ཉེ་ལམ། གསར་འགོད་པས་མཚོ་སྔོན་ཞིང་ཆེན་མི་ཤུགས་ཐོན་ཁུངས་སྤྱི་ཚོགས་འགན་སྲུང་ཐིན་ནས་རྒྱུས་ལོན་བྱུང་བ་ལྟར་ན། རང་ཞིང་གིས་ཉིས་སྟོང་བཅོ་བརྒྱད་ལོའི་ཟླ་དང་པོའི་ཚེས་གཅིག་ཉིན་ནས་བཟུང་ཞིང་ཆེན་ཡོངས་ཀྱི་གྲོང་གསེབ་སྡོད་དམངས་ཀྱི་གཞི་རྩའི་རྒན་གསོ་ཉེན་ཚབ་ཚད་གཞི་མི་རེར་ཟླ་རེར་སྒོར་བརྒྱ་དང་དོན་ལྔ་ཇེ་མཐོར་བཏང་བ་དང་། སྔོན་ཆད་ཀྱི་མི་རེར་ཟླ་རེར་སྒོར་བརྒྱ་དང་ང་ལྔ་ཡོད་པའི་རྨང་གཞིའི་སྟེང་སྒོར་ཉི་ཤུ་ཇེ་མང་དུ་བཏང་།
མཚོ་སྔོན་ཞིང་ཆེན་ཏང་ཨུ་དང་སྲིད་གཞུང་གིས་དུས་དང་རྣམ་པ་ཀུན་ཏུ་དམངས་ཚིས་བྱ་བར་ཧ་ཅང་མཐོང་ཆེན་བྱེད་ཀྱིན་ཡོད། ཉེ་བའི་ལོ་འགའི་རིང་ལ་གྲོང་གསེབ་སྡོད་དམངས་ཀྱི་གཞི་རྩའི་རྒན་གསོ་ཉེན་ཚབ་རྨང་གཞིའི་རྒན་གསོ་མ་དངུལ་དེ་དམངས་ཚིས་དོན་དངོས་བཟོ་སྐྲུན་གྱི་བྱ་བ་གཙོ་བོར་བཞག་སྟེ་དམ་འཛིན་བྱས་ནས། ཉིས་སྟོང་བཅུ་གཉིས་ལོའི་ཟླ་དང་པོ་དང་ཉིས་སྟོང་བཅུ་བཞི་ལོའི་ཟླ་དང་པོ། ཉིས་སྟོང་བཅུ་བཞི་ལོའི་ཟླ་བདུན་པ། ཉིས་སྟོང་བཅུ་དྲུག་ལོའི་ཟླ་དང་པོ། ཉིས་སྟོང་བཅུ་བདུན་ལོའི་ཟླ་དང་པོ་བཅས་ལ་རྨང་གཞིའི་རྒན་གསོའི་མ་དངུལ་གྱི་ཚད་གཞི་ཇེ་མཐོར་བཏང་།
ཐེངས་འདིར་ལེགས་སྒྲིག་བྱས་པ་ནི་རང་ཞིང་གིས་རྒན་གསོའི་མ་དངུལ་ཚད་གཞི་ཇེ་མཐོར་བཏང་བ་ཐེངས་དྲུག་པ་ཡིན་ལ། ཞིང་ཆེན་ཡོངས་ཀྱི་ལོ་དྲུག་ཅུ་ཡན་གྱི་ལོ་ལོན་འབུམ་ལྔ་ལྷག་ལ་གྲོང་གསེབ་སྡོད་དམངས་ཀྱི་གཞི་རྩའི་རྒན་གསོ་ཉེན་ཚབ་མ་དངུལ་ཐོབ། ཚད་གཞི་ཇེ་མཐོར་བཏང་རྗེས། རང་ཞིང་གི་གྲོང་གསེབ་སྡོད་དམངས་ཀྱི་གཞི་རྩའི་རྒན་གསོ་ཉེན་ཚབ་རྨང་གཞིའི་རྒན་གསོ་མ་དངུལ་ཚད་གཞི་དེ་རྒྱལ་ཁབ་ཀྱིས་གཏན་འཁེལ་བྱས་པའི་ཆེས་དམའ་བའི་རྨང་གཞིའི་རྒན་གསོ་མ་དངུལ་ཚད་གཞིའི་སྒོར་གྱ་བརྒྱད་དང་བསྡུར་ན་སྒོར་གྱ་བདུན་གྱིས་མཐོ་བས་རྒྱལ་ཡོངས་ཀྱི་མདུན་གྲས་སུ་བསླེབས་ཡོད།
མིག་སྔར། ཞིང་ཆེན་ཡོངས་ཀྱི་རིམ་པ་སོ་སོའི་སྤྱི་ཚོགས་འགན་སྲུང་ལས་ཁུངས་ཀྱིས་ལེགས་སྒྲིག་ཁ་གསབ་གྲ་སྒྲིག་བྱ་བ་བཟང་བོར་སྒྲུབ་བཞིན་ཡོད་པ་དང་། ཟླ་དྲུག་པའི་ཟླ་མཇུག་གི་སྔོན་ལ་ཁ་སྣོན་བྱས་པའི་རྨང་གཞིའི་རྒན་གསོ་མ་དངུལ་དོན་ཐོག་ཏུ་དངོས་འབེབས་བྱེད་རྒྱུ་རེད།
