཁན་སྤྲུལ་རྣམ་པ་ངོ་སྤྲོད་གནང་བ་དང་ཆབས་ཅིག གཡུང་དྲུང་བོན་གྱི་བཀའ་འགྱུར་ཆེན་མོའི་དཔེ་བསྡུར་མ་ཕྱི་གསུམ་སྟེ། བོན་བློན་བླ་མ་ནམ་མཁའ་བསྟན་འཛིན་གྱི་བཀའ་འགྱུར་ལས་བྱུང་བའི་དཔེ་བསྡུར་མ་ཕྱི་དང་། ཨ་གཡུང་བཀའ་འགྱུར་ལས་བྱུང་བའི་དཔེ་བསྡུར་མ་ཕྱི། ཁྱུང་པོ་སྟེང་ཆེན་དགོན་ནས་བརྒྱུད་པའི་བཀའ་འགྱུར་གྱི་དཔེ་བསྡུར་མ་ཕྱི་བཅས་འཚོལ་བསྡུ་གནང་བའི་བརྒྱུད་རིམ་དང་། བཀའ་འགྱུར་པར་གཞི་འདི་གསུམ་གཙོ་བོ་རྒྱལ་རོང་པར་མ་དང་དཔེ་རྙིང་རིགས་ལ་གཞི་བཅོལ་ཏེ་དཔེ་བསྡུར་གནང་རྒྱུ་ཡིན་པའི་སྐོར་ནས་གསུང་གླེང་གནང་། «ཀྲུང་ཧྭའི་བཀའ་བསྟན་ཆེན་མོ་ལས་གཡུང་དྲུང་བོན་གྱི་བཀའ་འགྱུར་ཆེན་མོ»ནི་སི་ཁྲོན་མི་རིགས་དཔེ་སྐྲུན་ཁང་གི་རྒྱལ་ཁབ་རིམ་པའི་དཔེ་སྐྲུན་རྣམ་གྲངས་གལ་ཆེན་ཞིག་ཡིན་ལ། རྣམ་གྲངས་འདི2021ལོར་དངོས་སུ་ལག་བསྟར་དོན་འཁྱོལ་བྱ་རྒྱུ་རེད།
ཐེངས་འདིའི་ཚོགས་འདུའི་ཐོག་གཡུང་དྲུང་བོན་གྱི་བཀའ་འགྱུར་དཔེ་རྙིང་འཚོལ་བསྡུ་ཚན་ཆུང་དང་སི་ཁྲོན་མི་རིགས་དཔེ་སྐྲུན་ཁང་བོད་ཡིག་དཔེ་སྐྲུན་ལྟེ་གནས་གཉིས་ཀྱིས་མཉམ་འབྲེལ་སྒོས་འབྱུང་འགྱུར་དཔེ་སྐྲུན་བྱ་རྒྱུའི་གཡུང་དྲུང་བོན་གྱི་བཀའ་འགྱུར་ཆེན་མོའི་དཔེ་བསྡུར་བྱ་བའི་སྐོར་ལ་བགྲོ་གླེང་ལྷུག་པོར་གནང་སྟེ། མ་འོངས་པའི་ལས་ཀའི་བྱེད་ཕྱོགས་ལ་སྔ་མོ་ནས་གྲ་སྒྲིག་གང་ལེགས་བྱས།
