ཉེ་ལམ། མཚོ་སྔོན་ཞིང་ཆེན་དཔའ་ལུང་རྫོང་སློབ་གསོ་ཅུའུ་ཡིས་ཤར་ནུབ་ཕྱོགས་ཀྱི་རོགས་ལས་སློབ་གསོའི་དབུལ་སྐྱོར་ལས་གཞིས་ས་གནས་གཏན་ཁེལ་གྱིས་དཔའ་ལུང་རྫོང་གི་ཉིས་སྟོང་བཅུ་བདུན་ལོའི་ཡིག་ཚགས་ལས་ཏེ་བྱང་བུ་བྱིན་པའི་དབུལ་ཕོངས་སློབ་ཆེན་སློབ་མར་རོགས་སྐྱོར་མ་དངུལ་སྟེར་བའི་མཛད་སྒོ་བསྡུས། མཛད་སྒོའི་སྟེང་། དཔའ་ལུང་རྫོང་གི་ཡིག་ཚགས་ལས་ཏེ་བྱང་བུ་བྱིན་པའི་དབུལ་ཕོངས་སློབ་ཆེན་སློབ་མ་བཅུ་ལ་མི་རེར་སྒོར་ཁྲི་གཉིས་ཀྱི་ཚད་གཞི་ལྟར་བསྡོམས་པས་མ་དངུལ་སྒོར་འབུམ་གཉིས་བྱིན།
ཐེངས་འདིའི་རོགས་སྐྱོར་ནི་དཔའ་ལུང་རྫོང་གི་ཤར་ནུབ་ཕྱོགས་ཀྱི་རོགས་ལས་སློབ་གསོའི་དབུལ་སྐྱོར་ལས་གཞིའི་ལག་བསྟར་ཇུས་གཞི་གཞིར་བཟུང་ནས། ཉིས་སྟོང་བཅུ་བདུན་ལོར་ཉིན་ཧྲིལ་བོའི་ལམ་ལུགས་ཀྱི་དངོས་གཞིའི་སློབ་གླིང་དུ་རྒྱུགས་འཕྲོད་པའི་ཡིག་ཚགས་ལས་ཏེ་བྱང་བུ་བྱིན་པའི་དབུལ་ཕོངས་ཁྱིམ་ཚང་གི་རིག་ཚན་དང་རྩིས་ཚན་རྒྱུགས་འབྲས་ཨང་བཅུ་བའི་ཡན་གྱི་སློབ་ཆེན་སློབ་མ་བཅུ་ལ་རྫོང་སློབ་གསོ་ཅུའུ་དང་དབུལ་སྐྱོར་ཅུའུ་ཡིས་ཞིབ་བཤེར་གཏན་འབེབས་བྱས་པ་བརྒྱུད་རོགས་སྐྱོར་བྱེད་ཡུལ་དུ་གཏན་ཁེལ་བྱས་པ་རེད།
རྒྱུས་ལོན་བྱུང་བ་ལྟར་ན། ཤར་ནུབ་ཕྱོགས་ཀྱི་རོགས་ལས་སློབ་གསོའི་དབུལ་སྐྱོར་ལས་གཞིས་དཔའ་ལུང་རྫོང་གི་ཡིག་ཚགས་ལས་ཏེ་བྱང་བུ་བྱིན་པའི་དབུལ་ཕོངས་སློབ་ཆེན་སློབ་མར་བྱ་དགའི་རོགས་སྐྱོར་བྱེད་པ་ནི་ཅང་སུའུ་ཞིང་ཆེན་ཝུའུ་ཞི་གྲོང་ཁྱེར་གྱིས་ལོ་ལྔའི་འཆར་གཞི་བཅུ་གསུམ་པའི་ཁྲོད་ཀྱི་དཔའ་ལུང་རྫོང་ལ་ཁ་གཏད་རོགས་སྐྱོར་བྱེད་པའི་བྱེད་ཐབས་གལ་ཆེན་ཞིག་ཡིན། དབུལ་ཕོངས་སློབ་ཆེན་སློབ་མར་རོགས་སྐྱོར་བྱེད་པའི་ལས་གཞི་དོན་འཁྱོལ་བྱེད་པའི་འཆར་འགོད་ལྟར། ཉིས་སྟོང་བཅུ་བདུན་ལོ་ནས་ཉིས་སྟོང་ཉི་ཤུ་ལོའི་བར་ལོ་རེར་ཉིན་ཧྲིལ་བོའི་ལམ་ལུགས་ཀྱི་དངོས་གཞིའི་སློབ་གླིང་དུ་རྒྱུགས་འཕྲོད་པའི་ཡིག་ཚགས་ལས་ཏེ་བྱང་བུ་བྱིན་པའི་དབུལ་ཕོངས་ཁྱིམ་ཚང་གི་སློབ་ཆེན་སློབ་མ་བཅུ་ལ་མི་རེར་སྒོར་ཁྲི་གཉིས་ཀྱི་ཚད་གཞི་ལྟར་རོགས་སྐྱོར་བྱེད་རྒྱུ་རེད། ཐེངས་འདིའི་རོགས་སྐྱོར་གྱིས་སྔོན་ཐོན་ལ་གཟེངས་བསྟོད་བྱེད་པ་དང་རྗེས་ལུས་ལ་སྐུལ་ལྕག་བཏང་སྟེ་རྒྱ་ཆེའི་ཡིག་ཚགས་ལས་ཏེ་བྱང་བུ་བྱིན་པའི་དབུལ་ཕོངས་ཁྱིམ་ཚང་གི་སློབ་མའི་སློབ་སྦྱོང་གི་ཧུར་བརྩོན་རང་བཞིན་སྐུལ་སློང་བྱས་པ་དང་། ནུས་ཡོད་སྒོས་དབུལ་ཕོངས་ཁྱིམ་ཚང་གི་སློབ་མ་སློབ་གྲྭ་འགྲོ་དཀའ་བའི་གནད་དོན་ཐག་བཅད།
