ཞིང་ཆེན་དམངས་སྲིད་ཐིན་གྱིས་བསྒྲགས་པའི་གནས་ཚུལ་ལྟར་ན། སྔར་ལས་མང་པོའི་ཆ་རྐྱེན་དང་མཐུན་པའི་གྲོང་གསེབ་འགྲོ་སོང་རང་བཞིན་གྱི་དབུལ་ཕོངས་ཁྱིམ་ཚང་སྤྱི་ཚོགས་རྒུད་སྐྱོབ་ཁྱབ་ཁོངས་སུ་འཇོག་ཆེད། ཞིང་ཆེན་དམངས་སྲིད་ཐིན་དང་ནོར་སྲིད་ཐིན། སྨན་བཅོས་འགན་སྲུང་ཅུའུ། སློབ་གསོ་ཐིན་བཅས་ཀྱིས་མཉམ་འབྲེལ་སྒོས་མཚོ་སྔོན་ཞིང་ཆེན་གྲོང་གསེབ་འགྲོ་སོང་རང་བཞིན་གྱི་དབུལ་ཕོངས་ཁྱིམ་ཚང་གཏན་འཁེལ་བྱེད་ཐབས་འགྲེམ་སྤེལ་བྱས་ཏེ། གྲོང་གསེབ་འགྲོ་སོང་རང་བཞིན་གྱི་དབུལ་ཕོངས་ཁྱིམ་ཚང་གཏན་འཁེལ་ཚད་གཞི་དང་ཞིབ་བཤེར་ཆོག་མཆན་འགོད་པའི་གོ་རིམ། རྒུད་སྐྱོབ་སྲིད་ཇུས། བྱ་བའི་དོ་དམ་ཐད་ལ་ལམ་ལུགས་འཛུགས་པ་དང་བཀོད་སྒྲིག་བྱས།
བྱེད་ཐབས་ལས་གྲོང་གསེབ་འགྲོ་སོང་རང་བཞིན་གྱི་ཁྱིམ་ཚང་ལ་ཡུན་རིང་འགྲོ་སོང་རང་བཞིན་གྱི་དབུལ་ཕོངས་ཁྱིམ་ཚང་དང་ཐེངས་གཅིག་འགྲོ་སོང་རང་བཞིན་གྱི་དབུལ་ཕོངས་ཁྱིམ་ཚང་རིགས་གཉིས་སུ་བགར་རྒྱུ་དང་། ཆ་རྐྱེན་དང་མཐུན་པའི་དབུལ་ཕོངས་ཁྱིམ་ཚང་གིས་རེ་ཞུ་བྱས་ཆོག ཡུན་རིང་འགྲོ་སོང་རང་བཞིན་གྱི་དབུལ་ཕོངས་ཁྱིམ་ཚང་ལ་རང་ཞིང་གིས་དབུལ་ཕོངས་སུ་གྱུར་བའི་རྒྱུ་རྐྱེན་གཞིར་བཟུང་སྟེ་སྨན་བཅོས་དང་སློབ་གསོ། སྡོད་ཁང་སོགས་ཆེད་སྤྱོད་རྒུད་སྐྱོབ་དང་གནས་སྐབས་རྒུད་སྐྱོབ་བྱེད་རྒྱུ་དང་། རྒུད་སྐྱོབ་བྱས་རྗེས་སྔར་བཞིན་དབུལ་ཕོངས་ཡིན་པའི་ཁྱིམ་ཚང་དེ་ཆ་རྐྱེན་དང་མཐུན་ན་ཆེས་དམའ་བའི་འཚོ་བའི་འགན་སྲུང་ཁྱབ་ཁོངས་སུ་འཇོག་ངེས་རེད། ཐེངས་གཅིག་འགྲོ་སོང་རང་བཞིན་གྱི་དབུལ་ཕོངས་ཁྱིམ་ཚང་ལ་དབུལ་ཕོངས་སུ་གྱུར་བའི་རྒྱུ་རྐྱེན་ལྟར་སྨན་བཅོས་དང་སློབ་གསོ། སྡོད་ཁང་སོགས་ཆེད་སྤྱོད་རྒུད་སྐྱོབ་བྱེད་རྒྱུ་དང་། གནས་སྐབས་ཀྱི་རྒུད་སྐྱོབ་ཤུགས་ཚད་ཇེ་ཆེར་བཏང་ནས་དེའི་གཞི་རྩའི་འཚོ་བ་འགན་སྲུང་བཟང་བོ་བྱེད་རྒྱུ་རེད།
ལོ་ཙཱ་བ། བཀྲ་ཤིས་འབུམ།
