ཟླ་དང་པོའི་ཚེས་བཅུ་བདུན་ཉིན། གསར་འགོད་པས་མཚོ་སྔོན་ཞིང་ཆེན་ཡོངས་ཀྱི་སྡོད་ཁང་མཁར་གྲོང་འཛུགས་སྐྲུན་བྱ་བའི་གྲོས་ཚོགས་སྟེང་རྒྱུས་ལོན་བྱུང་བ་ལྟར་ན། ད་ལོར། མཚོ་སྔོན་ཞིང་ཆེན་གྱིས་མུ་མཐུད་དུ་རོང་འབྲོག་ཁུལ་གྱི་སྡོད་ཁང་དང་མཐོ་སྒང་གི་མཛེས་པའི་ཞིང་སྡེ་འཛུགས་སྐྲུན་བྱེད་པ། ཁང་རྙིང་ཁུལ་སྒྱུར་བཀོད་དང་སྡོད་ཁང་རྙིང་བ་ཕྱོགས་བསྡུས་བཅོས་སྐྱོང་སོགས་ལས་གཞི་ལག་བསྟར་བྱེད་རྒྱུ་རེད།
ཉིས་སྟོང་བཅུ་དགུ་ལོར། མཚོ་སྔོན་ཞིང་ཆེན་སྡོད་ཁང་མཁར་གྲོང་འཛུགས་སྐྲུན་ཐིན་གྱིས་རོང་འབྲོག་ཁྱིམ་ཚང་ཁྲི་བཞི་ལྷག་གི་སྡོད་ཁང་འཛུགས་སྐྲུན་ལས་གཞི་ལག་བསྟར་བྱེད་རྒྱུ་ཡིན་པ་དང་། དེའི་ཁྲོད་ཁང་རྙིང་ཁྲི་གཅིག་ལྷག་སྒྱུར་བཀོད་དང་། སྡོད་ཁང་ཁྲི་གསུམ་གྱི་སྡོད་གནས་ཆ་རྐྱེན་ལེགས་བཅོས་བྱེད་རྒྱུ་ཡིན་ལ། མཐོ་སྒང་གི་མཛེས་པའི་ཞིང་སྡེ་སུམ་བརྒྱ་དང་མཛེས་པའི་མཁར་གྲོང་བཅུ་འཛུགས་སྐྲུན་བྱེད་པ། ཁང་རྙིང་ཁྲི་གཅིག་སྒྱུར་བཀོད་དང་སྡོད་ཁུལ་རྙིང་བ་ཁྲི་གསུམ་ཕྱོགས་བསྡུས་བཅོས་སྐྱོང་བྱེད་རྒྱུ་རེད།
ད་ལོའི་བྱ་བའི་དམིགས་འབེན་ལ་དམིགས་ནས། ཞིང་ཆེན་ཡོངས་ཀྱི་སྡོད་ཁང་མཁར་གྲོང་འཛུགས་སྐྲུན་མ་ལག་གིས་སྔོན་འགྲོ་གཅིག་དང་སྤུས་ལེགས་གཉིས་ཀྱི་འཕེལ་རྒྱས་འཐབ་ཇུས་གཙོ་ཐིག་ཏུ་བྱས་ཏེ་སྡོད་ཁང་འགན་སྲུང་མ་ལག་རྒྱུན་ཆད་མེད་པར་འཐུས་ཚང་དུ་གཏོང་བ་དང་། གྲོང་ཁྱེར་དང་གྲོང་རྡལ་གྱི་སྡོད་ཁང་ལམ་ལུགས་བཅོས་སྒྱུར་གཏིང་ཟབ་ཏུ་སྤེལ་བ། གྲོང་ཁྱེར་གྱི་སྡོད་དམངས་གསར་པའི་སྡོད་ཁང་དགོས་མཁོ་བསྐོང་རྒྱུ་འགོ་རྩམ་སར་བྱས་ཏེ་ཁྲོམ་རའི་བཀོད་སྒྲིག་དང་སྲིད་གཞུང་གི་འགན་སྲུང་གཞི་གཅིག་ཏུ་སྦྲེལ་བའི་སྡོད་ཁང་ལམ་ལུགས་འཛུགས་རྒྱུ་ཡིན་པ་དང་། གྲོང་ཁྱེར་དང་གྲོང་རྡལ་གཅིག་གྱུར་འཕེལ་རྒྱས་རྒྱུན་འཁྱོངས་དང་། གྲོང་ཁྱེར་དང་གྲོང་རྡལ་གྱི་རྨང་གཞིའི་སྒྲིག་ཆས་ཀྱི་མི་འདང་སར་ཁ་གསབ་བྱེད་པ། སྤྱི་བའི་ཞབས་ཞུའི་ཆུ་ཚད་མཐོར་འདེགས་གཏོང་བ། སྤྱི་བའི་གསང་སྤྱོད་འཛུགས་སྐྲུན་ལ་ཤུགས་སྣོན་པ་བཅས་བྱས་ནས་རྣམ་པ་གསར་པའི་མཁར་གྲོང་ཅན་འཛུགས་སྐྲུན་ལ་སྐུལ་འདེད་གཏོང་རྒྱུ་ཡིན་པར་མཟད། མཚོ་སྔོན་གྱི་དངོས་ཡོད་གནས་ཚུལ་དང་མཐུན་པའི་མཐོ་སྒང་གི་མཛེས་པའི་ཞིང་སྡེ་འཛུགས་སྐྲུན་དང་མཛེས་པའི་མཁར་གྲོང་འཛུགས་སྐྲུན་ཚད་གཞི་གཏན་ཁེལ་བྱས་ཏེ་མཛེས་པའི་མཁར་གྲོང་འཛུགས་སྐྲུན་དང་ཁྱད་ལྡན་གྲོང་རྡལ་ཆུང་བ་འཛུགས་སྐྲུན་བྱ་བར་ནུས་ཡོད་སྒོས་སྐུལ་འདེད་གཏོང་རྒྱུ་རེད།
