ཉེ་སྔོན། མཚོ་སྔོན་ཞིང་ཆེན་འཕེལ་རྒྱས་བཅོས་སྒྱུར་ཨུ་ཡོན་ལྷན་ཁང་གིས་རྒྱལ་ཁབ་འཕེལ་རྒྱས་བཅོས་སྒྱུར་ཨུ་ཡོན་ལྷན་ཁང་ལ་ཡར་ཞུ་བརྗེ་རེས་བྱས་ཏེ། རྨ་ཆུའི་ཀྲུང་དབྱང་སྔོན་རྩིས་ནང་གི་ཆེད་སྤྱོད་མ་དངུལ་སྒོར་དུང་ཕྱུར་གསུམ་དང་བྱེ་བ་བདུན་ས་ཡ་ལྔ་བརྩོན་ལེན་བྱས་ནས་རྨ་ཆུའི་མཚོ་སྔོན་བཞུར་རྒྱུད་ཀྱི་ཆུའི་སྐྱེ་ཁམས་སྲུང་སྐྱོབ་སླར་གསོ་དང་ཆུའི་ཁོར་ཡུག་ཕྱོགས་བསྡུས་བཅོས་སྐྱོང་ལས་གཞིའི་ཐད་རྒྱབ་སྐྱོར་བྱས་པ་དང་། རྨ་ཆུ་ལ་མཐའ་གཅིག་ཏུ་སྲུང་སྐྱོབ་བྱས་ནས། རྒྱུན་མཐུད་ངང་མཚོ་སྔོན་གྱི་སྐྱེ་ཁམས་ཁོར་ཡུག་ཇེ་ལེགས་སུ་བཏང་།
ཞིང་ཆེན་འཕེལ་རྒྱས་བཅོས་སྒྱུར་ཨུ་ཡོན་ལྷན་ཁང་གིས་རྒྱལ་ཁབ་ཀྱི་མ་དངུལ་གཏོང་ཕྱོགས་ལ་དམིགས་ནས། རྨ་ཆུའི་འཆར་འགོད་སྲིད་ཇུས་ལག་བསྟར་བྱེད་རྒྱུ་དམ་འཛིན་བྱས་པ་དང་། ལས་གཞི་འཆར་འགོད་སྙན་ཞུ་གྲབས་གསོག་བྱེད་ཤུགས་ཇེ་ཆེར་བཏང་ལ། རི་ཆུ་ནགས་ཞིང་དང་མཚེའུ། རྩྭ་ས། བྱེ་དར་བཅས་གཞི་གཅིག་ཅན་གྱི་སྲུང་སྐྱོབ་དང་མ་ལག་བཅོས་སྐྱོང་ལ་སྐུལ་འདེད་བཏང་བ་དང་། སྐྱེ་ཁམས་བཅོས་སྐྱོང་མ་ལག་དང་བཅོས་སྐྱོང་ནུས་པ་དེང་རབས་ཅན་དུ་བསྒྱུར་ཞིང་། ཆུ་ཁུངས་བསྐྱིལ་གསོག་རྩོལ་ནུས་ཇེ་དྲག་ཏུ་བཏང་བ་དང་ས་ཆུ་སྲུང་འཛིན་ནུས་པ་མཐོར་འདེགས་བཏང་ལ། སྐྱེ་དངོས་སྣ་མང་རང་བཞིན་ལ་སྲུང་སྐྱོབ་བྱས་ཤིང་མི་དང་རང་བྱུང་ཁམས་འཆམ་མཐུན་ཡོང་བར་སྐུལ་འདེད་བཏང་བ་དང་། རྨ་ཆུའི་མཚོ་སྔོན་བཞུར་རྒྱུད་ཀྱི་སྐྱེ་ཁམས་མ་ལག་གི་རང་ཉིད་སླར་གསོ་ནུས་པ་མཐོར་འདེགས་བཏང་ཞིང་སྐྱེ་ཁམས་མ་ལག་གི་གཏན་འཇགས་རང་བཞིན་ཇེ་དྲག་ཏུ་བཏང་། སྐྱེ་ཁམས་མ་ལག་གི་རྩོལ་ནུས་མངོན་གསལ་སྒོས་མཐོར་འདེགས་བཏང་སྟེ། འགོག་ར་གཉིས་དང་ཁུལ་གསུམ་གྱི་སྐྱེ་ཁམས་བདེ་འཇགས་རྣམ་པ་གྲུབ་པར་སྐུལ་འདེད་བཏང་། ཐེངས་འདིར་བརྩོན་ལེན་བྱས་པའི་རྨ་ཆུའི་ཀྲུང་དབྱང་སྔོན་རྩིང་ནང་གི་ཆེད་སྤྱོད་མ་དངུལ་གྱིས་གཙོ་བོར་རྨ་ཆུའི་བཞུར་རྒྱུན་གཙོ་བོའི་ས་ཁུལ་མགོ་ལོག་ཁུལ་གྱི་ཆུའི་སྐྱེ་ཁམས་ཁོར་ཡུག་སྲུང་སྐྱོབ་སླར་གསོ་ལས་གཞི་དང་རྩེ་ཁོག་རྫོང་འབའ་ཆུའི་སྐྱེ་ཁམས་བཅོས་སྐྱོང་སོགས་ལས་གཞི་ལྔ་འཛུགས་སྐྲུན་བྱེད་པའི་ཐད་རྒྱབ་སྐྱོར་བྱེད་པ་དང་། རྨ་ཆུའི་མཚོ་སྔོན་བཞུར་རྒྱུད་ཀྱི་ཆུ་མགོ་དང་ཆུ་ལག་གི་སྐྱེ་ཁམས་སྲུང་སྐྱོབ་སླར་གསོ་དང་ཆུའི་ཁོར་ཡུག་ཕྱོགས་བསྡུས་བཅོས་སྐྱོང་བྱ་བ་སྤེལ་བ། ལས་གཞི་ས་ཁུལ་གྱི་རྨ་ཆུའི་ཆུ་མགོ་དང་ཆུ་ལག་གི་འགྲམ་རྒྱུད་ཀྱི་སྐྱེ་ཁམས་འགྲམ་སྲུང་འཛུགས་སྐྲུན་བྱེད་པ་བརྒྱུད་དེ། འགྲམ་གཉིས་ཀྱི་ས་ཆུ་ཤོར་ཚད་ཇེ་ཉུང་དུ་གཏོང་བ་དང་། འགྲམ་གཉིས་ཀྱི་མཐོ་སྒང་གི་རྩྭ་སར་སྲུང་སྐྱོབ་བྱེད་པ། ཁུལ་ཁོངས་གཙོ་བོའི་ཆུའི་སྐྱེ་ཁམས་གནད་དོན་ཐག་གཅོད་པ། ལས་གཞི་ཁུལ་གྱི་ཆུའི་སྐྱེ་ཁམས་རྩོལ་ནུས་མཐོར་འདེགས་གཏོང་བ་བཅས་བྱེད་རྒྱུ་རེད།
རྒྱུས་ལོན་བྱུང་བ་ལྟར་ན། ཞིང་ཆེན་འཕེལ་རྒྱས་བཅོས་སྒྱུར་ཨུ་ཡོན་ལྷན་ཁང་གིས་འབྲེལ་ཡོད་སྡེ་ཁག་དང་མཉམ་དུ་ལས་གཞིའི་བཀོད་གཏོང་ལ་ཤུགས་སྣོན་པ་དང་། ལས་གཞི་བདེ་བླག་ངང་ལག་བསྟར་བྱེད་པར་འགན་སྲུང་བྱས་ནས། སྔ་མོ་ནས་ལས་གཞི་འཛུགས་སྐྲུན་བྱེད་པའི་སྐྱེ་ཁམས་ཕན་འབྲས་དང་ཁོར་ཡུག་ཕན་འབྲས། སྤྱི་ཚོགས་ཕན་འབྲས་འདོན་སྤེལ་བྱེད་རྒྱུ་རེད། དེ་དང་མཉམ་དུ། ས་བབ་དང་བསྟུན་པ་དང་རིགས་བགར་ནས་བྱེད་ཐབས་སྤྱོད་པ་རྒྱུན་འཁྱོངས་བྱེད་པ་དང་། མ་ཆུ་དང་ལག་ཆུ་དང་འགྲམ་གཉིས་སྲུང་སྐྱོབ་ཀྱི་བྱ་བ་གཞི་གཅིག་སྒོས་སྤེལ་བར་གཅིག་འདོམས་བྱེད་པ། མུ་མཐུད་དུ་ཚན་རིག་དང་མཐུན་པའི་སྒོ་ནས་འབྲེལ་ཡོད་ལས་གཞི་ལག་བསྟར་བྱེད་པ། རྨ་ཆུའི་མཚོ་སྔོན་བཞུར་རྒྱུད་ཀྱི་སྐྱེ་ཁམས་སྲུང་སྐྱོབ་དང་སླར་གསོ་བྱེད་པར་འདེགས་སྐྱོར་བྱས་ནས། འདེགས་སྐྱོར་ཤུགས་ཡོད་ཀྱི་རྒྱལ་ཁབ་ཀྱི་སྐྱེ་ཁམས་བདེ་འཇགས་འགོག་ར་འཛུགས་རྒྱུ་རེད།
རིན་ཆེན་མཚོས་བསྒྱུར།
