དབུལ་ཐར་མཁྲེགས་གཏོར་གྱི་བྱ་བ་ནན་མོར་སྒྲུབ་པ་དང་ཞིང་སྡེའི་གནས་བབ་གསར་བའི་དཔལ་འབྱོར་འཕེལ་རྒྱས་དང་བསྟུན་ནས། དབུལ་སྐྱོར་བྱེད་ན་སྔོན་ལ་བློ་སྐྱོར་བྱེད་པ་དང་། དབུལ་ཕོངས་སེལ་ན་སྔོན་ལ་རྨོངས་པ་སེལ་བའི་དམིགས་འབེན་དུ་བསླེབ་ཆེད། ཟླ་བཅུ་གཅིག་པའི་ཚེས་ཉེར་གཉིས་ཉིན། མཚོ་ཤར་གྲོང་ཁྱེར་དཔའ་ལུང་རྫོང་གི་ཞིང་བའི་མཚན་མོའི་སློབ་གྲྭ་ཐོ་མ་པ་ཡན་གྲོང་བརྡལ་བོའུ་ཅོ་གོང་མ་སྡེ་བ་རུ་སློབ་མགོ་དངོས་སུ་བརྩམས།

བོའུ་ཅོ་གོང་མ་སྡེ་བ་ནི་དཔའ་ལུང་རྫོང་གི་དབུལ་ཕོངས་སྡེ་བ་གཙོ་བོ་ཞིག་ཡིན་ལ། སྡེ་བ་ཡོངས་ལ་དབུལ་ཕོངས་ཁྱིམ་ཚང་དྲུག་ཅུ་རེ་གསུམ་ཡོད་པ་དང་མི་གྲངས་ཉིས་བརྒྱ་དྲུག་ཅུ་ཡོད། ཉེ་བའི་ལོ་འདི་དག་གི་རིང་ལ། དབུལ་ཐར་མཁྲེགས་གཏོར་གྱི་བྱ་བ་དང་དམངས་ཕན་སྲིད་ཇུས་རབ་དང་རིམ་པ་ལག་བསྟར་བྱས་པར་བརྟེན་ནས་བོའུ་ཅོ་གོང་མ་སྡེ་བའི་སྡེ་དམངས་ལ་ཕྱུག་འགྱུར་གྱི་རེ་བ་ཡོད་པར་གྱུར།

ཡིན་ཡང་འདེབས་འཛུགས་གསོ་སྤེལ་ལས་རིགས་ལག་རྩལ་ཞན་པ་དང་སྡེ་དམངས་ཡོངས་ཀྱི་རིག་གནས་ཆུ་ཚད་དམའ་བའི་རྐྱེན་གྱིས་ཆ་འཕྲིན་ནུས་ལྡན་དང་སྡེ་དམངས་ཕྱུག་འགྱུར་གྱི་ཐབས་ལམ་ཉུང་བ་དང་། ལག་རྩལ་བཀོལ་མི་ཤེས་པ་སོགས་ཀྱི་གནད་དོན་མང་པོ་གནས་ཡོད་པས། སྡེ་སྡོད་ཧྲུའུ་ཅི་དང་པོ་དང་སྡེ་བའི་ཏང་ཀྲུ་པུའུ་ཡིས་སྡེ་བའི་དངོས་ཡོད་གནས་ཚུལ་དང་སྦྲེལ་ནས་ངལ་གསོའི་དུས་ཚོད་བེད་སྤྱད་དེ་ཞིང་བའི་མཚན་མོའི་སློབ་གྲྭའི་གསབ་སྦྱོང་སྤེལ་བ་རེད། 

ཞིང་བའི་མཚན་མོའི་སློབ་གྲྭས་རིག་གནས་བརྒྱུད་སྒྲོག་དང་ལག་རྩལ་གསར་བར་སློབ་སྦྱོང་སོགས་ཀྱི་སྣེ་ཁྲིད་བྱས་ཏེ་ཅི་ཞིག་བསྒྲུབ་དགོས་ན་དེ་སྦྱངས་པ་དང་གང་ཞིག་མི་འདང་ན་དེ་འདོན་སྤྲོད་བྱེད་པའི་རྩ་དོན་ལྟར། ཆོས་ཉིད་དང་བསྟུན་ཏེ་སློབ་ཁྲིད་ཀྱི་ནང་དོན་བཟོས་ཤིང་ཞིང་བ་མང་ཚོགས་ལ་ལག་རྩལ་དང་རིག་གནས་སོགས་ཀྱི་ཤེས་བྱ་ཁྲིད།