ཟླ་བཞི་བའི་ཚེས་གཅིག་ཉིན། མཚོ་ཤར་གྲོང་ཁྱེར་ཞོན་ཧྭ་ས་ལར་རིགས་རང་སྐྱོང་རྫོང་ཀ་རིང་ཞང་གིས་གྲོང་གསེབ་དར་སྤེལ་དང་སྐྱེ་ཁམས་དཔལ་ཡོན་སྡེ་བ་འཛུགས་སྐྲུན་བྱེད་པ་ཟུང་འབྲེལ་བྱས་ཏེ། རྫོང་དང་སྡེ་བའི་བར་གྱི་གཞུང་ལམ་གཡས་གཡོན་དུ་ལྗང་འགྱུར་བྱ་བ་ཤུགས་ཆེན་པོས་སྒྲུབ་པ་དང་། ལྗང་མདོག་སྐྱེ་ཁམས་ཀྱི་ཀ་རིང་དང་མཛེས་པའི་ཞང་སྡེ་འཛུགས་སྐྲུན་བྱས།
ཀ་རིང་ཞང་ཏང་ཨུ་དང་སྲིད་གཞུང་རྩ་འཛུགས་ལས་ཁུངས་ཀྱི་ཏང་ཡོན་དང་། ལས་བྱེད་པ། མང་ཚོགས་དང་དང་བླངས་པ་སོགས་མི་སྣ་ལྔ་བཅུ་ལྷག་གིས་མཉམ་དུ་གཞུང་ལམ་གཡས་གཡོན་དུ་ལྗང་མདོག་སྲུང་སྐྱོབ་འཛུགས་སྐྲུན་བྱེད་ཅེས་པ་བརྗོད་གཞི་ཡིན་པའི་སྡོང་འཛུགས་བྱ་འགུལ་སྤེལ།
ཀ་རིང་ཞང་ཏང་ཨུའི་ཧྲུའུ་ཅི་རྡོ་བྷ་ཡིས་བཤད་རྒྱུར། ལོ་རེའི་སྡོང་འཛུགས་བྱ་འགུལ་ལ་དོན་སྙིང་གལ་ཆེན་ལྡན་པ་སྟེ། ལས་བྱེད་པ་དང་མང་ཚོགས་ཀྱི་འབྲེལ་བ་དམ་ཟབ་དུ་བཏང་བ་མ་ཟད། སྡོང་འཛུགས་ནགས་སྐྲུན་དང་ཐཱན་ཉུང་འཚོ་བའི་དོན་སྙིང་སོགས་ཀྱི་འདུ་ཤེས་ཇེ་མཐོར་བཏང་བ་དང་། དོན་དངོས་འགུལ་སྐྱོད་ལ་བསྟེན་ནས་རང་ཞང་གི་སྐྱེ་ཁམས་འཛུགས་སྐྲུན་སྐུལ་འདེད་གང་ལེགས་བྱས་ཟེར།
སྐྱེ་ཁམས་དང་རང་བྱུང་མཛེས་ལྗོངས་ཟུང་འབྲེལ་བྱས་ཏེ། ཀ་རིང་ཞང་གིས་ཞང་སྡེའི་ཡུལ་སྐོར་འཕེལ་རྒྱས་སུ་བཏང་བ་དང་། སྡེ་མི་རྣམས་དབུལ་ཐར་ཕྱུག་འགྱུར་གྱི་ལམ་ལ་ཁྲིད་པ་རེད། སྡོང་འཛུགས་བྱ་འགུལ་ལས་སྡེ་བའི་ཕྱིའི་ཁོར་ཡུག་ལེགས་བཅོས་བཏང་བ་མ་ཟད། སྐྱེ་ཁམས་ཁོར་ཡུག་ལ་སྲུང་སྐྱོབ་བྱས་པ་དང་མཛེས་པའི་ཀ་རིང་འཛུགས་སྐྲུན་བྱེད་པར་བླ་མེད་ཀྱི་ནུས་པ་བཏོན་པ་རེད།
ཀ་རིང་ཞང་ཏང་ཨུའི་དྲུང་ཡིག་གཅོད་པ་སྐྱབས་ཀྱིས་བཤད་རྒྱུར། སྡོང་འཛུགས་བྱེད་པ་ནི་སྤྱི་དམངས་ཡོངས་ཀྱི་འོས་འགན་ཞིག་ཡིན་ལ། ཞང་སྡེའི་ལས་བྱེད་པའི་འོས་འགན་དེ་ལས་ཀྱང་ཡིན་པ་རེད། སྡོང་འཛུགས་ནགས་སྐྲུན་བྱས་ཏེ་ལྗང་མདོག་མཛེས་སྡུག་གི་ཁོར་ཡུག་སྐྲུན་རྒྱུ་དེ་སྲོལ་རྒྱུན་ལྟ་བུར་གྱུར་ཡོད་པ་དང་། དེས་སྔར་ལས་ལྷག་པའི་སྒོ་ནས་མི་ཡོངས་ཀྱི་ལྗང་མདོག་འདུ་ཤེས་དང་དཔལ་ཡོན་སྤུས་ཚད་མཐོར་འདེགས་གཏོང་ཐུབ་ལ། རི་ལྗང་ཆུ་དྭངས་གསེར་རི་དངུལ་རི་ཡིན་པ་གསལ་བཤད་བྱས་ཡོད་ཟེར།
