ཟླ8པའི་ཚེས2ཉིན། ཞིང་ཆེན་ཏང་ཨུའི་འཐབ་ཕྱོགས་གཅིག་གྱུར་པུའུ་ཡིས་དམངས་གཙོ་ཏང་ཁག་དང་ཏང་ཁག་གང་ལ་ཡང་མི་གཏོགས་པའི་མི་སྣའི་སྒྲིག་ཁྲིམས་སློབ་སྦྱོང་སློབ་གསོའི་སྐུལ་སྤེལ་གྲོས་ཚོགས་བསྡུས། གསར་འགོད་པས་ཚོགས་ཐོག་ནས་རྒྱུས་ལོན་བྱུང་བ་ལྟར་ན། ད་ལོའི་ཟླ6པའི་ནང་དམངས་གཙོ་ཏང་ཁག་དང་ཏང་ཁག་གང་ལ་ཡང་མི་གཏོགས་པའི་མི་སྣའི་སྒྲིག་ཁྲིམས་སློབ་སྦྱོང་སློབ་གསོ་སྤེལ་བའི་་ཚུན་དུ། རང་ཞིང་གི་དམངས་གཙོ་ཏང་ཁག་སོ་སོ་དང་ཏང་ཁག་གང་ལ་ཡང་མི་གཏོགས་པའི་མི་སྣས་རྩ་འཛུགས་འགོ་ཁྲིད་ལ་ཤུགས་བསྣན་པ་དང་ཐབས་མང་མཉམ་སྤྱོད་ཀྱིས་སྐུལ་འདེད་བཏང་ལ། ལས་འགན་ལག་བསྟར་བྱེད་རྒྱུ་དམ་འཛིན་བྱས་ནས། སྒྲིག་ཁྲིམས་སློབ་སྦྱོང་སློབ་གསོའི་ཐད་ནས་དུས་རིམ་རང་བཞིན་གྱི་གྲུབ་འབྲས་བླངས།

ཟླ6པའི་ཟླ་སྟོད་དུ། ཞིང་ཆེན་ཏང་ཨུའི་འཐབ་ཕྱོགས་གཅིག་གྱུར་པུའུ་ཡིས་དམངས་གཙོ་ཏང་ཁག་སོ་སོ་དང་ཏང་ཁག་གང་ལ་ཡང་མི་གཏོགས་པའི་མི་སྣས་སྒྲིག་ཁྲིམས་སློབ་སྦྱོང་སློབ་གསོ་སྤེལ་བར་རྒྱབ་སྐྱོར་བྱེད་པའི་སྐོར་གྱི་ཇུས་གཞི་པར་འགྲེམ་བྱས་པ་དང་། དམངས་གཙོ་ཏང་ཁག་སོ་སོའི་མཚོ་སྔོན་ཞིང་ཆེན་ཨུ་ཡོན་ལྷན་ཁང་དང་ཏང་ཁག་གང་ལ་ཡང་མི་གཏོགས་པའི་མི་སྣས་མྱུར་དུ་དང་ལེན་བྱས་ནས། བྱ་བའི་ལས་ཁུངས་བཙུགས་པ་དང་འགན་འཁྲི་མི་སྣ་དང་པོ་གཏན་ཁེལ་བྱས་ལ། བྱ་བའི་ཇུས་གཞི་གཏན་འབེབས་བྱས་པ་དང་སྐུལ་སློང་བཀོད་སྒྲིག་གྲོས་ཚོགས་བསྡུས་ཤིང་། གཅིག་འདོམས་མཐུན་སྦྱོར་དང་ལྟ་སྐུལ་མཛུབ་སྟོན་ལ་ཤུགས་བསྣན་ནས། སྒྲིག་ཁྲིམས་སློབ་སྦྱོང་སློབ་གསོ་བརྟན་བརླིང་དང་གོ་རིམ་ལྡན་པའི་ངང་སྤེལ་བར་ཁག་ཐེག་བྱས། དམངས་གཙོ་ཏང་ཁག་སོ་སོའི་མཚོ་སྔོན་ཞིང་ཆེན་ཨུ་ཡོན་ལྷན་ཁང་གིས་སློབ་སྦྱོང་གི་གཙོ་གནད་འབུར་དུ་ཐོན་པར་བྱས་པ་དང་སློབ་སྦྱོང་གི་རྣམ་པ་ཕུན་སུམ་ཇེ་ཚོགས་སུ་བཏང་ལ། སློབ་སྦྱོང་གི་ཟབ་ཚད་རྒྱ་བསྐྱེད་པ་དང་། དགུ་གསུམ་སློབ་ཚོགས་མཚོ་སྔོན་ཞིང་ཆེན་ཨུ་ཡོན་ལྷན་ཁང་གི་འགོ་ཁྲིད་ཀྱིས་སྣེ་ཁྲིད་དེ་སློབ་སྦྱོང་བྱེད་པ་དང་ལས་ཁུངས་ཀྱི་མཉམ་དུ་སློབ་སྦྱོང་བྱེད་པ། རིམ་པ་བགོས་ནས་ཞིབ་སློབ་བྱེད་པའི་མ་དཔེ་སྤྱད་དེ་སློབ་སྦྱོང་གཏིང་ཟབ་ཏུ་སྤེལ། ཀྲུང་གོ་དམངས་གཙོ་མནའ་མཐུན་མཚོ་སྔོན་ཞིང་ཆེན་ཨུ་ཡོན་ལྷན་ཁང་དང་ཞིང་བཟོ་ཏང་མཚོ་སྔོན་ཞིང་ཆེན་ཨུ་ཡོན་ལྷན་ཁང་གིས་ལག་དེབ་སྒྲིག་བཟོ་པར་སྐྲུན་བྱས་ནས། ཞིང་ཆེན་ཨུ་ཡོན་ལྷན་ཁང་གི་ཨུ་ཡོན་དང་གཞི་རིམ་རྩ་འཛུགས། ཞིང་ཆེན་ཨུ་ཡོན་ལྷན་ཁང་གི་ལས་ཁུངས་བཅས་ལ་ལག་དེབ་བདུན་བརྒྱ་ལྷག་བྱིན། ཀྲུང་གོ་གོ་མིན་ཏང་གསར་བརྗེ་ཨུ་ཡོན་ལྷན་ཁང་མཚོ་སྔོན་ཞིང་ཆེན་ཨུ་ཡོན་ལྷན་ཁང་དང་ཀྲུང་གོ་དམངས་གཙོ་རྒྱལ་འཛུགས་ལྷན་ཚོགས་མཚོ་སྔོན་ཞིང་ཆེན་ཨུ་ཡོན་ལྷན་ཁང་གིས་སྨྱན་བྱད་གསར་པའི་སྟེགས་བུ་ལ་བརྟེན་ནས་སྒྲིག་ཁྲིམས་སློབ་སྦྱོང་ཐད་ཀྱི་ཤེས་དགོས་པའི་ཆེད་དོན་ལེ་ཚན་དང་སྒྲིག་ལམ་སློབ་སྦྱོང་ཆེད་དོན་ལེ་ཚན་བཙུགས་ཏེ། རྒྱ་ཆེའི་ཏང་ཡོན་དང་ཚོགས་མི་ལ་སློབ་སྦྱོང་གི་ཡིག་ཆ་དང་ཉམས་མྱོང་བྱེད་ཐབས། གཞུང་ལུགས་བགྲོ་གླེང་རྩོམ་ཡིག སློབ་སྦྱོང་བརྙན་རིས་བརྒྱུད་སྐྱེལ་བྱས། དམངས་གཙོ་ཏང་ཁག་སོ་སོའི་མཚོ་སྔོན་ཞིང་ཆེན་ཨུ་ཡོན་ལྷན་ཁང་གིས་ཟབ་སྒྱུར་དང་ནང་སྒྱུར། ཚུལ་སྒྱུར་སྟེང་ཤུགས་བཏོན་ཏེ། སྒྲིག་ཁྲིམས་སློབ་སྦྱོང་སློབ་གསོའི་ཐད་ནས་ཐོག་མའི་གྲུབ་འབྲས་བླངས། ཀྲུང་གོ་གོ་མིན་ཏང་གསར་བརྗེ་ཨུ་ཡོན་ལྷན་ཁང་མཚོ་སྔོན་ཞིང་ཆེན་ཨུ་ཡོན་ལྷན་ཁང་གིས་སྙན་སེང་འབུལ་བའི་འགྲོ་ལུགས་སྒྲུབ་པ་དང་ཚད་ལྡན་སྒོས་རྟོག་ཞིབ་གྲོན་དངུལ་བཀོལ་སྤྱོད་བྱེད་པ། རྟོག་ཞིབ་འཚམས་འདྲིའི་ནང་དོན་ལེགས་སྒྱུར་བྱེད་པ་སོགས་ནས་འགོ་བརྩམས་ཏེ། གཞི་རིམ་དུ་སོང་ནས་རྟོག་ཞིབ་བྱ་འགུལ་སྤེལ་བའི་སྒྲིག་ལམ་ཇེ་དམ་དུ་བཏང་། ཀྲུང་གོ་དམངས་གཙོ་རྒྱལ་འཛུགས་ལྷན་ཚོགས་མཚོ་སྔོན་ཞིང་ཆེན་ཨུ་ཡོན་ལྷན་ཁང་གིས་སྒྲིག་ཁྲིམས་སློབ་སྦྱོང་སློབ་གསོ་ལ་ཟུང་འབྲེལ་བྱས་ནས་ནང་ཁུལ་ལྟ་སྐུལ་ཨུ་ཡོན་ལྷན་ཁང་གི་བྱ་བ་ཚད་ལྡན་དུ་བསྒྱུར་བ་དང་། ནང་ཁུལ་ལྟ་སྐུལ་ཨུ་ཡོན་ལྷན་ཁང་གི་བྱ་བའི་སྒྲིག་ལམ་དང་ནང་ཁུལ་ལྟ་སྐུལ་ཨུ་ཡོན་ལྷན་ཁང་གཞུང་སྒྲུབ་ཁང་གི་བྱ་བའི་ལམ་ལུགས་སོགས་ལམ་ལུགས་གཏན་འབེབས་བྱས། ཞིང་ཆེན་ཏང་ཕྱིའི་ཤེས་ལྡན་མི་སྣའི་མཉམ་འབྲེལ་ལྷན་ཚོགས་ཀྱིས་ཆེད་དོན་གསོ་སྦྱོང་སྤེལ་སྐབས། ཏང་ཁག་གང་ལ་ཡང་མི་གཏོགས་པའི་མི་སྣ་སྐོར་ཞིག་གིས་རང་སྟེང་གི་ཆེད་ལས་དགེ་མཚན་ལ་ཟུང་འབྲེལ་བྱས་ནས་ཞིང་ཆེན་ཏང་ཨུའི་འཐབ་ཕྱོགས་གཅིག་གྱུར་པུའུ་ལ་སྤྱི་ཚོགས་གནས་ཚུལ་དང་དམངས་ཀྱི་འདོད་བློ་དང་རྟོག་ཞིབ་ཀྱི་སྙན་ཞུ་མང་པོ་སྤྲད།

རིན་ཆེན་མཚོས་བསྒྱུར།