རིམས་ནད་འགོག་སྡོམ་གྱི་དྲ་མིག་ཅན་གྱི་དོ་དམ་ཇེ་དྲག་ཏུ་གཏོང་བ་དང་། གཞིས་ཁུལ་གྱི་འགོག་སྡོམ་བྱ་བའི་འགན་འཁྲི་གཏན་ཁེལ་གསལ་བོ་བྱེད་པ། རིམས་ནད་འགོག་སྡོམ་བྱ་བའི་རྨང་གཞི་ཇེ་བརྟན་དུ་གཏོང་བ། ཞིང་ཆེན་ཡོངས་ཀྱི་རིམས་ནད་འགོག་སྡོམ་གྲུབ་འབྲས་སྲ་བརྟན་དུ་གཏོང་བ་དང་མཐོར་འདེགས་སུ་གཏོང་ཆེད། ཉེ་ལམ། མཚོ་སྔོན་ཞིང་ཆེན་རིམས་ནད་འགོ་སྡོམ་ཐག་གཅོད་བྱ་བའི་བཀོད་འདོམས་པུའུ་ཡིས་རིམས་མེད་གཞིས་ཁུལ་དང་སྡེ་བ་འཛུགས་སྐྲུན་བྱེད་པའི་འགུལ་སྐྱོད་སྤེལ་བའི་སྐོར་གྱི་བརྡ་སྦྱོར་འགྲེམ་སྤེལ་བྱས་ནས། རྫོང་དང་གྲོང་ཁྱེར། ས་ཁུལ། སྲིད་འཛིན་ཨུ་ཡོན་ལྷན་ཁང་བཅས་སྡེ་ཁག་ཏུ་བྱས་ཏེ། ཞིང་ཆེན་ཡོངས་ཀྱི་ཁྱབ་ཁོངས་ཀྱི་གཞིས་ཁུལ་དང་སྡེ་བ་རུ་རིམས་མེད་གཞིས་ཁུལ་དང་སྡེ་བ་འཛུགས་སྐྲུན་བྱེད་པའི་འགུལ་སྐྱོད་སྤེལ་རྒྱུ་ཐག་བཅད།
བརྡ་སྦྱོར་ནང་། རིམས་ནད་གཞིས་ཁུལ་དང་སྡེ་བ་འཛུགས་སྐྲུན་བྱེད་པའི་འགུལ་སྐྱོད་ཀྱིས་འགོ་ཁུངས་ནས་འགོག་སྡོམ་བྱེད་པ་དང་ཁོངས་གཏོགས་ས་ཆས་དོ་དམ་བྱེད་པ། ཏང་འཛུགས་ཀྱིས་སྣེ་ཁྲིད་བྱེད་པ། དམངས་ཡོངས་ཟབ་ཞུགས་བྱེད་པ། གཅིག་གྱུར་འཆར་འགོད་དང་ཕྱོགས་ཡོངས་ལྟ་རྟོག་བྱེད་པ་དང་གོ་དོན་མཐིལ་རྟོགས་བྱེད་པའི་བྱ་བའི་རྩ་དོན་རྒྱུན་འཁྱོངས་བྱེད་དགོས། རིམས་ནད་འགོག་སྡོམ་རྩ་འཛུགས་ལས་ཁུངས་འཐུས་ཚང་དུ་གཏོང་བ་དང་རིམས་ནད་ནད་དཔེ་གཙང་སེལ་རྣམ་པ་རྒྱུན་འཁྱོངས་བྱེད་པ། རིམས་ནད་འགོག་སྡོམ་བྱེད་ཐབས་ལག་བསྟར་ནན་མོ་བྱེད་པ། མངའ་ཁོངས་ས་ཆའི་ཁོར་ཡུག་གཙང་སྦྲ་དང་དུག་སེལ་ཚད་ལྡན་ཡིན་པ། མངའ་ཁོངས་ས་ཆའི་བདེ་ཐང་ཞབས་ཞུ་འགན་སྲུང་ཤུགས་དང་ལྡན་པ། མི་སྒེར་གྱི་བདེ་ཐང་གཙོ་གཞིའི་འགན་འཁྲི་ལག་བསྟར་བྱེད་པ། རིམས་ནད་འགོག་སྡོམ་དྲིལ་སྒྲོག་སྣང་ཚུལ་བཟང་བ་བཅས་ཀྱི་འཛུགས་སྐྲུན་ཚད་གཞི་བདུན་ལ་དམིགས་ནས་བྱ་བ་སྤེལ་དགོས་པའི་རེ་བ་བཏོན།
བརྡ་སྦྱོར་ནང་བསྟན་དོན། རིམས་མེད་གཞིས་ཁུལ་དང་སྡེ་བ་འཛུགས་སྐྲུན་འགུལ་སྐྱོད་ཀྱིས་གཞིས་ཁུལ་དང་སྡེ་བ་སྡེ་ཁག་ཏུ་བྱས་ནས་རང་འགུལ་སྒོས་ཡིག་ཐོག་སྙན་ཞུ་བྱེད་པ་དང་། ས་ཁུལ་དང་རྫོང་རིམ་པས་ཞིབ་དཔྱད་བྱེད་པ། གྲོང་ཁྱེར་རིམ་པས་དཔྱད་འཇོག་གཏན་ཁེལ་བྱེད་པ། ཞིང་ཆེན་རིམ་པས་ཐོ་འགོད་སྙན་སེང་བྱེད་པ། འགུལ་རྣམ་དོ་དམ་བྱེད་པ་བཅས་འཛུགས་སྐྲུན་གྱི་བརྒྱུད་རིམ་དུ་བྱས་ཏེ། གྲོང་ཁྱེར་དང་ཁུལ། རྫོང་སོ་སོའི་རིམས་ནད་འགོག་སྡོམ་བཀོད་འདོམས་པུའུ་ཡིས་སྡེ་ཁག་སོ་སོ་དང་མཉམ་དུ་རྩ་འཛུགས་ལག་བསྟར་བྱེད་དགོས། རིམས་མེད་གཞིས་ཁུལ་དང་སྡེ་བ་གཏན་ཁེལ་ངོས་ལེན་བྱས་རྗེས། ཞིང་ཆེན་རིམས་ནད་འགོག་སྡོམ་ཐག་གཅོད་བྱ་བའི་བཀོད་འདོམས་པུའུ་ཡི་མངོན་ཞིབ་དང་ལྐོག་བཤེར་གཉིས་ཟུང་འབྲེལ་བྱེད་པའི་རྣམ་པ་སྤྱད་དེ་རྒྱུན་རྣམ་ཅན་གྱི་ལྟ་ཞིབ་སྤེལ་བ་དང་། འཛུགས་སྐྲུན་གྱི་ཚད་གཞི་དང་མི་མཐུན་པའི་སྣང་ཚུལ་རྙེད་ཚེ། ཞིང་ཆེན་རིམས་ནད་འགོག་སྡོམ་ཐག་གཅོད་བྱ་བའི་བཀོད་འདོམས་པུའུ་ཡིས་གཏན་ཁེལ་ངོས་འཛིན་མེད་པར་བྱེད་རྒྱུ་ཡིན་པ་མ་ཟད། ཁོངས་གཏོགས་ས་ཆས་སྡེ་ཁག་སོ་སོའི་འགན་ཁུར་མི་སྣ་དང་མཉམ་དུ་དག་ཐེར་ལེགས་བཅོས་བྱེད་པར་ལྟ་སྐུལ་བྱེད་དགོས།
རིམས་མེད་གཞིས་ཁུལ་དང་སྡེ་བ་འཛུགས་སྐྲུན་འགུལ་སྐྱོད་བརྒྱུད་དེ། གཞིས་ཁུལ་དང་སྡེ་བའི་མང་ཚོགས་ཀྱི་རིམས་འགོག་བརྩོན་སེམས་ཆེར་སྐྱེད་པ་དང་། རིམས་ནད་འགོག་སྡོམ་གྱི་མི་སྣ་གཙོ་བོའི་ནུས་པ་འདོན་སྤེལ་བྱེད་པ། དམངས་ཡོངས་ཀྱི་འཕྲོད་བསྟེན་ནད་འགོག་འདུ་ཤེས་དང་བདེ་ཐང་འཚོ་བའི་འདུ་ཤེས། རང་ཉིད་འགོག་སྲུང་གི་འདུ་ཤེས་མཐོར་འདེགས་གཏོང་བ། རིམས་མེད་གཞིས་ཁུལ་དང་སྡེ་བའི་མི་ཚང་མ་ཟབ་ཞུགས་བྱེད་པ་དང་། རང་ཉིད་ནས་འགོ་རྩོམ་པའི་སྣང་ཚུལ་སྟུག་པོ་གྲུབ་པར་བྱེད་པ། མི་དང་དངོས་པོ། ཁོར་ཡུག་ཐད་ཀྱི་ཁྱོན་ཡོངས་འགོག་སྡོམ་ལག་བསྟར་བྱེད་པ། རིམས་ནད་ཕྱི་ནས་ནང་དུ་མི་མཆེད་པ་དང་སྡོད་དམངས་གཅིག་ལ་མི་འགོ་བ། བྱ་བའི་ཐད་ནས་ནོར་འཛོལ་མི་བྱུང་བ། གླེང་ཕྱོགས་དྲང་བ་མངོན་འགྱུར་བྱེད་པ་བཅས་བྱས་ནས། གཞིས་ཁུལ་དང་སྡེ་བའི་ཐོན་སྐྱེད་འཚོ་བའི་རྒྱུན་ལྡན་གྱི་སྒྲིག་ལམ་སྲུང་འཛིན་བྱེད་དགོས།
རིན་ཆེན་མཚོས་བསྒྱུར།
