ཟླ་དགུ་བའི་ཚེས་བཅོ་བརྒྱད་ཉིན། གསར་འགོད་པས་མཚོ་སྔོན་ཞིང་ཆེན་བདེ་འཇགས་ཐོན་སྐྱེད་ཨུ་ཡོན་ལྷན་ཁང་གཞུང་སྒྲུབ་ཁང་ནས་རྒྱུས་ལོན་བྱུང་བ་ལྟར་ན། ཞིང་ཆེན་བདེ་འཇགས་ཐོན་སྐྱེད་ཨུ་ཡོན་ལྷན་ཁང་གིས་ཞིང་ཆེན་ཡོངས་ཀྱི་རྡོ་སོལ་གཏེར་ཁུངས་དང་ཉེན་ཁ་ཆེ་བའི་རྫས་འགྱུར། མེ་འགོག་མེ་གསོད་སོགས་ཁྱབ་ཁོངས་གཙོ་བོའི་བདེ་འཇགས་ཐོན་སྐྱེད་བྱ་བར་ཁྱོན་ཡོངས་ནས་བཀོད་སྒྲིག་བྱས་པ་དང་། བརྙན་འཕྲིན་ཁ་པར་གྲོས་ཚོགས་བསྡུས་པ་དང་ཁྱབ་ཁོངས་གཙོ་བོའི་ཆེད་དོན་ཞིབ་བཤེར་སྤེལ་བ་སོགས་རྣམ་པ་བརྒྱུད་དེ། བདེ་འཇགས་ཐོན་སྐྱེད་ཀྱི་བྱ་བ་སྣ་ཚོགས་བཟང་བོར་བསྒྲུབ་ནས། སྟོབས་ཤུགས་ཡོད་རྒུས་ཟླ་མཆོད་དུས་ཆེན་དང་རྒྱལ་སྟོན་དུས་ཆེན་གཉིས་སྐབས་ཀྱི་ཞིང་ཆེན་ཡོངས་ཀྱི་བདེ་འཇགས་ཐོན་སྐྱེད་གཏན་འཇགས་སུ་གཏོང་བར་ཁག་ཐེག་བྱས།
ཞིང་ཆེན་ཡོངས་ཀྱིས་ཆུ་གནོད་ཀྱི་འཇིགས་སྐུལ་དང་རྙོག་འཛིང་ཆེ་བའི་རྡོ་སོལ་གཏེར་ཁུངས་ལ་བརྟག་བཤེར་བྱས་པ་དང་། ཁེ་ལས་ཀྱིས་བདེ་འཇགས་ཐོན་སྐྱེད་ཀྱི་གཙོ་གཞི་འགན་འཁྲི་ལག་བསྟར་བྱེད་པར་སྐུལ་འདེད་བཏང་སྟེ། ཁྲིམས་འགལ་སྒྲིག་འགལ་སྤྱོད་ཚུལ་ལ་མཐའ་གཅིག་ཏུ་རྡུང་རྡེག་བྱས། ཞིང་ཆེན་ཡོངས་ཀྱི་ཁྱབ་ཁོངས་ནས་ཉེན་ཁ་ཆེ་བའི་རྫས་འགྱུར་ཐོན་རྫས་ཁེ་ལས་ཀྱི་བདེ་འཇགས་ཐོན་སྐྱེད་ཀྱི་གཙོ་གཞི་འགན་འཁྲི་ལག་བསྟར་གནས་ཚུལ་དང་ཉེན་ཁ་ཆེན་པོའི་འགོ་ཁུངས་ལྟ་སྐུལ་དོ་དམ་གནས་ཚུལ་གྱི་ཆེད་དོན་ཞིབ་བཤེར་བྱ་བ་སྤེལ། མེ་འགོག་མེ་གསོད་བདེ་འཇགས་ཉེན་ཁ་རྟོག་སེལ་བཅོས་སྐྱོང་སྤེལ་བ་དང་། ཤོག་སྦག་ཉར་གསོག་དང་ཉོ་ཚོང་། ཤོག་སྦག་སྦར་བ་སོགས་ཐད་ཀྱི་བདེ་འཇགས་ལྟ་སྐུལ་དོ་དམ་དམ་འཛིན་བྱས། དེ་དང་མཉམ་དུ། གནོད་འཚེ་ཉེན་ཁ་བརྟག་བཤེར་དང་ཉེན་ཁ་རྟོག་སེལ་ལ་ཤུགས་བསྣན་པ་དང་། གནོད་འཚེ་ཉེན་ཁའི་བཟོ་སྐྲུན་བཅོས་སྐྱོང་དང་ཉེན་ཁ་མེད་པར་བྱེད་པའི་བྱ་བ་སྤེལ་ཤུགས་ཇེ་ཆེར་བཏང་ལ། རོགས་སྐྱོར་དཔུང་སྡེ་དང་དངོས་ཟོག་ཉར་གསོག་ལག་བསྟར་བྱས་ནས། གནད་འགག་སྐབས་སུ་དངོས་ཟོག་བཀོལ་རྒྱུ་ཡོད་པ་དང་བཀོལ་སྤྱོད་བྱེད་ཐུབ་པར་ཁག་ཐེག་བྱས།
ངོ་སྤྲོད་ལྟར་ན། དུས་ཆེན་གཉིས་སྐབས་སུ། ཞིང་ཆེན་བདེ་འཇགས་ཐོན་སྐྱེད་ཨུ་ཡོན་ལྷན་ཁང་གིས་བདེ་འཇགས་འགོག་སྲུང་བྱ་བའི་ཐད་ནས་དམིགས་བསལ་རེ་བ་བཏོན་ནས། འབྲེལ་ཡོད་ཁེ་ལས་ཀྱིས་ལས་རེས་སྐབས་ཀྱི་སྒྲིག་ལམ་ཇེ་དྲག་ཏུ་གཏོང་བ་དང་། འགོ་ཁྲིད་ལས་བྱེད་པས་འགོ་ཁྲིད་དེ་ལས་རྐང་སྟེང་ལས་ཀ་བསྒྲུབ་པ་དང་། གནད་འགག་ལས་རྐང་ཐད་ནས་དུས་ཚོད་ཉེར་བཞིའི་ལས་རེས་ལམ་ལུགས་དང་དོན་རྐྱེན་ཆ་འཕྲིན་སྙན་ཞུ་ལམ་ལུགས་ལག་བསྟར་ནན་མོ་བྱེད་པ། བདེ་འཇགས་བྱེད་ཐབས་ལག་བསྟར་བྱེད་པར་ལྟ་སྐུལ་བྱེད་པ། དུས་ཆེན་སྐབས་ཀྱི་ཚོད་ལྟའི་ཐོན་སྐྱེད་བྱ་འགུལ་ལ་ཚོད་འཛིན་བྱེད་པ། གློ་བུར་བྱུང་བའི་གནོད་འཚེ་དོན་རྐྱེན་བྱུང་ཚེ་དུས་ཐོག་དང་ཚན་རིག་དང་མཐུན་པ། ཕན་འབྲས་ལྡན་པའི་སྒོ་ནས་ཁ་གཏད་འཇལ་བར་ཁག་ཐེག་བྱེད་པ་དང་། ཉེན་ཁ་ཆེན་པོ་བཀག་འགོག་བྱེད་པ་དང་ཅུང་ཆེ་བའི་ཡན་གྱི་ཐོན་སྐྱེད་བདེ་འཇགས་དོན་རྐྱེན་འབྱུང་བར་བཀག་འགོག་བྱས་ནས། མི་དམངས་མང་ཚོགས་ཀྱི་བདེ་འཇགས་ངང་ཟླ་མཆོད་དུས་ཆེན་དང་རྒྱལ་སྟོན་དུས་ཆེན་རོལ་བར་འགན་སྲུང་བྱེད་དགོས་པའི་རེ་བ་བཏོན།
རིན་ཆེན་མཚོས་བསྒྱུར།
