ད་ལོར། རྨ་ལྷོ་བོད་རིགས་རང་སྐྱོང་ཁུལ་སྡོད་ཁང་དང་གྲོང་གསེབ་འཛུགས་སྐྲུན་ཅུའུ་ཡིས་དབུལ་ཐར་མཁྲེགས་གཏོར་གྲུབ་འབྲས་སྲ་བརྟན་དང་རྒྱ་སྐྱེད་གཏོང་བ་དེ་གྲོང་གསེབ་དར་སྤེལ་དང་སྦྲེལ་མཐུད་ནུས་ལྡན་བྱེད་པའི་བཀོད་སྒྲིག་བླང་བྱ་ལག་བསྟར་དོན་འཁྱོལ་ནན་མོ་བྱས་པ་དང་། ཞིང་པའི་སྡོད་ཁང་གི་ཡོམ་འགོག་སྔོན་ཚོར་ནུས་པ་ཇེ་ཆེར་གཏོང་བ་དང་ཞིང་པའི་སྡོད་ཁང་འཛུགས་སྐྲུན་རྣམ་པ་ཇེ་ལེགས་སུ་གཏོང་བ་གཉིས་གཙོ་གནད་དུ་བཟུང་སྟེ། རོང་འབྲོག་མང་ཚོགས་ཀྱི་སྡོད་ཁང་གི་བདེ་འཇགས་ལ་ནུས་ཤུགས་ཡོད་རྒུས་འགན་སྲུང་བྱས། ཟླ5པའི་ཚེས17ཉིན་བར། ཁྱོན་བསྡོམས་སྒོར་ཐེར་འབུམ་གཅིག་དང་དུང་ཕྱུར་གཅིག་བྱེ་བ་གཉིས་ས་ཡ་དགུའི་མ་རྩ་བཏང་ལ། རོང་འབྲོག་མང་ཚོགས་ཁྱིམ་ཚང་ཁྲི་གཉིས་དང་སྟོང་བཞི་དྲུག་བརྒྱ་ཉེར་བཞིའི་ཉེན་ཁ་ཆེ་བའི་སྡོད་ཁང་བསྒྱུར་བཀོད་བྱས་པ་དང་། གཞིས་སྡོད་ཆ་རྐྱེན་ལེགས་སྒྱུར་བྱས་པའི་ལས་གཞིའི་ཁྱིམ་ཚང་ཁྲི་གཅིག་དང་སྟོང་བཞི་སུམ་བརྒྱ་སོ་བརྒྱད་ཡོད་དེ། ཁུལ་ཡོངས་ཀྱི་ཞིང་སྡེའི་སྡོད་ཁང་གི་ཆ་རྐྱེན་དང་གཞིས་སྡོད་ཁོར་ཡུག་ལ་འགྱུར་ལྡོག་མངོན་གསལ་བྱུང་ཞིང་། གྲོང་གསེབ་རྣམ་པའི་ཆུ་ཚད་མཐོར་འདེགས་མངོན་གསལ་བྱུང་།
རྨ་ལྷོ་ཁུལ་གྱིས་གྲོང་ཁྱེར་དང་རྫོང་། ཡུལ་ཚོ་དང་གྲོང་རྡལ་བཅས་རྩ་འཛུགས་བྱས་ནས་རོང་འབྲོག་མང་ཚོགས་ཀྱི་སྡོད་ཁང་བདེ་འཇགས་ཀྱི་སྤུས་ཚད་ལྟ་སྐུལ་ཚན་ཆུང་བཙུགས་པ་དང་། སྡེ་བའི་ཨུ་ཡོན་ལྷན་ཁང་གཉིས་དང་ཏང་ཡོན་ལས་བྱེད་པར་སྐུལ་སློང་བྱས་ཏེ་ས་ཁུལ་སོ་སོའི་ཁྱད་ཆོས་ལྟར་རོང་འབྲོག་མང་ཚོགས་ཀྱི་སྡོད་ཁང་བདེ་འཇགས་ལས་གཞི་འཛུགས་སྐྲུན་དང་འགུལ་རྣམ་རྟོག་ཞིབ་ཚད་འཇལ་ལ་རོགས་སྐྱོར་བྱས་ཤིང་། མཐུན་སྦྱོར་ལ་འགན་འཁུར་བ་དང་ལས་གཞི་ལག་བསྟར་ལ་སྐུལ་འདེད་གཏོང་བའི་མི་སྣ་ཆེད་དུ་བཀོད་སྒྲིག་བྱས་པ་དང་། རོང་འབྲོག་མང་ཚོགས་ཀྱི་སྡོད་གནས་ཆ་རྐྱེན་ལེགས་སྒྱུར་དང་། ཉེན་ཁ་ཆེ་བའི་ཁང་བ་བསྒྱུར་བཀོད་ལས་གཞི་འཛུགས་སྐྲུན་དེ་རོང་འབྲོག་ཁུལ་གྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་དང་ཆུ་ཚད་མཐོ་བའི་འཚོ་བ་བསྐྲུན་པའི་དམངས་ཚིས་ཀྱི་ལས་གཞི་དང་དམངས་སེམས་ཀྱི་ལས་གཞིར་འགྱུར་རྒྱུ་རེད།
གསར་འགོད་པས་རྒྱུས་ལོན་བྱུང་བ་ལྟར་ན། ལས་གཞི་འཛུགས་སྐྲུན་དེ་སྡོད་ཁང་བདེ་འཇགས་བསྒྱུར་བཀོད་དང་། གློག་གི་ཚ་ཐབ། གྱང་ངོས་ཆུ་འགོག ཕྱི་གྱང་གིས་དྲོད་སྲུང་བ་སོགས་གཙོ་གནད་དུ་བཟུང་ཞིང་། འཛུགས་སྐྲུན་རྒྱུ་ཆ་ཚང་མ་དཔེ་འདེམས་ཚད་ལེན་གྱི་ཚད་གཞིར་ལོངས་རྗེས་ལས་གཞིའི་ར་བར་སྐྱེལ་ཡོང་སྟེ། ལས་གཞིའི་སྤུས་ཚད་བདེ་འཇགས་ལ་ཁག་ཐེག་བྱས། ལས་གཞི་ལག་བསྟར་བྱེད་པའི་བརྒྱུད་རིམ་ཁྲོད་རང་འགུལ་གྱིས་སྡེ་བའི་ཨུ་ཡོན་ལྷན་ཁང་གཉིས་དང་སྡེ་དམངས་ཀྱི་འཐུས་ཚབ་པ་གདན་ཞུ་བྱས་ནས་འཛུགས་སྐྲུན་གྱི་བརྒྱུད་རིམ་ཧྲིལ་བོར་ལྟ་སྐུལ་བྱས།
དེ་ལས་གཞན། རྨ་ལྷོ་ཁུལ་གྱིས་ཞིང་སྡེའི་སྡོད་ཁང་བདེ་འཇགས་འགན་ལེན་གྱི་འགུལ་རྣམ་རྟོག་ཞིབ་དང་ཚད་འཇལ་ལ་སྐུལ་འདེད་ཏན་ཏིག་བཏང་ཞིང་། འགུལ་རྣམ་གྱི་ཞིང་སྡེའི་ཉེན་ཁ་ཆེ་བའི་སྡོད་ཁང་བསྒྱུར་བཀོད་རྩིས་ཐོ་གསར་བ་ཁ་སྣོན་བྱས་པ་དང་། མིག་སྔར། ཁུལ་ཡོངས་ཀྱི་རོང་འབྲོག་ཁྱིམ་ཚང་ཁྲི་ལྔ་དང་སྟོང་ལྔ་དང་སུམ་བརྒྱ་ང་བཞིའི་སྡོད་ཁང་བདེ་འཇགས་འགན་ལེན་གྱི་གྲལ་བཤེར་ཆེན་པོ་དང་། སྒྲིག་བཅོས་ཆེན་པོ། མཐོར་འདེགས་གཏོང་བ་བཅས་ཀྱི་བྱ་བ་ཡོངས་སུ་འགྲུབ་ཅིང་། སྡོད་ཁང་བདེ་འཇགས་ཀྱི་གསལ་འབྱེད་ཡིག་ཆ་དང་སྡོད་ཁང་བདེ་འཇགས་ཚད་རིམ་མཚོན་རྟགས་བཅས་ཁྱིམ་ཚང་ཚང་མར་འགྲེམ་སྤེལ་བྱས་ཡོད།
ལྷ་མོ་འཚོས་བསྒྱུར།
