ཟླ12པའི་ཚེས25ཉིན།གསར་འགོད་པས་མཚོ་སྔོན་ཞིང་ཆེན་མི་དམངས་ཞིབ་དཔྱོད་ཁང་ནས་རྒྱུས་ལོན་བྱུང་བ་ལྟར་ན།མི་དམངས་མང་ཚོགས་ཀྱིས་དོ་སྣང་བྱེད་བཞིན་པའི་བྲེལ་དཀའ་ཁྲེལ་སྒུག་གི་གནད་དོན་ཐག་གཅོད་བྱེད་པར་རོགས་འདེགས་བྱ་ཆེད། ཞིང་ཆེན་མི་དམངས་ཞིབ་དཔྱོད་ཁང་གིས་མཚོ་སྔོན་ཞིང་ཆེན་ཞིབ་དཔྱོད་ལས་ཁུངས་ཀྱིས་སྤུས་ཚད་མཐོ་བའི་འཚོ་བར་ཞབས་འདེགས་ཞུ་བའི་སྤྱི་ཕན་གཏུག་བཤེར་ཞིབ་བཤེར་གྱི་ཆེད་དོན་བྱ་འགུལ་སྤེལ་བའི་ལག་བསྟར་ཇུས་གཞི་པར་འགྲེམ་བྱས་པ་དང་། ཆེད་དོན་བྱ་འགུལ་སྤེལ་བ་བརྒྱུད་དེ་སྤུས་ཚད་མཐོ་ཞིང་ཕན་ནུས་ལྡན་པའི་སྒོ་ནས་མི་དམངས་མང་ཚོགས་ཀྱི་རྩ་བའི་ཁེ་ཕན་དང་འབྲེལ་བའི་སྤྱི་ཕན་གཏུག་བཤེར་གྱོད་དོན་ལེགས་པོར་བསྒྲུབ་པ་དང་། སྤྱི་ཕན་གནོད་འཚེའི་འབུར་ཐོན་གནད་དོན་ཐག་གཅོད་བྱེད་པར་སྐུལ་འདེད་གཏོང་བ་དང་། མི་དམངས་མང་ཚོགས་ཀྱི་ཐོབ་ཚོར་དང་སྐྱིད་སྣང་། བདེ་སྣང་བཅས་ཆེ་རུ་གཏོང་དགོས།
ལག་བསྟར་ཇུས་གཞི་ལས་བསྟན་དོན། སྤྱི་བའི་བདེ་འཇགས་ཁྱབ་ཁོངས་ཀྱི་སྤྱི་ཕན་གཏུག་བཤེར་གྱོད་དོན་ཞིབ་བཤེར་ལས་དོན་ལ་བསྟུད་མར་ཤུགས་སྣོན་དགོས།ཕྱི་རོལ་གྱི་ལུས་སྦྱོང་ཡོ་བྱད་ཀྱི་ལྷུ་ལག་བོར་བ་དང་། དེ་བཀོལ་སྤྱོད་བྱེད་ཐབས་དང་དོ་སྣང་བྱ་ཡུལ་གསལ་སྟོན་བྱས་མེད་པ།དུས་བརྒལ་བེད་སྤྱོད་སོགས་བདེ་འཇགས་ངང་བཀོལ་སྤྱོད་བྱེད་པའི་གནད་དོན་ལ་དམིགས་ནས་གཙོ་གནད་ཞིབ་བཤེར་དང་གྱོད་གཞི་ཞིབ་གཅོད་བྱེད་ཤུགས་ཆེ་རུ་གཏོང་དགོས། གློག་སྐས་སོགས་དམིགས་བསལ་སྒྲིག་ཆས་ཀྱི་བེད་སྤྱོད་མཚོན་རྟགས་དང་ཉེན་བརྡའི་མཚོན་རྟགས།བརྟག་བཤེར་མཚོན་རྟགས་སོགས་དུས་བརྒལ་གྱིས་སྦྱར་བའི་གནད་དོན་ལ་དམིགས་ནས་གྱོད་གཞི་ཞིབ་གཅོད་བྱེད་ཤུགས་ཆེ་རུ་གཏོང་དགོས། ཐོག་ཁང་ཀླད་དུ་སྒྲིག་འགལ་གྱིས་སྒོ་བྱང་རྣམ་པའི་ཕྱི་རོལ་གྱི་བརྡ་ཁྱབ་དང་གློག་སྒམ་སྒྲིག་སྦྱོར་བྱེད་པ་དང་། ཐོག་ཁང་མཐོན་པོའི་གྱང་ཤུན་མར་ལྷུང་བའི་ཉེན་ཁ་སོགས་ཀྱི་གནས་ཚུལ་ལ་དམིགས་ཏེ་གྱོད་གཞི་ཞིབ་གཅོད་བྱེད་ཤུགས་ཆེ་རུ་གཏོང་དགོས།
ལག་བསྟར་ཇུས་གཞི་ལས་ནན་གྱིས་བསྟན་དོན། ཁྲིམས་བཀོད་ཁྱབ་ཁོངས་གསར་བའི་སྤྱི་བའི་གཏུག་བཤེར་གྱོད་དོན་སྤུས་ཚད་མཐོར་འདེགས་དང་། དམིགས་བསལ་མང་ཚོགས་ཀྱི་རྒྱུན་ལྡན་འཚོ་བའི་ཁྲོད་ཀྱི་སྤྱི་ཕན་གནོད་འཚེའི་གནད་དོན་གཅིག་བསྡུས་བྱས་ནས། སྲིད་འཛིན་ལས་ཁུངས་ཀྱིས་ཁྲིམས་ལྟར་བཀག་མེད་ཁོར་ཡུག་འཛུགས་སྐྲུན་གྱི་ཁྲིམས་འགལ་གནད་དོན་ཡོ་བསྲང་དང་། ཁྲིམས་ལྟར་མི་སྒེར་གྱི་གསང་བའི་གནས་ཚུལ་དང་དམིགས་བསལ་མང་ཚོགས་ཀྱི་མི་སྒེར་གནས་ཚུལ། སློབ་གསོ་དང་སྨན་བཅོས་སོགས་དང་འབྲེལ་བའི་དམངས་འཚོའི་ལས་རིགས་དང་ཆ་འཕྲིན་གཞི་གྲངས་མང་བ་སོགས་རྒྱལ་ཁབ་ཀྱི་ཁེ་ཕན་དང་སྤྱི་ཚོགས་སྤྱི་བའི་ཁེ་ཕན་ལ་གནོད་པའི་སྤྱི་བའི་གཏུག་བཤེར་གྱོད་དོན་ཐག་གཅོད་བྱེད་པ་དང་། མི་སྒེར་ཆ་འཕྲིན་ལ་སྲུང་སྐྱོབ་བྱེད་པའི་སྤྱི་བའི་གཏུག་བཤེར་གྱོད་དོན་བསྒྲུབ་པའི་ཞོར་དུ་གློག་འཕྲིན་དྲ་རྒྱའི་བསླུ་བྲིད་ལ་ངོ་རྒོལ་བྱེད་པའི་གཏུག་བཤེར་གྱོད་དོན་ཐག་གཅོད་བྱེད་པར་སྐུལ་འདེད་བཏང་ནས།འབྲེལ་ཡོད་སྡེ་ཁག་དང་འབྲེལ་འདྲིས་དམ་ཟབ་བྱས་ཏེ། འགན་འཁྲི་གསལ་བགོ་དང་མཉམ་འཛིན་མཉམ་སྐྱོང་བྱེད་པ་བརྒྱུད་དེ་མུ་འབྲེལ་ཅན་གྱི་གློག་འཕྲིན་དྲ་རྒྱའི་བསླུ་བྲིད་འགོག་ར་བསྐྲུན་དགོས།
ལག་བསྟར་གྱོད་གཞི་ལས། ཟས་རིགས་བདེ་འཇགས་དང་འབྲེལ་བའི་དྲ་རྒྱའི་ཉོ་འཚོང་གི་སྤྱི་བའི་གཏུག་བཤེར་གྱོད་དོན་གཙོ་བོར་བཟུང་ནས་བསྒྲུབ་པ་དང་། སྲིན་འགོག་སྨན་རྫས་ཁྲིམས་འགལ་ལས་སྣོན་གྱི་ལྟ་སྐུལ་བྱེད་ཤུགས་མུ་མཐུད་ཆེ་རུ་གཏོང་བ་དང་། སྨན་རྫས་ཐོན་སྐྱེད་སྤུས་ཚད་དང་ཁྲིམས་འགལ་ཉོ་ཚོང་།ལུས་གསོ་བདེ་སྲུང་སྨན་རྫས་ཀྱི་དྲིལ་བསྒྲགས་རྫུན་མ་སོགས་རིགས་མང་བའི་སྨན་སྤྱོད་བདེ་འཇགས་ཁྱབ་ཁོངས་ལ་ལྟ་སྐུལ་བྱེད་ཤུགས་ཆེ་རུ་གཏོང་བ། གྲོང་ཁྱེར་གྱི་ཁོར་ཡུག་སྦག་བཙོག་གི་འབུར་ཐོན་གནད་དོན་གཅིག་བསྡུས་ཀྱིས་གྲོང་གསེབ་མི་སྡོད་ཁོར་ཡུག་ལེགས་བཅོས་བྱེད་པར་ཧུར་ཐག་གིས་ཞུགས་པ་དང་། རྣམ་གྲངས་གལ་ཆེན་གསར་སྤེལ་འཛུགས་སྐྲུན་དང་འཛུགས་སྐྲུན་ཁེ་ལས་ཁ་ཤས་ཀྱི་འགོག་སྲུང་བྱེད་ཐབས་གནད་ལ་མི་འཁེལ་བའི་གནད་དོན་ལ་དམིགས་ནས་ལྟ་སྐུལ་བྱེད་དགོས་པར་མ་ཟད། དེ་དང་མཉམ་དུ་ལས་སྒྲུབ་དུས་ཚོད་གཏན་འཁེལ་མིན་པར་མཚན་མོར་འཛེར་སྒྲའི་སྦག་བཙོག་བཟོ་བ་སོགས་སྤྱི་བའི་གནོད་འཚེའི་གནད་དོན་ལ་དོ་སྣང་དང་ཐག་གཅོད་བྱེད་དགོས་པའི་བླང་བྱ་བཏོན།
ལྷ་མོ་འཚོས་བསྒྱུར།
