ཀྲུང་གོ་ས་ཡོམ་ཁང་གི་དྲ་ཐོག་བརྟག་འཇལ་ལྟར་ན། ཟླ12པའི་ཚེས18ཉིན་གྱི་དགོང་མོའི་དུས་ཚོད་བཅུ་གཅིག་དང་སྐར་མ་ང་དགུའི་སྟེང་ཀན་སུའུ་ཞིང་ཆེན་ཀ་ཇུ་ཧོས་རིགས་རང་སྐྱོང་ཁུལ་ཅི་ཧྲི་ཧྲན་རྫོང་དུ་བྱུང་བའི་རིམ་པ6.2ཅན་གྱི་ས་ཡོམ་གྱི་ཡོམ་ཁུངས་སྟོང་རྨིད་བཅུ་ཡིན་པ་དང་། ཟླ12པའི་ཚེས19ཉིན་གྱི་ཞོགས་པའི་དུས་ཚོད3བར་དུ། ཐོག་མའི་བསྡོམས་རྩིས་ལྟར་ན། ས་ཡོམ་ཁྲོད་རང་ཞིང་གི་མཚོ་ཤར་གྲོང་ཁྱེར་གྱི་མི་དྲུག་རྐྱེན་ལམ་དུ་ཤོར་བ་དང་། མི་དོན་ལྔར་རྨས་ཕོག

ཚེས19ཉིན་གྱི་ཞོགས་པའི་དུས་ཚོད་གསུམ་དང་སྐར་མ་སུམ་ཅུའི་སྟེང་། གསར་འགོད་པས་མཚོ་སྔོན་ཞིང་ཆེན་ས་ཡོམ་ཅུའུ་ཡིས་བསྡུས་པའི་གསར་འགྱུར་སྒྲོག་སྤེལ་ཚོགས་འདུའི་སྟེང་རྒྱུས་ལོན་བྱུང་བ་ལྟར་ན། ཐེངས་འདིའི་ཀན་སུའུ་ཅི་ཧྲི་ཧྲན་གྱི་ཟླ་བཅུ་གཉིས་པའི་ཚེས་བཅོ་བརྒྱད་ཉིན་གྱི་རིམ་པ6.2ཀྱི་ས་ཡོམ་གྱི་ཡོམ་ལྟེ་དེ་རང་ཞིང་དང་ཆེས་ཐག་ཉེ་བའི་བར་ཐག་ནི་སྤྱི་ལེ་ལྔ་ཡིན། ཆེས་ཉེ་བའི་གྲོང་གསེབ་ནི་ཞོན་ཧྭ་ཟ་ལར་རིགས་རང་སྐྱོང་རྫོང་རྡོ་སྦིས་ཡུལ་ཚོ་ཡིན་ལ་ཧ་ལམ་བར་ཐག་སྤྱི་ལེ་བཅུ་གཉིས་ཡོད། ཡོམ་ལྟེ་ནས་མཚོ་ཤར་གྲོང་ཁྱེར་ཕེན་ཨན་ཆུའུ་བར་ཧ་ལམ་སྤྱི་ལེ་བརྒྱ་དང་བདུན་ལྷག་གི་བར་ཐག་ཡོད་པ་དང་། མིན་ཧོ་ཧོས་རིགས་ཧོར་རིགས་རང་སྐྱོང་རྫོང་བར་དུ་ཧ་ལམ་སྤྱི་ལེ་རེ་བརྒྱད་དང་གྲངས་ཆུང་བརྒྱད་ཡོད་ལ། ཞོན་ཧྭ་རྫོང་བར་ཧ་ལམ་སྤྱི་ལེ་སོ་གཉིས་ཡོད་པ་དང་། དཔའ་ལུང་ཧོས་རིགས་རང་སྐྱོང་རྫོང་བར་ཧ་ལམ་སྤྱི་ལེ་རེ་བཞི་ཡོད་ལ། ཟི་ལིང་གྲོང་ཁྱེར་བར་ཧ་ལམ་སྤྱི་ལེ་བརྒྱ་དང་སོ་ལྔ་ཡོད། ཡོམ་ལྟེའི་སྤྱི་ལེ་ལྔ་བཅུའི་ཁྱབ་ཁོངས་དེ་རང་ཞིང་གི་ཡུལ་ཚོ་དང་གྲོང་རྡལ་ཉེར་གཉིས་ལ་ཁེབས་པ་དང་། ཆེས་ཐག་ཉེ་ས་ནི་རྡོ་སྦིས་བོད་རིགས་ཡུལ་ཚོ་དང་ཀོན་ཐིན་གྲོང་རྡལ། པད་ཀྲོང་གྲོང་རྡལ། ཀྲུང་ཁྲོན་ཡུལ་ཚོ་སོགས་ཡིན། རང་ཞིང་གི་མཚོ་ཤར་གྲོང་ཁྱེར་ལི་ཏུའུ་ཆུའུ་དང་ཕིན་ཨན་ཆུའུ། ཧུའུ་ཀྲུའུ་རྫོང་། མིན་ཧོ་རྫོང་། དཔའ་ལུང་རྫོང་། ཞོན་ཧྭ་རྫོང་བཅས་སུ་ཡོམ་ཚོར་ཆེན་པོ་ཡོད་པ་དང་། ཟི་ལིང་གྲོང་ཁྱེར་དང་མཚོ་ལྷོ་བོད་རིགས་རང་སྐྱོང་ཁུལ་གུང་ཧོ་རྫོང་དུ་ཡོམ་ཚོར་ཅུང་ཙམ་ཡོད།

2023ལོའི་ཟླ12པའི་ཚེས19ཉིན་གྱི་ཆུ་ཚོད2དང་སྐར་མ30བར་ཁྱོན་བསྡོམས་རིམ་པ3.0དང་དེའི་ཡན་གྱི་ཡོམ་འཕྲོ་ཐེངས9ཟིན་ཐོར་བཀོད་པ་དང་། དེའི་ནང་རིམ་པ6.0～6.9ཡི་ས་ཡོམ་མེད་པ་དང་། རིམ་པ5.0～5.9ཡི་ས་ཡོམ་མེད་ལ། རིམ་པ4.0～4.9རིམ་པའི་ས་ཡོམ་ཐེངས་གཉིས་དང་། 3.0～3.9རིམ་པའི་ས་ཡོམ་ཐེངས7བཅས་ཡོད།

ས་ཡོམ་བྱུང་རྗེས་མཚོ་སྔོན་ཞིང་ཆེན་ས་ཡོམ་ཅུའུ་ཡིས་འཕྲལ་དུ་ས་ཡོམ་འཕྲལ་བསྟུན་བྱེད་ཐབས་ལག་བསྟར་བྱས་ནས་དུས་ཚོད་དང་པོའི་ནང་ད་ཐེངས་ཀྱི་ས་ཡོམ་གྱི་རྒྱུ་རྐྱེན་གཙོ་བོ་གསུམ་གཏན་འཁེལ་ཡང་དག་བྱས་པ་དང་། མྱུར་དུ་ཀྲུང་གོ་ས་ཡོམ་ཅུའུ་དང་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་ལ་སྙན་སེང་ཕུལ་བར་མ་ཟད། འཕྲལ་བསྟུན་རོགས་སྐྱོབ་ཀྱི་འབྲེལ་ཡོད་སྡེ་ཁག་དང་ལས་ཁུངས་ལ་སྤྲད། འཕྲལ་མར་ས་ཡོམ་འཕྲལ་བསྟུན་བཀོད་འདོམས་ལག་རྩལ་མ་ལག་དང་གནོད་འཚེའི་གནས་ཚུལ་མྱུར་ཞུའི་སྟེགས་བུ་བཙུགས་ནས་གནོད་འཚེའི་གནས་ཚུལ་དང་། ས་ཡོམ་གྱི་གནས་ཚུལ། སྤྱི་ཚོགས་ཀྱི་གནས་ཚུལ་བཅས་ཤེས་རྟོགས་བྱས་པ་དང་། ས་ཡོམ་གནས་ཚུལ་གནད་བསྡུས་ཀྲུང་གོ་ས་ཡོམ་ཅུའུ་དང་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་ལ་སྙན་སེང་ཕུལ། མྱུར་དུ་ཡོམ་ཁུལ་གནས་སའི་མཚོ་ཤར་གྲོང་ཁྱེར་ས་ཡོམ་ཅུའུ་ལ་གནས་ཚུལ་ལ་རྒྱུས་ལོན་བྱ་རྒྱུའི་བརྡ་ཐོ་བཏང་བ་དང་། ལས་བྱེད་མི་སྣ19ལས་གྲུབ་པའི་ཡུལ་དངོས་ཀྱི་བྱ་བའི་རུ་ཁག་དང་། རླངས་འཁོར4དང་སྐོར་སྐྱོད་ལྟ་ཞིབ་ཚད་ལེན་ཡོ་བྱད་ཆ་ཚང4བཅས་ཡོམ་ཁུལ་དུ་མངགས་ནས་འབྲེལ་ཡོད་བྱ་བ་སྤེལ་ཞིང་། མྱུར་དུ་ས་ཡོམ་གནས་ཚུལ་གྱི་བྲེལ་མྱུར་ཚོགས་བསྡུ་བསྡུས་ནས་ས་ཡོམ་གྱི་འཕེལ་ཕྱོགས་ལ་ཞིབ་འཇུག་དང་བརྡར་གཅོད་བྱས།

མིག་སྔར་དྲ་ཐོག་ནས་ཐོན་པའི་ད་ཐེངས་ཀྱི་ས་ཡོམ་ལ་དམིགས་པའི་དབྱེ་ཞིབ་དང་བརྡར་གཅོད་སྣ་ཚོགས་གལ་ཏེ་གཞུང་ཕྱོགས་ནས་དངོས་སུ་ཁྱབ་བསྒྲགས་བྱས་པ་མིན་ཚེ་ཚང་མ་དཀྲོག་གཏམ་ཡིན།