ད་ལོའི་ལྔ་བའི་བ་བཞི་སྐབས་སུ། རང་ཞིང་གི་ས་ཆ་སོ་སོས་རྣམ་པ་མང་བའི་རིག་གནས་ཡུལ་སྐོར་ཐོན་རྫས་དང་ཁྱད་ཆོས་མངོན་གསལ་གྱི་ཡུལ་སྐོར་དྲིལ་སྒྲོག་བྱ་འགུལ་སྤེལ་བ་དང་། དམངས་སྲོལ་རིག་གནས་དང་གཟུགས་འདས་རིག་གནས་ཐད་ཀྱི་ཡུལ་སྐོར་ལ་དགའ་བསུ་ཆེན་པོ་ཐོབ་ལ། ཡུལ་སྐོར་གྱི་གནས་བབ་རྒྱུན་མཐུད་ངང་ཇེ་ལེགས་སུ་སོང་། དུས་ཆེན་སྐབས་སུ་ཞིང་ཆེན་ཡོངས་ཀྱིས་འགྲུལ་བ་འབུམ་བརྒྱད་དང་ཁྲི་བརྒྱད་སྟོང་གསུམ་བརྒྱད་བརྒྱ་སྣེ་ལེན་བྱས་པ་དང་། ཡུལ་སྐོར་སྤྱིའི་ཡོང་སྒོ་སྒོར་དུང་ཕྱུར་ལྔ་དང་ས་ཡ་བཞི་ལ་སླེབས་ལ། དེ་ན་ནིང་གི་དུས་མཉམ་དང་བསྡུར་ན་ཇེ་མཐོར་སོང་ཡོད།
ཞིང་ཆེན་ཡོངས་ཀྱི་ས་ཆ་སོ་སོའི་གནས་སྐོར་དྲིལ་སྒྲོག་ངོ་སྤྲོད་རྒྱུན་མ་ཆད་པ་དང་རིག་གནས་བྱ་འགལ་སྣ་མང་སྤེལ། མཚོ་བྱང་བོད་རིགས་རང་སྐྱོང་ཁུལ་མདོ་ལ་རྫོང་གིས་མདོ་ལ་ལྷ་ཡི་ཞིང་ཁམས་ཏེ་སྙན་ངག་དང་རྒྱང་རིང་གི་ཁྱིམ་གཞིའི་སྐྱེ་ཁམས་ཡུལ་སྐོར་གྱི་ཟི་ལིང་ཆེད་དོན་ངོ་སྤྲོད་ཚོགས་འདུ་བསྡུས་ནས། ཡུལ་སྐོར་བས་སྐྱེ་ཁམས་ཀྱི་མཛེས་སྡུག་ཉམས་སུ་མྱོང་བར་སྣེ་ཁྲིད་བྱས་པ་དང་། ཧི་ནན་བརྙན་འཕྲིན་ཁང་གིས་མཚོ་ནུབ་སོག་རིགས་བོད་རིགས་རང་སྐྱོང་ཁུལ་ན་གོར་མོ་གྲོང་ཁྱེར་དང་མཉམ་འབྲེལ་བྱས་ནས་འཁྲབ་སྟོན་བྱས་པའི་གོང་མ་རྒྱལ་མོའི་གསོལ་སྟོན་ཞེས་པར་དྲ་རྒྱའི་སྟེགས་བུ་སྟེང་ཚུར་སྣང་ཆེན་པོ་ཐོབ། ཞིང་ཆེན་དཔེ་མཛོད་ཁང་གིས་དཔེ་ཀློག་ཐད་ཀྱི་བྱ་འགུལ་དང་བརྗོད་དོན་ཏང་གི་ཉིན་མོའི་བྱ་འགུལ་སྤེལ་བ་དང་། ཞིང་ཆེན་རིག་གནས་ཁང་སོགས་ཀྱིས་ཟློས་གར་ཞིང་སྡེ་རུ་བསྐྱོད་པ་དང་རབ་མཛེས་མཚོ་སྔོན་གྱི་རིག་རྩལ་བདེ་མྱུར་རྟ་དམག་གི་བརྗོད་དོན་འཁྲབ་སྟོན་སྤེལ་ལ། མཚོ་ཤར་གྲོང་ཁྱེར་ཧུའུ་ཀྲུའུ་ཧོར་རིགས་རང་སྐྱོང་རྫོང་རིག་གནས་ཁང་གིས2023ལོའི་ཧུའུ་ཀྲུའུ་རྫོང་ལྔ་བའི་བ་བཞིའི་གཙག་དྲུབ་རྩལ་ནུས་འགྲན་སྡུར་བསྡུས། ཟི་ལིང་གྲོང་ཁྱེར་དང་མཚོ་བྱང་ཁུལ་སོགས་ས་ཆའི་དཔེ་མཛོད་ཁང་གིས་ལྔ་བའི་བ་བཞིའི་དང་འབྲེལ་བའི་ཤེས་བྱ་དྲ་ཐོག་ནས་ལན་བཏབ་སྟེ་བྱ་དགའ་སྟེར་བའི་བྱ་འགུལ་སྤེལ། ལྔ་བའི་བ་བཞི་སྐབས་སུ། ས་ཆ་སོ་སོས་ཕུན་སུམ་ཚོགས་པའི་རིག་གནས་བྱ་འགུལ་སྤེལ་བ་བརྒྱུད་དེ་སྤྲོ་སྐྱིད་ལྡན་པའི་དུས་ཆེན་གྱི་སྣང་ཚུལ་བསྐྲུན་པ་ནས། ཞིང་ཆེན་ཡོངས་ཀྱི་ཡུལ་སྐོར་ཐད་རིག་གནས་ཀྱི་གོ་དོན་སྔར་ལས་མང་པོ་ཁ་སྣོན་བྱས།
