མཚོ་སྔོན་ཞིང་ཆེན་འཕེལ་རྒྱས་བཅོས་སྒྱུར་ཨུ་ཡོན་ལྷན་ཁང་སོགས་ཀྱིས་ཧུར་ཐག་སྒོས་བརྩོན་ལེན་བྱས་པར་བརྒྱུད།  ཉེ་ལམ་རྒྱལ་ཁབ་ཀྱིས་མཚོ་སྔོན་ཞིང་ཆེན་ཉིས་སྟོང་བཅུ་དགུ་ལོའི་རྨ་འབྲི་རྫ་གསུམ་འབྱུང་ཡུལ་སྐྱེ་ཁམས་སྲུང་སྐྱོབ་དང་འཛུགས་སྐྲུན་ལས་གཞི་སྐབས་གཉིས་པ།  མདོ་ལ་རིང་མོའི་སྐྱེ་ཁམས་སྲུང་སྐྱོང་དང་འཛུགས་སྐྲུན་ཕྱོགས་བསྡུས་བཅོས་སྐྱོང་ལས་གཞི་བཅས་ལ་ཀྲུང་དབྱང་ནས་མ་དངུལ་སྒོར་དུང་ཕྱུར་དགུ་གཏོང་རྒྱུ་རེད།

ཐེངས་འདིའི་མ་དངུལ་སྒོར་དུང་ཕྱུར་དགུ་གཏོང་བའི་འཛུགས་སྐྲུན་བྱེད་ཡུལ་གཙོ་བོ་ནི།  རྩྭ་ས་བྱེ་འགྱུར་འགོག་བཅོས།  ས་ནག་ཐང་བཅོས་སྐྱོང་།  ནགས་འདེབས་འཛུགས།   བརླན་ས་སྲུང་སྐྱོབ།  ནགས་ཚལ་དང་རྩྭ་ཐང་གི་གནོད་ལྡན་སྐྱེ་དངོས་འགོག་བཅོས།  སྐྱེ་ཁམས་ལྟ་ཞིབ་ཚད་ལེན།   ཚན་རྩལ་དཔེ་སྟོན་དང་ཁྱབ་སྤེལ་བྱེད་པ། དྲིལ་སྒྲོག་དང་གསོ་སྦྱོང་སོགས་ཡིན། ཉིས་སྟོང་བཅུ་གསུམ་ལོར་ལས་གཞིའི་རྣམ་གྲངས་གཉིས་ལག་བསྟར་བྱས་པ་ནས་བཟུང་།  མ་དངུལ་སྒོར་ཐེར་ཆེན་གཅིག་ཐེར་འབུམ་བཞི་དང་དུང་ཕྱུར་བདུན་བཏང་བ་དང་ལས་གཞི་རྣམ་གྲངས་སོ་སོ་བདེ་ལེགས་ངང་སྤེལ།  མིག་སྔར།  ཞིང་ཆེན་འཕེལ་རྒྱས་བཅོས་སྒྱུར་ཨུ་ཡོན་ལྷན་ཁང་དང་ཞིང་ཆེན་ནགས་ལས་ཅུའུ་སོགས་སྡེ་ཁག་གིས་རྒྱལ་ཁབ་ཀྱི་འབྲེལ་ཡོད་བླང་བྱ་ལྟར།  རྒྱལ་ཁབ་ཀྱིས་མ་དངུལ་གཏོང་བའི་འཆར་གཞི་དམ་འཛིན་བྱས་པ་དང་།  འབྲེལ་ཡོད་ལས་ཁུངས་ཀྱིས་ཐོག་མའི་ཇུས་འགོད་ཀྱི་ཞིབ་བཤེར་ཆོག་མཆན་འགོད་པའི་ལས་དོན་ལེགས་པར་བསྒྲུབ་པར་སྐུལ་འདེད་བཏང་།  ནན་ཏན་གྱིས་ཆོག་མཆན་ལྟར་རྩ་འཛུགས་ལག་བསྟར་བྱས་པ་དང་།  ལས་གཞི་ལེགས་འགྲུབ་བྱེད་ཚད་ཇེ་མགྱོགས་སུ་གཏོང་བར་སྐུལ་འདེད་བཏང་།  ལས་གཞི་འཛུགས་སྐྲུན་ལས་འགན་སྣ་ཚོགས་དུས་ལྟར་སྤུས་ཚད་ཁག་ཐེག་ཡོད་པའི་སྒོ་ནས་ལེགས་འགྲུབ་བྱས།