ཟླ4པའི་ཚེས22ཉིན། མཚོ་སྔོན་ཞིང་ཆེན་གྱི་ཤེས་བྱའི་ཐོན་དབང་སློབ་གླིང་ཐོག་མ་མཚོ་སྔོན་མི་རིགས་སློབ་ཆེན་དུ་བཙུགས། དེ་ནི་ཞིང་ཆེན་ཡོངས་ཀྱི་ཤེས་བྱའི་ཐོན་དབང་ལས་དོན་གྱི་མཚོན་རྟགས་རང་བཞིན་གྱི་འཕེལ་རིམ་ཞིག་ཡིན་ལ། དེ་གསར་གཏོད་རང་བཞིན་གྱི་འཇོན་མི་གསོ་སྐྱོང་དང་གསར་གཏོད་རྒྱུ་རྐྱེན་གཙོ་བོ་གཅིག་སྡུད་བྱེད་པ། འཇོན་མིའི་མཐོ་ས་བསྐྲུན་པ་བཅས་ཀྱི་ཐད་དངོས་ཡོད་ཀྱི་དོན་སྙིང་གལ་ཆེན་ལྡན།
མཐོ་རིམ་སློབ་གྲྭ་ནི་གསར་གཏོད་མ་ལག་གི་གཡུལ་ས་གཙོ་བོ་ཡིན་པ་དང་། ཤེས་བྱའི་ཐོན་དབང་བྱ་བའི་སྟོབས་ཤུགས་གཙོ་བོ་ཡིན། མཚོ་སྔོན་ཞིང་ཆེན་ཁྲོམ་ར་ལྟ་སྐུལ་དོ་དམ་ཅུའུ་ཤེས་བྱའི་ཐོན་དབང་ཅུའུ་དང་མཚོ་སྔོན་མི་རིགས་སློབ་ཆེན་གྱིས་ཤེས་བྱའི་ཐོན་དབང་སློབ་གླིང་མཉམ་འཛུགས་བྱས་ཏེ་ཤེས་བྱའི་ཐོན་དབང་བསླབ་ཚན་གྱི་གསོ་སྐྱོང་དང་འཕེལ་རྒྱས་ལ་ཤུགས་སྣོན་པ་དང་ཤེས་བྱའི་ཐོན་དབང་འཇོན་མིའི་གསོ་སྐྱོང་དང་སློབ་གསོ་ཇེ་དྲག་ཏུ་བཏང་བ་དེ་ནི་ཤེས་བྱའི་ཐོན་དབང་གི་སྟོབས་ལྡན་རྒྱལ་ཁབ་འཛུགས་སྐྲུན་བྱེད་པའི་རྩ་གནད་ལག་བསྟར་དོན་འཁྱོལ་བྱེད་པའི་ཞིབ་ཕྲའི་འགུལ་སྐྱོད་ཡིན་ཞིང་། རང་ཞིང་གིས་ཤེས་བྱའི་ཐོན་དབང་འཐབ་ཇུས་ལག་བསྟར་ཟབ་མོ་བྱས་ཏེ་ཤེས་བྱའི་ཐོན་དབང་གི་སྟོབས་ལྡན་ཞིང་ཆེན་མྱུར་དུ་འཛུགས་སྐྲུན་བྱེད་པའི་དངོས་གཉེར་གྱི་བྱེད་ཐབས་ཤིག་ཀྱང་ཡིན།
དུས་ཡུན་རིང་བོར། མཚོ་སྔོན་མི་རིགས་སློབ་ཆེན་གྱིས་ཤེས་བྱའི་ཐོན་དབང་གི་སྟོབས་ལྡན་ཞིང་ཆེན་འཛུགས་སྐྲུན་ལ་སྐུལ་འདེད་གཏོང་བ་དང་ཤེས་བྱའི་ཐོན་དབང་གི་འཇོན་མི་གསོ་སྐྱོང་བྱེད་པར་དམ་པོར་དམིགས་ནས་དངོས་གཞིའི་སློབ་གསོ་དང་ཞིབ་འཇུག་སློབ་མའི་སློབ་གསོའི་དུས་མཚམས་སུ་ཤེས་བྱའི་ཐོན་དབང་གི་འབྲེལ་ཡོད་ཆེད་ལས་བཀོད་སྒྲིག་བྱས་པ་དང་། མཚོ་སྔོན་ཞིང་ཆེན་གྱི་ཤེས་བྱའི་ཐོན་དབང་འཕེལ་རྒྱས་དང་སྲུང་སྐྱོབ་གནས་ཚུལ་གྱི་རྒྱབ་ཤ་དཀར་པོའི་དཔེ་དེབ་སྒྲིག་བཟོ་སོགས་ཀྱི་བྱ་བའི་ཁྲོད་ཧུར་ཐག་གིས་ཞུགས་ཏེ་རང་ཞིང་གི་ཤེས་བྱའི་ཐོན་དབང་འཇོན་མི་གསོ་སྐྱོང་དང་ཚན་རིག་ཞིབ་འཇུག སྤྱི་ཚོགས་ཞབས་ཞུ། གསར་གཏོད་ལས་སྐྲུན་སོགས་ཕྱོགས་ལ་བྱས་རྗེས་གལ་ཆེན་ཕུལ།
མཚོ་སྔོན་ཞིང་ཆེན་མི་རིགས་སློབ་ཆེན་གྱིས་སྔར་ཡོད་ཀྱི་སློབ་སྒྲུབ་དགེ་མཚན་གྱི་རྨང་གཞིའི་སྟེང་དུ། གནས་པའི་གནད་དོན་དང་སློབ་སྒྲུབ་ཁ་ཕྱོགས། ཤེས་བྱའི་ཐོན་དབང་གི་སྟེགས་བུ་རྩེ་གྲ་འཛུགས་སྐྲུན་བཅས་ལ་དམིགས་ཏེ་སྲིད་གཞུང་སྡེ་ཁག་དང་མཉམ་ལས་བརྗེ་རེས་ཟབ་མོ་བྱེད་པ་དང་། ཤེས་བྱའི་ཐོན་དབང་གི་ཁྱབ་ཁོངས་གསར་པ་དང་ཐོན་ལས་དང་ལས་རིགས་གཙོ་བོར་མཁོ་བའི་ཤེས་བྱའི་ཐོན་དབང་གི་དོ་དམ་འཇོན་མི་དང་འཁོར་སྐྱོད་འཇོན་མི། དབྱེ་ཞིབ་འཇོན་མི། ཆ་འཕྲིན་འཇོན་མི་སོགས་སྤུས་ཚད་མཐོ་བའི་འཇོན་མི་སྐོར་ཞིག་གསོ་སྐྱོང་བྱེད་པ་དང་མཚོ་སྔོན་གྱི་ཤེས་བྱའི་ཐོན་དབང་སློབ་གླིང་བཟང་བོར་གཉེར་ནས་ཤེས་བྱའི་ཐོན་དབང་གི་སྟོབས་ལྡན་ཞིང་ཆེན་དང་དེང་རབས་ཅན་གྱི་མཚོ་སྔོན་གསར་པ་མྱུར་དུ་འཛུགས་སྐྲུན་བྱེད་པར་རིག་སྟོབས་ཀྱི་འདེགས་སྐྱོར་འདོན་སྤྲོད་བྱ་རྒྱུ་རེད།
ཞིང་ཆེན་ཁྲོམ་ར་ལྟ་སྐུལ་དོ་དམ་ཅུའུ་ཤེས་བྱའི་ཐོན་དབང་ཅུའུ་ཡིས་སློབ་གླིང་གི་འཛུགས་སྐྲུན་ལ་སྟོབས་ཤུགས་ཡོད་རྒུས་རྒྱབ་སྐྱོར་བྱེད་པ་དང་། སྲིད་ཇུས་ཀྱི་རྒྱབ་སྐྱོར་དང་འཇོན་མི་གསོ་སྐྱོང་། ཚན་ཞིབ་གསར་གཏོད། དྲིལ་སྒྲོག་སློབ་གསོ་སོགས་ཕྱོགས་ནས་མཉམ་ལས་ཇེ་དྲག་ཏུ་གཏོང་བ། སྦྲེལ་ཐག་ཡོངས་ཀྱི་འཇོན་མི་གསོ་སྐྱོང་འདེགས་སྐྱོར་མཉམ་དུ་ཇེ་དྲག་ཏུ་གཏོང་བ། ཤེས་བྱའི་ཐོན་དབང་གི་རིམ་པ་མཐོ་བ་དང་སྣ་མང་མཉམ་འདུས་ཀྱི་འཇོན་མི་གསོ་སྐྱོང་བྱེད་པའི་བྱེད་ཐབས་གསར་པ་བཏོད་པ། ཁྱད་ཆོས་མངོན་གསལ་དང་ཚན་རིག་ལྟར་དོ་དམ། གྲུབ་འབྲས་མངོན་གསལ་བཅས་ཀྱི་ཤེས་བྱའི་ཐོན་དབང་སློབ་གསོའི་ཞིབ་འཇུག་རྟེན་གཞི་མཉམ་དུ་བསྐྲུན་ནས་ཤེས་བྱའི་ཐོན་དབང་གི་སྟོབས་ལྡན་ཞིང་ཆེན་འཛུགས་སྐྲུན་བྱེད་པར་ཤེས་རིག་དང་སྟོབས་ཤུགས་འབུལ་རྒྱུ་རེད།
ལྷ་མོ་ཚེ་རིང་གིས་བསྒྱུར།