2021ལོར། ཞིང་ཆེན་ཞིང་ལས་ཞིང་སྡེ་ཐིན་དང་འབྲེལ་ཡོད་སྡེ་ཁག་གཉིས་ཀྱིས་གཞོགས་འདེགས་དམ་ཟབ་བྱས་པ་དང་། ཞིང་སྤྱོད་དངོས་རྫས་ཆོག་འཐུས་དང་ཐོན་སྐྱེད། ཚོང་གཉེར་སོགས་དུས་རིམ་གྱི་ལྟ་སྐུལ་དོ་དམ་ལ་ཁྱོན་ཡོངས་ནས་ཤུགས་བསྣན་ལ། ཁྲིམས་དང་འགལ་ནས་ཞིང་སྤྱོད་དངོས་རྫས་རྫུན་མ་བཟོ་སྐྲུན་དང་ཉོ་འཚོང་བྱེད་པའི་སྤྱོད་ཚུལ་ལ་རྡུང་རྡེག་ནན་མོ་བྱས་ནས། ཞིང་སྤྱོད་ཐོན་རྫས་ཀྱི་སྤུས་ཚད་མཐོར་འདེགས་བཏང་བ་དང་། ཕྱུགས་སྨན་དང་སྐྱེ་ལྡན་ལུད་རྫས། གཟན་རྩྭའི་ཐོན་རྫས་ཀྱི་འཐེན་ཞིབ་ཚད་ལྡན་ཚད་སོ་སོར་བརྒྱ་ཆའི་དགུ་བཅུ་ལྷག་དང་བརྒྱ་ཆའི་དགུ་བཅུ། བརྒྱ་ཆའི་གོ་བདུན་ཡིན་ལ། དེ་ལོ་སྔོན་མ་དག་དང་བསྡུར་ན་ཇེ་མཐོར་སོང་ལ། ནས་དང་སྐེ་ཚེ་སོགས་ཀྱི་ས་བོན་གྱི་སྤུས་ཚད་ཞིབ་དཔྱད་ཚད་ལྡན་ཚད་རྒྱུན་མཐུད་ངང་བརྒྱ་ཆའི་གོ་བརྒྱད་ཡན་དུ་རྒྱུན་འཁྱོངས་བྱས་ཏེ། ལོ་ཧྲིལ་བོའི་འབྲུ་རིགས་དང་ཞིང་ལས་ཐོན་རྫས་གལ་ཆེན་ཐད་ནས་འབྲས་བུ་གཡུར་དུ་ཟ་བ་ལེན་པར་འགན་སྲུང་གལ་ཆེན་འདོན་སྤྲོད་བྱས།
ལོ་གཅིག་རིང་། ཞིང་ཆེན་ཡོངས་ཀྱི་ཞིང་སྤྱོད་དངོས་རྫས་ཚོང་ལ་བསྡོམས་པས་སྐོར་ཞིབ་ཞིབ་བཤེར་ཐེངས་སུམ་བརྒྱ་དང་ཉེར་གསུམ་བྱས་པ་དང་། ཁྲིམས་འཛིན་མི་སྣ་དགུ་བརྒྱ་དང་བཅུ་བཞི་བཀོད་སྒྲིག་བྱས་ལ། ཞིང་སྤྱོད་དངོས་རྫས་ཚོང་གཉེར་ཚོང་ཁང་དང་ཁེ་ལས་བརྒྱད་བརྒྱ་དང་སོ་དྲུག་ལ་ཞིབ་བཤེར་བྱས་པ་དང་། ཞིང་སྤྱོད་ཐོན་རྫས་ལྔ་བརྒྱ་དང་གྱ་གསུམ་ལ་འཐེན་ཞིབ་བྱས། ཞིང་ཆེན་རིམ་པའི་སྡེ་ཁག་གིས་ལྟ་སྐུལ་ཚན་ཆུང་གཉིས་བཙུགས་ནས། སྔ་གཞུག་ཏུ་གྲོང་ཁྱེར་དང་ཁུལ་དྲུག་དང་རྫོང་དང་གྲོང་ཁྱེར་བཅོ་བརྒྱད་ཀྱི་སྐྱེ་ལྡན་ལུད་རྫས་ཐོན་སྐྱེད་ཁེ་ལས་རེ་གཉིས་དང་ཞིང་སྤྱོད་དངོས་རྫས་ཚོང་གཉེར་ཁེ་ལས། ས་བོན་ཐོན་སྐྱེད་ཚོང་གཉེར་ཀུང་ཟི། ནོར་ལུག་གཞི་ཁྱོན་གསོ་སྤེལ་མཉམ་ལས་ཁང་བཅས་ལ་སོང་ནས་སྐོར་ཞིབ་ལྟ་སྐུལ་བྱ་བ་སྤེལ་ནས། བསྡོམས་པས་སྔོ་ཚལ་གྱི་སྤུས་ཞན་སོན་སྣ་ཉེར་དགུ་རྩད་ཆོད་པ་དང་། དུས་ཚོད་བརྒལ་བའི་སྐྱེ་ལྡན་ལུད་རྫས་སྤྱི་རྒྱ་དྲུག་བརྒྱར་བཀག་སྡོམ་ཉར་ཚགས་བྱས་ལ། ཞིང་ཆེན་ཡོངས་སུ་ནོར་ལུག་རང་དགར་དུ་བཤའ་བ་དང་ཕྱུགས་སྨན་རྫུན་མ་དང་སྤུས་ཞན་ཕྱུགས་སྨན་ཐོན་སྐྱེད་ཚོང་གཉེར་བྱེད་པ་སོགས་ཀྱི་གྱོད་གཞི་རེ་དགུ་ལ་ཞིབ་བཤེར་རྩད་གཅོད་བྱས་པ་དང་། བསྡོམས་པས་སྒོར་འབུམ་གཅིག་དང་ཁྲི་བརྒྱད་སྟོང་ལྔ་བརྒྱ་ཡིས་ཆད་པ་བཅད་དེ། ཞིང་སྤྱོད་དངོས་རྫས་རྫུན་མ་བཟོ་བ་དང་བཙོང་བའི་སྤྱོད་ཚུལ་ལ་རྡུང་རྡེག་བཏང་།
2022ལོར། ཞིང་ཆེན་ཡོངས་ཀྱི་ཞིང་སྤྱོད་དངོས་རྫས་རྫུན་མ་བཟོ་བ་དང་བཙོང་བར་རྡུང་རྡེག་བྱེད་པའི་བྱ་བའི་ཐད་ནས་ཞིང་སྤྱོད་དངོས་རྫས་ཚོང་ར་ཇེ་གཙང་དུ་གཏོང་བ་གཙོ་ཐིག་ཏུ་བྱེད་པ་དང་། ཞིང་བའི་ཁེ་ཕན་ལ་སྲུང་སྐྱོབ་བྱེད་པ་རྩ་བར་བྱེད་པ། རྩ་ལག་མཉམ་བཅོས་དང་རྡུང་འགོག་ཟུང་འབྲེལ་བྱེད་པ། ཁོངས་གཏོགས་ས་ཁུལ་གྱི་དོ་དམ་ལ་ཤུགས་སྣོན་པ་རྒྱུན་འཁྱོངས་བྱེད་པ། ཞིང་སྤྱོད་དངོས་རྫས་རྫུན་མས་ཞིང་ལས་ཐད་གནོད་པ་བཟོ་བའི་ཁྲིམས་འགལ་སྤྱོད་ཚུལ་སྣ་ཚོགས་ལ་རྡུང་རྡེག་བྱེད་པ། གྱོད་གཞི་ཆེན་པོའི་ཞིབ་བཤེར་རྩད་གཅོད་བྱེད་ཤུགས་ཇེ་ཆེར་བཏང་སྟེ། ཞིང་ཆེན་ཡོངས་ཀྱི་འབྲུ་རིགས་འདེབས་འཛུགས་རྒྱ་ཁྱོན་མུའུ་ས་ཡ་བཞི་དང་འབུམ་བཞི་ཁྲི་བཞི་སྟོང་གསུམ་ཡན་དང་། འབྲུ་རིགས་ཐོན་ཚད་ཏུན་ས་ཡ་གཅིག་དང་ཁྲི་བདུན་གྱི་ཡན་དུ་རྒྱུན་འཁྱོངས་བྱེད་པའི་ཐད་ཤུགས་ཡོད་འགན་སྲུང་འདོན་སྤྲོད་བྱེད་རྒྱུ་རེད།
རིན་ཆེན་མཚོས་བསྒྱུར།
