ཉེ་ལམ་གསར་འགོད་པས་ཞིང་ཆེན་འཕྲོད་བསྟེན་བདེ་ཐང་ཨུ་ཡོན་ལྷན་ཁང་ནས་རྒྱུས་ལོན་བྱུང་བ་ལྟར་ན། སྐོར་གསར་པའི་སྨན་བཅོས་བཅོས་སྒྱུར་བྱས་པའི་ཚུན་ལ། ཞིང་ཆེན་ཡོངས་ཀྱི་ས་ཁུལ་སོ་སོས་གཞི་རྩའི་སྤྱི་བའི་འཕྲོད་བསྟེན་ཞབས་ཞུའི་དོ་མཉམ་ཅན་ལ་སྐུལ་འདེད་གཏོང་རྒྱུ་དེ་ཁྱིམ་ཚང་ཁྲི་སྟོང་མང་བོར་འབྲེལ་བ་ཡོད་པའི་དམངས་ཚིས་བཟོ་སྐྲུན་གལ་ཆེན་དུ་བརྩིས་ནས་ཡུལ་བབ་དང་བསྟུན་པ་དང་བྱེད་ཐབས་ཇེ་དྲག་ཏུ་བཏང་སྟེ་གཞི་རྩའི་སྤྱི་བའི་འཕྲོད་བསྟེན་ཞབས་ཞུ་བྱ་བའི་སྤུས་འདེགས་ནུས་སྤེལ་ལ་ཤུགས་ཆེན་པོས་སྐུལ་འདེད་བཏང་།
མཚོ་ལྷོ་བོད་རིགས་རང་སྐྱོང་ཁུལ་གྱིས་མཁར་གྲོང་སྡོད་དམངས་འབུམ་གསུམ་དང་ཁྲི་གཉིས་སྟོང་དྲུག་བཞི་བརྒྱ་ལ་རིན་མེད་ངང་ལུས་པོའི་བདེ་ཐང་བརྟག་དཔྱད་བྱས་ཏེ་མི་ཚོགས་གཙོ་བོ་དག་བདེ་ཐང་དོ་དམ་ཁྲོད་བཞག་ནས་དུས་ཚིགས་རེར་འཚམས་འདྲི་བྱེད་པ་དང་ལོ་རེར་ལུས་པོར་བརྟག་དཔྱད་བྱེད་པ། བདེ་འཇགས་གདེང་འཇོག་དང་མཛུབ་སྟོན་བྱེད་པ་སོགས་ཀྱི་ཞབས་ཞུ་མཁོ་འདོན་བྱས་ཏེ་ཁུལ་ཡོངས་ཀྱི་གཞི་རྩའི་སྤྱི་བའི་འཕྲོད་བསྟེན་ཞབས་ཞུའི་ཁེབས་ཚད་སྔར་ལས་ཆེ་རུ་བཏང་། མཚོ་བྱང་བོད་རིགས་རང་སྐྱོང་ཁུལ་གྱིས་ཁུལ་ཡོངས་སུ་མཉམ་འབྲེལ་དྲ་བ་དང་སྨན་བཅོས་བདེ་ཐང་མཉམ་བསྲེས་སྒོས་འཛུགས་སྐྲུན་བྱེད་པའི་ལས་གཞི་ལག་བསྟར་བྱས་ཏེ་སྡོད་དམངས་ཀྱི་གློག་རྡུལ་བདེ་ཐང་ཡིག་ཚགས་སོགས་འཐུས་ཚང་དུ་བཏང་ནས་ཁུལ་དང་རྫོང་། ཡུལ་ཚོ། སྡེ་བ་བཅས་རིམ་པ་བཞིའི་གཞི་རྩའི་སྤྱི་བའི་འཕྲོད་བསྟེན་ཞབས་ཞུའི་གཞི་གྲངས་ཕན་ཚུན་སྦྲེལ་མཐུད་ཡོང་བ་མངོན་འགྱུར་བྱས།
མཚོ་ནུབ་སོག་རིགས་བོད་རིགས་རང་སྐྱོང་ཁུལ་དུར་ལམ་རྫོང་གི་འཕྲོད་བསྟེན་ཁང་སོ་སོས་སྤྱི་བའི་འཕྲོད་བསྟེན་མི་སྣ་དང་བདེ་སྲུང་མི་སྣ། ཚན་འདུས་སྨན་པ་སོགས་ཀྱིས་གྲུབ་པའི་སྨན་བཅོས་འཕྲོད་བསྟེན་མཉམ་བསྲེས་ཀྱི་ཞབས་ཞུའི་རུ་ཁག་གཉིས་བཙུགས་པ་དང་། རུ་ཁག་སོ་སོས་གཟའ་འཁོར་རེའི་གཟའ་ཟླ་བ་དང་ལྷག་པ་གཉིས་ལ་ཁྱིམ་ཚང་དུ་སོང་ནས་འཚམས་འདྲི་བྱེད་བཞིན་ཡོད་ལ། རུ་ཁག་ཞབས་ཞུའི་རྣམ་པར་བརྟེན་ནས་རྫོང་ཡོངས་ཀྱི་ཞབས་ཞུའི་སྤུས་ཚད་མཐོར་འདེགས་བཏང་། རྨ་ལྷོ་བོད་རིགས་རང་སྐྱོང་ཁུལ་གཅན་ཚ་རྫོང་གིས་རྫོང་མི་དམངས་སྨན་ཁང་སྣེ་ཁྲིད་སྨན་ཁང་དུ་བྱས་ཏེ་རྫོང་ཡོངས་ཀྱི་སྤྱི་བའི་འཕྲོད་བསྟེན་བྱ་བ་ཁག་གསུམ་དུ་བགོས་པ་དང་། སྤྱི་བའི་འཕྲོད་བསྟེན་ཞབས་ཞུའི་རུ་ཁག་གསུམ་རྩ་འཛུགས་བྱས་ཏེ་སྤྱི་བའི་འཕྲོད་བསྟེན་ཞབས་ཞུ་ལས་གཞིའི་ཁག་བགོས་དོ་དམ་ལག་བསྟར་བྱས། མགོ་ལོག་བོད་རིགས་རང་སྐྱོང་ཁུལ་གྱིས་ཧྲང་ཧེའི་རོགས་འཛུགས་མ་དངུལ་སྤྱད་དེ་རྫོང་ལྔ་ལ་གནས་སྐབས་སྨན་བཅོས་མི་སྣ་བསྡུ་ལེན་བྱས་ཏེ་གཞི་རིམ་སྨན་བཅོས་འཕྲོད་བསྟེན་སྡེ་ཁག་གི་དཔུང་སྡེ་ཇེ་དྲག་ཏུ་བཏང་། ཧྲང་ཧེའི་རོགས་འཛུགས་ལས་གཞི་སྤྱད་དེ་ཁུལ་ཁོངས་ཀྱི་སྨན་བཅོས་ལག་རྩལ་སྟེགས་བུ་དང་གློག་རྡུལ་ནད་ཐོ་སྟེགས་བུ་བཙུགས་པ་དང་ཁུལ་དང་རྫོང་། ཡུལ་ཚོ་བཅས་རིམ་པ་གསུམ་གྱི་སྨན་བཅོས་ཞབས་ཞུའི་མ་ལག་སྦྲེལ་མཐུད་བྱས་ཏེ་ཁུལ་ཡོངས་ཀྱི་སྨན་བཅོས་འཕྲོད་བསྟེན་ཞབས་ཞུའི་ཆ་འཕྲིན་ཅན་གྱི་ཞབས་ཞུའི་ཆུ་ཚད་མཐོར་འདེགས་བཏང་། ཡུས་ཧྲུའུ་བོད་རིགས་རང་སྐྱོང་ཁུལ་གྱིས་སྡོད་དམངས་བདེ་ཐང་ཡིག་ཚགས་ཞིབ་བཤེར་འགུལ་སྤྱོད་སྤེལ་ཏེ་ལུས་པོ་བརྟག་དཔྱད་ལས་གཞིའི་ཆ་ཚང་རང་བཞིན་དང་ཚད་ལྡན་རང་བཞིན་མཐོར་འདེགས་བཏང་། མ་དངུལ་བཏང་སྟེ་ཡུལ་ཚོ་དང་གྲོང་རྡལ་སོ་སོའི་འཕྲོད་བསྟེན་ཁང་དང་གཞི་ཁུལ་འཕྲོད་བསྟེན་ཞབས་ཞུའི་ལྟེ་གནས་ལ་ཀྲུང་བོད་ལུགས་གསོ་རིག་དང་འཚམ་པའི་ལག་རྩལ་སྒྲིག་ཆས་ཉོས་པ་དང་། ཀྲུང་བོད་ལུགས་གསོ་རིག་གི་སྨན་བཅོས་བདེ་ཐང་དོ་དམ་ཞབས་ཞུའི་ཆུ་ཚད་ཕྱོགས་ཡོངས་ནས་མཐོར་འདེགས་བཏང་།
ལྷ་མོ་ཚེ་རིང་གིས་བསྒྱུར།
