ཉེ་ཆར། མཚོ་སྔོན་ཞིང་ཆེན་གྱི་སློབ་གྲྭ་ཆུང་འབྲིང་གི་སློབ་ཁྲིད་ཞིབ་འཇུག་དང་དགེ་རྒན་འཕེལ་རྒྱས་ལྟེ་གནས་ཀྱིས་མི་དམངས་སློབ་གསོའི་དཔེ་སྐྲུན་ཁང་དང་། མཚོ་སྔོན་མི་དམངས་དཔེ་སྐྲུན་ཁང་ཚད་ཡོད་ཀུང་ཟི་གཉིས་ལ་མཉམ་འབྲེལ་བྱས་ནས་གཙོ་སྒྲུབ་བྱས་པའི་མཚོ་སྔོན་ཞིང་ཆེན་གྱི་སློབ་གྲྭ་ཆུང་འབྲིང་གི་བསམ་བློ་ཆབ་སྲིད་སློབ་ཁྲིད་འགྲེམ་སྟོན་ལྟ་སྦྱོང་ཞིབ་སྦྱོང་བྱ་འགུལ་དེ་མགོ་ལོག་ཟི་ལིང་མི་རིགས་སློབ་འབྲིང་དུ་སྤེལ། གྲོང་ཁྱེར་དང་ཁུལ། རྫོང་དང་ཆུས་སོ་སོ་དང་། ཞིང་ཆེན་ཐད་གཏོགས་ཀྱི་སློབ་གྲྭ་སོ་སོའི་ཆེད་བསྐོས་དང་ཞོར་འགན་ཁུར་བའི་བསམ་བློ་ཆབ་སྲིད་ཁྲིད་དཔྱོད་མཁན་དང་སློབ་ཁྲིད་རྐང་འཛིན་པ་མི་ཐེངས་ཁྲི་གཅིག་དང་སྟོང་གསུམ་དགུ་བརྒྱ་ལྷག་གིས་དྲ་ཐོག་དང་ཡུལ་དངོས་བརྒྱུད་ནས་ཐེངས་འདིའི་ཞིབ་སྦྱོང་བྱ་འགུལ་ལ་ཞུགས་པ་དང་། མཉམ་དུ་བསམ་བློ་ཆབ་སྲིད་ཀྱི་དགྱེས་སྟོན་ཞིག་ལ་རོལ་མྱོང་བྱས།

ཆེད་མཁས་པས་འཆད་ཁྲིད་བྱེད་སྐབས། ཧྲང་ཧེ་ནས་མཚོ་སྔོན་ལ་རོགས་སྐྱོབ་བྱེད་པར་ཡོང་བའི་དགེ་རྒན། མགོ་ལོག་ཟི་ལིང་མི་རིགས་སློབ་འབྲིང་གི་སློབ་གཙོ་ཁྲང་ཐུའུ་ཡིས་སློབ་གྲྭའི་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སྲ་བརྟན་གཏོང་བའི་ལག་ལེན་འཚོལ་ཞིབ་ལ་རྐང་བཙུགས་ཏེ། ཁ་བྱང་ལ་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་དེ་གངས་ལྗོངས་བྱིས་པའི་སེམས་ཁོང་དུ་ཟུག་པར་བྱེད་དགོས་ཞེས་པའི་ཆེད་དོན་འཆད་ཁྲིད་སྤེལ། པེ་ཅིང་ནས་ཡོང་བའི་མི་རིགས་སློབ་གསོའི་དཔེ་སྐྲུན་ཁང་གི་གསབ་སྦྱོང་ཆེད་ལས་དགེ་རྒན་གྱིས་དུས་རབས་གསར་བའི་འདུ་ཤེས་གསར་བ་དང་། བསླབ་ཚད་གསར་བ་དང་བསླབ་གཞི་གསར་བའི་ཆ་རྐྱེན་འོག་གི་བསམ་བློ་ཆབ་སྲིད་སློབ་ཁྲིད་ཀྱི་འགྱུར་ལྡོག་གསར་བར་ཟུང་འབྲེལ་བྱས་ནས། ཁ་བྱང་ལ་བསམ་བློ་ཆབ་སྲིད་སློབ་ཁྲིད་གཞི་གཅིག་ཅན་གྱི་འཛུགས་སྐྲུན་ལ་ཤུགས་སྣོན་པ་དང་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སྲ་བརྟན་དུ་གཏོང་དགོས་ཞེས་པའི་ཆེད་དོན་འཆད་ཁྲིད་སྤེལ། བསླབ་གཞི་འགྲེམ་སྟོན་བྱེད་སྐབས། ལས་ཡུལ་དང་པོ་ནས་ཡོང་བའི་བསམ་བློ་ཆབ་སྲིད་དགེ་རྒན་བཞི་ཡིས་སློབ་ཆུང་དང་། དམའ་འབྲིང་སློབ་རིམ། མཐོ་འབྲིང་སློབ་རིམ་བཅས་ལ་ཁེབས་པའི་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སྲ་བརྟན་གཏོང་བའི་བརྗོད་དོན་སློབ་གསོའི་དཔེ་སྟོན་སློབ་ཁྲིད་འགྲེམ་སྟོན་བྱས་ནས། བསླབ་ཚད་གསར་བའི་འདུ་ཤེས་དོན་འཁྱོལ་གང་ལེགས་བྱས། ཆེད་མཁས་པས་གདེང་འཇོག་བྱེད་སྐབས། ཡུལ་དངོས་ཀྱི་དགེ་རྒན་དང་ཆེད་མཁས་པས་གཏམ་བརྗོད་སྤེལ་ནས། རང་གི་ཉམས་མྱོང་དང་བསམ་ཚུལ་མཉམ་སྤྱོད་བྱས་པ་དང་། བསམ་བློ་ཆབ་སྲིད་བསླབ་ཚན་གྱི་སྤུས་ཀ་ཇེ་ལེགས་དང་ཕན་འབྲས་ཇེ་མཐོར་གཏོང་བར་སྐུལ་འདེད་བཏང་།

བསམ་བློ་ཆབ་སྲིད་སློབ་ཁྲིད་ནི་ཀུན་སྤྱོད་ལ་བརྟེན་ནས་མི་སྐྱོང་བའི་ལས་འགན་གཙོ་བོ་ལག་བསྟར་བྱེད་པའི་འགག་རྩའི་བསླབ་ཚན་ཡིན་ལ། སློབ་ཆུང་དང་སློབ་འབྲིང་། སློབ་ཆེན་བཅས་སློབ་རིམ་མི་འདྲ་བར་རིམ་བཞིན་བསམ་བློ་ཆབ་སྲིད་སློབ་ཁྲིད་ལེགས་པོ་འཚོགས་པ་ནི་མི་རབས་ནས་མི་རབས་སུ་སྤྱི་ཚོགས་རིང་ལུགས་འཛུགས་སྐྲུན་མཁན་དང་རྒྱུན་འཛིན་མཁན་སྐྱེད་སྲིང་བྱེད་པའི་འགན་ལེན་གལ་ཆེན་ཡིན། ཐེངས་འདིའི་བྱ་འགུལ་སྟེང་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སྲ་བརྟན་གཏོང་བ་བརྗོད་དོན་དུ་བྱས་ཤིང་། དེའི་དམིགས་ཡུལ་ནི་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སྲ་བརྟན་གཏོང་བའི་ལས་འགན་གཙོ་བོ་གཅིག་སྡུད་བྱེད་པ་དང་། མཚོ་སྔོན་གྱི་དུས་རབས་གསར་བའི་བསམ་བློ་ཆབ་སྲིད་སློབ་ཁྲིད་ཀྱི་བཅོས་སྒྱུར་གསར་གཏོད་ལ་རྒྱུན་མཐུད་སྒོས་སྐུལ་འདེད་བཏང་ནས། བསམ་བློ་ཆབ་སྲིད་སློབ་ཁྲིད་ཀྱི་འགག་རྩའི་བསླབ་ཚན་གྱི་བྱེད་ནུས་འདོན་སྤེལ་གང་ལེགས་བྱེད་པ་དང་། བསམ་བློ་ཆབ་སྲིད་སློབ་ཁྲིད་བྱེད་པའི་དགེ་རྒན་རུ་ཁག་གི་སྤྱིའི་ཆུ་ཚད་མཐོར་འདེགས་བཏང་ནས་དགེ་རྒན་རྣམས་ཀྱིས་སློབ་གསོའི་འདུ་ཤེས་གསར་སྒྱུར་བྱེད་པར་ཁྲིད་སྟོན་བྱེད་པ་དེ་ཡིན། ཐེངས་འདིའི་བྱ་འགུལ་ནི་རང་ཞིང་གིས་བསམ་བློ་ཆབ་སྲིད་སློབ་གསོ་བཅོས་སྒྱུར་གསར་གཏོད་བྱེད་པར་སྐུལ་འདེད་གཏོང་བའི་བྱེད་ཐབས་གལ་ཆེན་ཞིག་ཡིན་པར་མ་ཟད། སློབ་གྲྭ་ཆུང་འབྲིང་གིས་བསམ་བློ་ཆབ་སྲིད་སློབ་ཁྲིད་གཞི་གཅིག་ཅན་འཛུགས་སྐྲུན་བྱེད་པར་སྐུལ་འདེད་གཏོང་བའི་མུ་འབྲེལ་བྱ་འགུལ་གྱི་གྲས་ཤིག་ཀྱང་ཡིན།

ལྷ་མོ་འཚོས་བསྒྱུར།