ཟླ་དང་པོའི་ཚེས་གསུམ་ཉིན། བོད་ཀྱི་འཁྲབ་ཁྲིད་པ་ཀླུ་རྒྱལ་རཱ་ཏི་ཡིས་འཁྲབ་གཞུང་བྲིས་པའི་གློག་བརྙན༼ གངས་རིའི་རྔ་སྒྲ ༽ཡི་ཕབ་སྐྲུན་དབུ་འབྱེད་མཛད་སྒོ་སྐུ་འབུམ་བྱམས་པ་གླིང་དུ་བསྡུས།
གློག་བརྙན་འདིས་གྲྭ་བ་འོད་གསལ་ཟེར་བ་ཞིག་གིས་བོར་ཟིན་པའི་མི་ལ་རས་པའི་སྐུ་ཐང་ཞིག་འཚོལ་བའི་གཏམ་རྒྱུད་གཞིར་བཟུང་ནས། དཔལ་འབྱོར་གྱི་འགྲན་རྩོད་རྒོད་པའི་དུས་རབས་གསར་བའི་ནང་གི་བོད་མི་རིགས་ཀྱི་རིན་ཐང་ལྟ་བ་དང་། བྱམས་སྙིང་རྗེ་ཡི་འདུ་ཤེས་ཕྱིར་མཚོན་པར་བྱས་ཡོད་པ་དང་ཆབས་ཅིག སྲོལ་རྒྱུན་དང་དེང་རབས་བར་གྱི་འགལ་འདུ་སྣ་ཚོགས་ཀྱང་ཕྱིར་མངོན་པར་བྱས་ཡོད།
གློག་བརྙན༼ གངས་རིའི་རྔ་སྒྲ ༽ ནི་འཁྲབ་ཁྲིད་པ་ཀླུ་རྒྱལ་རཱ་ཏི་ཡི་གློག་བརྙན་གསུམ་པ་ཡིན་ཞིང་། ཡར་སྔོན་གློག་བརྙན༼ འབྲི་མོ་དུང་ཆུང་དཀར་མོ ༽དང༼ སྲིད་པའི་མེ་ཏོག ༽ གཉིས་ཀྱི་འཁྲབ་གཞུང་བརྩམས་ཤིང་འཁྲབ་ཁྲིད་གནང་བས་ཀུན་གྱིས་གདེང་འཇོག་གང་འཚམ་ཐོབ་ཡོད་ལ། གློག་བརྙན་དུས་ཆེན་མང་པོའི་སྟེང་བྱ་དགའ་ཐེངས་དུ་མར་བླངས།
གློག་བརྙན་འདི་ནི་དེ་རིང་སྟེ། ཟླ་དང་པོའི་ཚེས་གསུམ་ཉིན་ནས་མགོ་བརྩམས་ཏེ་ཟི་ལིང་དང་། ཞོན་ཧྭ་སོགས་སུ་སོང་ནས་ཟླ་ངོ་གཅིག་ལྷག་ལ་ཕབ་སྐྲུན་བྱ་རྒྱུ་རེད།
བརྙན་ལེན་འཕྲུལ་ཆས་གྲ་སྒྲིག་བྱེད་བཞིན་པ།
བརྙན་ལེན་འཕྲུལ་ཆས་གྲ་སྒྲིག་བྱེད་བཞིན་པ།
འཁྲབ་སྟོན་པ་ལྷན་རྒྱས་སྐུ་འབུམ་བྱམས་པ་གླིང་དུ་འབྱོར་བ།
འཁྲབ་ཁྲིད་པ་ཀླུ་རྒྱལ་རཱ་ཏི་དང་བརྙན་སྐྲུན་པ་གཅོད་པ།
གཙོ་འཁྲབ་པ་ལྷན་རྒྱས།
གློག་བརྙན༼ གངས་རིའི་རྔ་སྒྲ ༽ ཡི་ཕབ་སྐྲུན་དབུ་འབྱེད་མཛད་སྒོ་བསྡུས།
གསར་འགོད་པ། ལྕགས་ཐར་ཚེ་རིང་། དབང་རྒྱལ་ཚེ་རིང་། ཐུབ་བསྟན་རྡོ་རྗེ།
