ཟླ7པའི་ཚེས16ཉིན། གསར་འགོད་པས་མཚོ་སྔོན་ཞིང་ཆེན་མི་དམངས་སྲིད་གཞུང་གསར་འགྱུར་གཞུང་སྒྲུབ་ཁང་ནས་བསྡུས་པའི་མགོ་ལོག་བོད་རིགས་རང་སྐྱོང་ཁུལ་བཙུགས་ནས་ལོ་བདུན་ཅུ་འཁོར་བའི་གསར་འགྱུར་སྒྲོག་སྤེལ་ཚོགས་འདུའི་སྟེང་རྒྱུས་ལོན་བྱུང་བ་ལྟར་ན། 2010ལོར་ཧྲང་ཧའེ་གྲོང་ཁྱེར་གྱིས་མཚོ་སྔོན་ཞིང་ཆེན་མགོ་ལོག་བོད་རིགས་རང་སྐྱོང་ཁུལ་ལ་ཁ་གཏད་རོགས་སྐྱོར་བྱས་པའི་ཚུན་དུ། སྔ་གཞུག་ཏུ་མཚོ་སྔོན་ལ་རོགས་སྐྱོར་བྱེད་པའི་ལས་བྱེད་པ་དང་འཇོན་མི་སྐོར་ཁག་ལྔས་འགྲོ་འོང་བརྗེ་རེས་དང་མཉམ་བསྲེས། དམངས་ཚིས་འགན་སྲུང་དང་ལེགས་སྒྱུར། ལས་བྱེད་པ་དང་འཇོན་མིའི་བརྗེ་རེས་མཉམ་ལས། ཐོན་ལས་རོགས་སྐྱོར་གྱིས་ལས་ཞུགས་ལ་སྐུལ་འདེད་གཏོང་བ། རིག་གནས་སློབ་གསོའི་རོགས་སྐྱོར་སོགས་གཙོ་གནད་ཁྱབ་ཁོངས་ལ་དམིགས་ནས། མགོ་ལོག་གིས་དུས་བཀག་ལྟར་དབུལ་ཐར་མཁྲེགས་གཏོར་གྱི་རྒྱལ་ཁ་ལེན་པར་རོགས་འདེགས་བྱས་པ་དང་། དབུལ་ཐར་མཁྲེགས་གཏོར་གྱི་གྲུབ་འབྲས་སྲ་བརྟན་དང་རྒྱ་སྐྱེད་གཏོང་བ་དང་གྲོང་གསེབ་དར་སྤེལ་གཉིས་ཕན་ཡོད་སྦྲེལ་མཐུད་བྱེད་པའི་བྱ་བ་རྒྱུན་མཐུད་ངང་བཟང་བོར་བསྒྲུབས། མིག་སྔར། བསྡོམས་པས་རོགས་སྐྲུན་ལས་གཞི་སྟོང་གཅིག་དང་ཉེར་གསུམ་ལག་བསྟར་བྱས་པ་དང་། བསྡོམས་པས་མ་དངུལ་སྒོར་ཐེར་འབུམ་གསུམ་དང་དུང་ཕྱུར་བདུན་ས་ཡ་གསུམ་བྱེ་བ་བརྒྱད་བཏང་ལ། དེའི་ཁྲོད་ཀྱི་བརྒྱ་ཆའི་བརྒྱད་ཅུའི་ཡན་དམངས་ཚིས་ལས་དོན་ཐད་བཏང་།

མགོ་ལོག་ཁུལ་མི་དམངས་སྲིད་གཞུང་གི་ཁུལ་དཔོན་གཞོན་པ་ཚའོ་ཧྥ་ཧྲན་གྱིས་ངོ་སྤྲོད་བྱས་པ་ལྟར་ན། 2022ལོའི་ཟླ8པར་སྐོར་ཁག་ལྔ་བའི་ཧྲང་ཧའེ་ཡི་མཚོ་སྔོན་ལ་རོགས་སྐྱོར་བྱེད་པའི་རུ་ཁག་གིས་མགོ་ལོག་ལ་རོགས་སྐྱོར་བྱས་པའི་ཚུན་དུ། ཁེ་ལས་མགོ་ལོག་ནང་འདྲེན་བྱས་ནས་འཕེལ་རྒྱས་སུ་བཏང་བ་དང་། མགོ་ལོག་གི་རང་ས་གནས་ཀྱི་ཞིང་ཕྱུགས་ཐོན་རྫོས་ཚད་གཞི་ཅན་དང་ཚོང་རྟགས་ཅན། ཚོང་རྫས་ཅན་དུ་བསྒྱུར་བར་སྐུལ་འདེད་བཏང་། དག་གཙང་ནུས་ཁུངས་དང་ཤར་གྲངས་ནུབ་རྩིས་ཀྱི་མཉམ་ལས་མ་དཔེ་གསར་བ་འཚོལ་ཞིབ་བྱས་པ་དང་། རི་བོ་གཉིས་ཐོན་སྐྱེད་ནུས་ཤུགས་གསར་མར་བསྒྱུར་བར་ཕན་པ་ཡོད་པའི་བྱ་བའི་རྐྱེན་སྲོལ་གྲུབ་པར་བྱས། ཟླ6པའི་ནང་ཧྲང་ཧའེ་རུ་མཚོ་སྔོན་ཞིང་ཆེན་གྱི་ལྗང་མདོག་རྩིས་ནུས་ཚོང་འགུག་ངོ་སྤྲོད་གྲོས་ཚོགས་བསྡུས། སྡེ་བ་དང་གཞིས་ཁུལ་ཉི་ཤུ་ཙམ་གྱི་མི་སྡོད་ཁོར་ཡུག་ལེགས་བསྒྱུར་བྱས་པ་དང་། གྲོང་གསེབ་ཀྱི་ཐོན་ལས་དང་འཇོན་མི། རིག་གནས། སྐྱེ་ཁམས། རྩ་འཛུགས་བཅས་ཕྱོགས་ཡོངས་ནས་དར་སྤེལ་གཏོང་བར་སྐུལ་འདེད་བཏང་། 2023ལོར་ངལ་རྩོལ་པ་ཉིས་བརྒྱ་དང་ཉེར་དགུ་ཕྱིར་མངགས་ལས་ཞུགས་བྱས་པ་དང་། ད་ལོར་ལས་རིགས་སློབ་གླིང་གི་མཐར་ཕྱིན་སློབ་མ་བརྒྱ་དང་རེ་བརྒྱད་ཧྲང་ཧའེ་རུ་མངག་ནས་ཚོགས་སྒྲིག་རང་བཞིན་གྱི་ལས་ཞུགས་མངོན་འགྱུར་བྱས། ཚོགས་སྒྲིག་རང་བཞིན་གྱི་རོགས་སྐྱོར་གྱི་ཁྱད་ཆོས་དང་དགེ་མཚན་འདོན་སྤེལ་གང་ལེགས་བྱས། མགོ་ལོག་སྨན་བཅོས་མྱུར་སྐྱོབ་མ་ལག་ལེགས་སྒྱུར་བྱས་པ་དང་། དུས་ཚོད་གཉིས་ཀྱི་བྲེལ་ཉེན་ཆེ་བའི་ནད་ལྕི་མོའི་མྱུར་སྐྱོབ་ཚོགས་སྤྱི་བཙུགས་ལ། ཉིན་རྒྱུན་དུ་སྨན་བཅོས་ཆེད་མཁས་པ་རྩ་འཛུགས་བྱས་ནས་མགོ་ལོག་ཏུ་མངག་སྟེ་རིགས་མི་འདྲ་བའི་འོས་འགན་སྨན་བཅོས་བྱ་འགུལ་སྤེལ། མཉམ་འབྲེལ་སྒོས་སློབ་གསོ་སྤུས་ཚད་མཐོ་བའི་ངང་འཕེལ་རྒྱས་སུ་གཏོང་བར་སྐུལ་འདེད་བཏང་བ་དང་། ཁུལ་མི་རིགས་མཐོ་རིམ་སློབ་འབྲིང་དང་ཁུལ་རྟ་བོ་མི་རིགས་སློབ་འབྲིང་། མགོ་ལོག་ཟི་ལིང་མི་རིགས་སློབ་འབྲིང་བཅས་སློབ་གྲྭ་གསུམ་གྱི་འཕེལ་རྒྱས་མནའ་འབྲེལ་བཙུགས།

དེ་དང་མཉམ་དུ། འགྲོ་འོང་བརྗེ་རེས་དང་མཉམ་བསྲེས་་གཏིང་ཟབ་ཏུ་སྤེལ་བ་འབུར་དུ་ཐོན་པར་བྱས། རྨ་ཆུ་ནས་འབྲི་ཆུའི་བར་ཞེས་པའི་མི་རིགས་རོལ་དབྱངས་རྒྱལ་ཡོངས་སྐོར་འཁྲབ་བསྡུས་པར་མ་ཟད། རོལ་དབྱངས་ཀྱི་ཏང་གི་སློབ་ཁྲིད་ཀྱི་རྣམ་པས་ཁུལ་ནང་གི་རྫོང་སོ་སོ་རུ་སྐོར་སྐྱོད་འཁྲབ་སྟོན་སྤེལ། ཀྲུང་གོའི་བོད་རིགས་ན་གཞོན་ལོ་ཆུང་གི་འབུད་གཏོང་རོལ་ཚོགས་བཙུགས་པར་མ་ཟད། ཀྲུང་གོའི་སྐབས་བཅུ་བདུན་པའི་ཕུལ་བྱུང་འབུད་གཏོང་རོལ་ཚོགས་ཀྱི་འཁྲབ་འགྲེམ་ཁྲོད་ཀྲུང་ཧྭ་རྟགས་མའི་ཕུལ་བྱུང་འཁྲབ་འགྲེམ་རུ་ཁག་གི་བྱ་དགའ་ཐོབ།

རིན་ཆེན་མཚོས་བསྒྱུར།