ད་ལོར། རྨ་ལྷོ་བོད་རིགས་རང་སྐྱོང་ཁུལ་ཧི་ནན་རྫོང་གིས་འདུ་ཤེས་བཞི་གཟབ་ནན་གྱིས་ལག་བསྟར་དང་། གནད་ཕིགས་ཤུགས་འདོན། ཏང་འཛུགས་ཀྱི་སྣེ་ཁྲིད་དགེ་མཚན་འདོན་སྤེལ་བཅས་བྱས་ཏེ་ཨ་བྲའི་གནོད་པ་འགོག་བཅོས་དང་། ས་ནག་ཐང་བཅོས་སྐྱོང་། ནགས་ས་སྲུང་སྐྱོབ་སོགས་སྐྱེ་ཁམས་ཁོར་ཡུག་སྲུང་སྐྱོབ་བྱ་བར་སྐུལ་འདེད་བཏང་།
རྫོང་ཁོངས་ཀྱི་དངོས་ཡོད་གནས་ཚུལ་ལ་དམིགས་ནས། ཧི་ནན་རྫོང་གི་སྐྱེ་ཁམས་སྲུང་སྐྱོབ་སྲོལ་ཡིག་གཏན་ཁེལ་བྱས་ཏེ་སྐྱེ་ཁམས་སྲུང་སྐྱོབ་བྱེད་རྒྱུ་དེ་ལོ་རེའི་དམིགས་འབེན་དཔྱད་ཞིབ་ཁྲོད་བཞག་པ་དང་། གནད་ཕིགས་དབུལ་སྐྱོར་དང་སྐྱེ་ཁམས་སྲུང་སྐྱོབ། དབུལ་ཐར་ཕྱུག་སྒྱུར་སོགས་སྐྱེ་ཁམས་འཛུགས་སྐྲུན་དང་དམིགས་ཚིས་ལེགས་བཅོས་བྱེད་རྒྱུ་དེ་དཔྱད་ཞིབ་ཀྱི་གཙོ་གནད་དུ་བྱས་ཏེ་སྐྱེ་ཁམས་སྲུང་སྐྱོབ་བྱ་བར་ལག་བསྟར་དངོས་འབེབས་བྱེད་པར་སྐུལ་འདེད་བཏང་།
གཡུ་སྒང་ཉིན་གྲོང་རྡལ་ཧོར་ཝན་སྡེ་བའི་ཏང་ཀྲི་པུའུ་ཡིས་སྐྱེ་ཁམས་ཕྱུགས་ལས་མཉམ་ལས་ཁང་བྱེད་ཐབས་སུ་བྱས་ཏེ་མཉམ་ལས་ཁང་གི་སྐྱེ་ཁམས་ཐོན་ལས་འཕེལ་རྒྱས་འཐབ་ཇུས་གཏན་ཁེལ་བྱས་པ་དང་། ཐུན་མོང་དཔལ་འབྱོར་འཕེལ་རྒྱས་བཏང་སྟེ་སྡེ་བའི་ཐུན་མོང་དཔལ་འབྱོར་འཕེལ་རྒྱས་ཀྱི་འཁོར་སྐྱོད་བཟང་བོ་མངོན་འགྱུར་བྱས། གཡུ་སྒང་ཉིན་གྲོང་རྡལ་ཏང་ཨུ་ཡིས་གཞི་རིམ་ཏང་རྩ་འཛུགས་ཀྱི་བྱེད་ནུས་དང་། ཏང་ཡོན་གྱི་དཔེ་སྟོན་སྣེ་ཁྲིད་བྱེད་ནུས་འདོན་སྤེལ་གང་ལེགས་བྱས་ཏེ། གད་སྙིགས་མེད་པའི་དཔེ་སྟོན་རྫོང་འཛུགས་སྐྲུན་བྱེད་པ་སོགས་ཀྱི་འབྲེལ་ཡོད་རེ་བར་དམིགས་ནས་སྲིད་འཛིན་སྡེ་བ་བཅུའི་ཏང་ཡོན་ཉིས་བརྒྱ་ལྷག་རྩ་འཛུགས་ཀྱིས་གཞུང་ལམ་འགྲམ་རྒྱུད་དང་རྩྭ་ཐང་གི་གད་སྙིགས་ཕྱོགས་བསྡུས་བཅོས་སྐྱོང་བྱ་འགུལ་ཐེངས་ཉེར་དགུ་ལ་སྤེལ་བ་དང་། གད་སྙིགས་ཏུན་བཅུ་ལྷག་གཙང་སེལ་བྱས། ཧི་ནན་རྫོང་རྩྭ་ཐང་ཆེད་དོན་རུ་ཁག་གི་ཏང་ཀྲི་པུའུ་ཡིས་མཛོ་མོ་སྡེ་བའི་ཏང་ཀྲི་པུའུ་དང་མཉམ་འབྲེལ་གྱིས་ས་ནག་ཐང་མུའུ་སྟོང་ལྔ་ལྷག་བཅོས་སྐྱོང་དང་། ས་ཆུ་ཤོར་བར་ཚོད་འཛིན་བྱས་ཏེ་རྩྭ་ཐང་གི་སྐྱེ་ཁམས་མ་ལག་འཁོར་སྐྱོད་བཟང་བོ་བྱེད་པ་མངོན་འགྱུར་བྱས།
རྫོང་ཡོངས་ཀྱི་སྡེ་བ་སོ་སོའི་ཏང་ཡོན་ལས་བྱེད་པ་དག་སྡེ་བའི་ནང་ཟབ་ཞུགས་བྱས་ཏེ་ཁོར་ཡུག་བཅོས་སྐྱོང་གི་དོན་སྙིང་གལ་ཆེན་དྲིལ་སྒྲོག་ཤུགས་ཆེན་བྱས་ནས་མང་ཚོགས་ཀྱི་དཔལ་ཡོན་འཕྲོད་བསྟེན་འདུ་ཤེས་དང་ཁོར་ཡུག་སྲུང་སྐྱོབ་འདུ་ཤེས་ཇེ་དྲག་ཏུ་བཏང་བ་དང་། མང་ཚོགས་དག་ཁོར་ཡུག་ཕྱོགས་བསྡུས་བཅོས་སྐྱོང་བྱ་འགུལ་ཁྲོད་ཞུགས་པར་སྐུལ་ཁྲིད་བྱས་ཏེ་མཛེས་སྡུག་དང་དག་གཙང་། འཆམ་མཐུན་བཅས་ཀྱི་མི་སྡོད་ཁོར་ཡུག་བསྐྲུན་པར་སྐུལ་འདེད་བཏང་།
