ཉོ་ཚོང་ཁོར་ཡུག་ཉིན་བཞིན་གཏན་འཇགས་སུ་སོང་བ་དང་བསྟུན་ནས། སྒོ་ཁྲལ་སྡེ་ཁག་སོགས་སྲིད་གཞུང་སྡེ་ཁག་གིས་གཏན་འབེབས་བྱས་པའི་སྲིད་ཇུས་ཀྱི་བྱེད་ནུས་འོག མཚོ་སྔོན་གྱི་འཁེལ་འཐག་ལས་རིགས་ལ་གསར་གཏོད་དང་སྤུས་ཚད་མཉམ་བསྲེས་བྱས་པའི་འཕེལ་རྒྱས་ཀྱི་རྣམ་པ་བཟང་བོ་གྲུབ་ཡོད། སྒོ་ཁྲལ་སྡེ་ཁག་གིས་བསྡོམས་རྩིས་བྱས་པ་ལྟར་ན། ད་ལོའི་ཟླ་དང་པོ་ནས་ཟླ་ལྔ་བའི་བར་དུ། མཚོ་སྔོན་ཞིང་ཆེན་གྱི་འཁེལ་འཐག་རྒྱུ་སྤུན་དང་བཏགས་དངོས། ཐོན་རྫས་བཅས་ཀྱི་ཕྱིར་གཏོང་གི་ཚད་སྒོར་དུང་ཕྱུར་གཅིག་དང་བྱེ་བ་གཅིག་ལ་སླེབས་ནས། ལྡབ་གཅིག་དང་གྲངས་ཆུང་གཉིས་འཕར་ཏེ་མཚོ་སྔོན་གྱི་ཕྱིར་གཏོང་གི་ཚོང་རྫས་ཨང་དང་པོར་གྱུར་བ་དང་། དུས་མཉམ་གྱི་མཚོ་སྔོན་གྱི་ཕྱིར་གཏོང་བསྡོམས་འབོར་གྱི་བརྒྱ་ཆའི་ཉེར་གསུམ་ཟིན་ཡོད། དེའི་ནང་། ས་གདན་ཕྱིར་གཏོང་མ་དངུལ་སྒོར་བྱེ་བ་གསུམ་དང་ས་ཡ་བདུན་འབུམ་དགུ་ཁྲི་གཉིས་སྟོང་གཅིག་ལ་སླེབས་ནས། དུས་མཉམ་ལས་བརྒྱ་ཆའི་སོ་ལྔ་དང་གྲངས་ཆུང་དགུ་འཕར་སྣོན་བྱུང་ཡོད།
ཧྲིན་ཡོན་ས་གདན་སྡེ་ཚོགས་ཚད་ཡོད་ཀུང་ཟིའི་ལས་བཟོ་བ་པའེ་ཀུན་ཞུང་གིས་བཤད་རྒྱུར། ཟླ་དྲུག་པའི་ཚེས་ཉེར་བརྒྱད་ཉིན། ནུབ་མཚོའི་སྒོ་ཁྲལ་སྡེ་ཁག་གིས་སྐུད་ཐོག་གི་མ་ལག་བརྒྱུད་དེ་མཚོ་སྔོན་ཧྲིན་ཡོན་ས་གདན་ཕྱིར་གཏོང་ནང་འདྲེན་ཚད་ཡོད་ཀུང་ཟིས་ཕྱིར་གཏོང་བྱས་པའི་ལུག་བལ་གྱི་ས་གདན་སྐོར་ཞིག་ལ་ཐོག་མའི་ཐོན་ཡུལ་གྱི་དཔང་ཡིག་བྱིན་པ་དེས་རིན་ཐང་སྒོར་འབུམ་གསུམ་དང་ཁྲི་དགུ་སྟོང་ལྔ་ཡིན་པའི་ལུག་བལ་གྱི་ས་གདན་དེ་དག་ལ་གཞུང་ཕྱོགས་ཀྱིས་བྱིན་པའི་ཐོག་མའི་ཐོན་ཡུལ་གྱི་དཔང་ཡིག་ཡོད་པར་བྱས། མདོ་དབུས་མཐོ་སྒང་ནས་ཡོང་བའི་ཞིང་ཕྱུགས་ཐོན་རྫས་ལ་རང་བྱུང་དང་ལྗང་མདོག་གི་མིང་བྱང་གྲགས་ཅན་ཡོད་པར་བྱས་པའི་དཔང་ཡིག་དེས་ཕྱི་རྒྱལ་གྱི་ཚོང་བ་རྣམས་ཀྱིས་མཚོ་སྔོན་གྱི་ས་གདན་ཐད་ཀྱི་ཡིད་ཆེས་ཇེ་ཟབ་ཏུ་བཏང་བ་དང་། ཐོན་རྫས་ཀྱི་ཕྱིར་གཏོང་རྒྱ་བསྐྱེད་པར་ཕན་བཏགས་པར་མ་ཟད། ཕྱི་རྒྱལ་གྱི་ཚོང་བའི་བར་ཚོང་ལས་མཉམ་ལས་གཏིང་ཟབ་ཏུ་སྤེལ་བར་སྐུལ་འདེད་ཀྱི་ནུས་པ་ཆེན་པོ་བཏོན་ཟེར།
ཁྲོམ་རའི་དགོས་མཁོར་གཞིགས་ན། རང་སོ་སོའི་ཁྱད་ཆོས་ལྟར་འཐག་པའི་རྣམ་པར་ཕྱི་རྒྱལ་གྱི་ཁྲོམ་རས་དགའ་བསུ་ཆེན་པོ་བྱེད་བཞིན་ཡོད། པའེ་ཀུན་ཞུང་གི་བཤད་རྒྱུར། ང་ཚོས་རང་གི་ཁྱད་ཆོས་ལྟར་འཐག་པའི་ལུག་བལ་ས་གདན་ལ་ཁྲོམ་རའི་སྟེང་དགའ་བསུ་ཆེན་པོ་ཐོབ་བཞིན་ཡོད་པ་དང་། རྒྱུན་མཐུད་ཀྱི་ཚོང་ཟོག་མངག་ཐོ་ཡིས་ཐོན་སྐྱེད་ཀྱི་མུ་འབྲེལ་རང་བཞིན་ལ་འགན་སྲུང་བྱས་ལ། མིག་སྔར་གྱི་ཚོང་ཟོག་མངག་ཐོར་གཞིགས་ན། ད་ལོའི་ལོ་ཧྲིལ་བོའི་ས་གནས་ཕྱིར་གཏོང་མ་དངུལ་ཚད་ཆེན་པོས་ཇེ་མང་དུ་འགྲོ་ངེས་རེད་ཟེར།
ཉེ་བའི་ལོ་འགའི་རིང་ལ། འགྲན་རྩོད་ཀྱི་དགེ་མཚན་སྲུང་འཛིན་བྱེད་པ་དང་། ཕྱི་རྒྱལ་གྱི་ཁྲོམ་ར་རྒྱ་བསྐྱེད་པའི་ཆེད་དུ། མཚོ་སྔོན་ཞིང་ཆེན་གྱི་གཙོ་ཁྲིད་ཁེ་ལས་བཅུ་ལྷག་གིས་རང་སོ་སོའི་ཁྱད་ཆོས་ལྡན་དགོས་པའི་དཀའ་གནད་ཐག་གཅོད་པ་དང་། ཚན་རྩལ་ཇུས་འགོད་ཀྱི་བྱེད་ཐབས་སྤྱོད་ཤུགས་ཆེ་རུ་གཏོང་བ། འཁེལ་འཐག་ལག་རྩལ་ལེགས་བཅོས་བྱེད་པ་སོགས་ཐད་ནས་ལེགས་བཅོས་ཆེན་པོ་འབྱུང་བར་འབད་པ་བྱེད་བཞིན་ཡོད།
མཚོ་སྔོན་ཧི་མ་ལ་ཡ་ས་གདན་ཚད་ཡོད་ཀུང་ཟིའི་སྤྱི་གཉེར་བ་ལིང་མེང་ཧེ་ཡིས་ལུག་བལ་གཙང་མའི་ས་གདན་འདི་དག་ནི་ཞིབ་འཇུག་གསར་སྤེལ་བྱས་མ་ཐག་པའི་ཐོན་རྫས་གསར་པ་ཡིན་ལ། ཕྱིར་གཏོང་བྱས་མ་ཐག་ཕྱི་རྒྱལ་གྱི་ཚོང་བ་དག་གི་དགའ་བསུ་ཆེན་པོ་ཐོབ་ཅེས་བཤད། པྲོག་གསར་གློ་ཚད་རིམས་ནད་བྱུང་རྗེས། ཁེ་ལས་ཀྱིས་སྲིད་གཞུང་གི་རོགས་སྐྱོར་ཆེན་པོའི་འོག དུས་ཐོག་ཏུ་བྱེད་ཐབས་ལེགས་སྒྱུར་བྱས་པ་དང་། ཚན་ཞིབ་ཤུགས་ཚད་ཆེ་རུ་བཏང་སྟེ་རྒྱལ་སྤྱིའི་ཁྲོམ་རས་དགའ་བསུ་ཐོབ་པའི་ཐོན་རྫས་གསར་པ་མང་པོ་ཞིབ་འཇུག་གསར་སྤེལ་བྱས་པ་དང་། ན་ནིང་གི་ལོ་སྨད་ཀྱི་ཚུན་ལ་ཚོང་ཟོག་མངག་ཐོ་བྱེད་མཁན་རྒྱུན་མཐུད་ངང་ཇེ་མང་དུ་འགྲོ་བཞིན་ཡོད།
ལྷ་མོ་ཚེ་རིང་གིས་བསྒྱུར།
