ཟླ10པའི་ཚེས24ཉིན། གསར་འགོད་པས་ཡུས་ཧྲུའུ་བོད་རིགས་རང་སྐྱོང་ཁུལ་སྲིད་གཞུང་ནས་རྒྱུས་ལོན་པ་ལྟར་ན། ད་ལོར། ཡུས་ཧྲུའུ་ཁུལ་གྱིས“རྩེར་སོན་དང་ལྗང་མདོག སྐྱེ་ལྡན”བཅས་ཀྱི་འཕེལ་རྒྱས་འདུ་ཤེས་རྒྱུན་འཁྱོངས་བྱས་ཏེ། ནུས་ཤུགས་ཡོད་རྒུས་ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་ཕྱིར་གཏོང་གི་འདོན་སྤྲོད་ཁུལ་གཙོ་བོ་བསྐྲུན་ནས། སྐྱེ་ཁམས་ཐོན་ཁུངས་ཀྱི་ལེགས་ཆ་འདོན་སྤེལ་གང་ལེགས་བྱས་པས། ཁུལ་ཡོངས་ཀྱི་ནོར་གནག་ཐོན་ལས་འཕེལ་རྒྱས་མགྱོགས་པོ་བྱུང་། དུས་ཚིགས་དང་པོ་ནས་གསུམ་པའི་བར། ཡུས་ཧྲུའུ་ཁུལ་དུ་གསོ་ཁ་ན་ཡོད་པའི་ནོར་གནག་གི་གྲངས་ཀ་ས་ཡ་གཅིག་དང་འབུམ་བདུན་ཁྲི་གཉིས་སྟོང་བདུན་དང་བརྒྱད་བརྒྱ་ཡོད་པ་དང་། ན་ནིང་དང་བསྡུར་ན་ཕལ་ཆེར་གཅིག་མཚུངས་རེད། རིམ་རྩིས་བྱས་ན་གསོ་ཁ་ནས་བུད་པའི་ནོར་གནག་གི་གྲངས་ཀ་འབུམ་གཅིག་དང་ཁྲི་གཉིས་སྟོང་དགུ་ཟིན་པ་དང་། དེ་དུས་མཉམ་དང་བསྡུར་ན་བརྒྱ་ཆའི་གཅིག་དང་གྲངས་ཆུང་བདུན་འཕར་ཡོད། རིམ་རྩིས་བྱས་ན་ཤའི་ཐོན་ཚད་ཏུན་ཁྲི་གཅིག་དང་སྟོང་གཉིས་ལྔ་བརྒྱ་ཟིན་པ་དེ་དུས་མཉམ་ལས་བརྒྱ་ཆའི་གསུམ་དང་གྲངས་ཆུང་གཉིས་འཕར་ཡོད། འོ་མའི་ཐོན་ཚད་ཏུན་ཁྲི་གཉིས་དང་སྟོང་དྲུག་སུམ་བརྒྱ་ཟིན་པ་དེ་དུས་མཉམ་ལས་བརྒྱ་ཆའི་བརྒྱད་དང་གྲངས་ཆུང་དྲུག་བདུན་འཕར་ཡོད།
སྔར་ལས་ལྷག་པའི་སྒོ་ནས་སྐྱེ་ཁམས་ཞིང་ཕྱུགས་ལས་འཕེལ་རྒྱས་ལ་སྐུལ་འདེད་གཏོང་ཆེད། ཡུས་ཧྲུའུ་ཁུལ་གྱིས་དོན་དངོས་དང་ཟུང་འབྲེལ་བྱས་ནས《ཡུས་ཧྲུའུ་ཁུལ་གྱིས་སྐྱེ་ཁམས་ཞིང་ཕྱུགས་ལས་ཀྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་བྱ་སྤྱོད་བྱེད་ཐབས་བཅུ་བཞི》བཟོས་ནས་པར་འགྲེམས་བྱས་པ་དང་། ཇུས་གཞིའི་ནང་རྒྱུད་བཟང་ཕྱུགས་རིགས་གསོ་ཁ་ན་ཡོད་པ་དང་གསོ་ཁ་ནས་འབུད་པ་ཚང་མར་ཐད་ཀར་རོགས་སྐྱོར་དང་རོགས་རམ་བྱས་ནས། རྫོང་སོ་སོའི་གསོ་སྤེལ་ཁྱིམ་ཚང་གིས་གསོ་ཁ་ནས་འབུད་པའི་ཡིད་ཆེས་ལ་ཁྲིད་སྟོན་བྱས། དེ་དང་ཆབས་ཅིག ཁུལ་ཡོངས་ཀྱི་སྐྱེ་ཁམས་ཞིང་ཕྱུགས་ལས་ཀྱི་སྤུས་ཚད་མཐོ་བའི་འཕེལ་རྒྱས་ཀྱི་སྐུལ་ཁྲིད་འོག གསོ་སྤེལ་ར་བ་དང་ཁྱིམ་ཚང་སྐོར་ཞིག་གིས་ཡུལ་བབ་དང་བསྟུན་ནས་ནོར་གནག་གསོ་ཁ་ན་ཡོད་པའི་གྲངས་ཀ་ཇེ་མང་དུ་བཏང་བས། ལོ་ཧྲིལ་པོར་ཕྱུགས་རིགས་ཀྱི་རིམས་ནད་དང་གནམ་གཤིས་ཧ་ཅང་ངན་པའི་ཤུགས་རྐྱེན་ཐེབས་མེད་པ་དང་། བེའུའི་གསོན་ཚད་ཅུང་མཐོ་བ། གསོ་ཁ་ནས་འབུད་པའི་ཚད་བརྟན་པོའི་ངང་འཕར་ཡོད།
དུས་ཚིགས་དང་པོ་ནས་གསུམ་པའི་བར། ཡུས་ཧྲུའུ་ཁུལ་གྱི་ས་ཁུལ་སོ་སོས་རྟེན་འབྲེལ་མཛད་སྒོ་དང་ཡུལ་སྐོར་བྱ་འགུལ། རྐང་རྩེད་སྤོ་ལོའི་མཉམ་འབྲེལ་འགྲན་བསྡུར་བཅས་ལ་ཟུང་འབྲེལ་བྱས་ནས། ཕྱུགས་ལས་ཐོན་རྫས་གསོ་ཁ་ནས་འབུད་པའི་འབྲེལ་ལམ་འདོན་སྤྲོད་བྱ་ཆེད། གསོ་སྤེལ་ཁྱིམ་ཚང་ལ་ཕན་པ་ཐོབ་རྒྱུར་སྐུལ་ཁྲིད་བྱས། མིག་སྔའི་བར་དུ། ཁུལ་ཡོངས་ཀྱི་ནོར་ལུག་གི་ཤའི་ཁྲོམ་རའི་འཁོར་རྒྱུག་བྱེད་ཚད་མཐོར་འདེགས་སུ་བཏང་བས། ས་ཁུལ་དེ་གའི་ནོར་ལུག་གི་ཤའི་རིན་གོང་ཡང་ཅུང་འཕར་ཡོད། དེ་དང་ཆབས་ཅིག གཟན་རྩྭའི་ཐོན་འབབ་མངོན་གསལ་སྒོས་ཇེ་མང་དུ་ཕྱིན་ནས་དགུན་དུས་ཀྱི་གཟན་རྩྭ་གསོག་འཇོག་གི་ཁུར་པོ་ཇེ་ཡང་དུ་བཏང་། ད་ལོ་ཁུལ་ཡོངས་ཀྱི་དབྱར་དུས་ཆར་ཆུ་འབབ་ཚད་དང་དྲོད་ཚད་དེ་སྔོན་ལོ་དང་བསྡུར་ན་ཅུང་མཐོ། ཉི་འོད་ཕོག་ཚད་འདང་ངེས་པ་དང་ཆར་དུས་རྒྱུན་རིང་གི་སྐུལ་འདེད་འོག འབྲོག་ཁུལ་གྱི་ལྷས་ར་བསྐོར་ནས་བཏབ་པའི་ཕྱུགས་རིགས་ཀྱི་གཟན་རྩྭ་དེ་སྔོན་ལོ་དང་བསྡུར་ན་ཐོན་ཚད་མངོན་གསལ་སྒོས་འཕར་བས། དགུན་དུས་ཕྱུགས་རིགས་ཀྱི་གཟན་རྩྭ་འདོན་སྤྲོད་ལ་འགན་སྲུང་ནུས་ལྡན་བྱས་པ་དང་། འབྲོག་པའི་འགྲོ་སོང་ཇེ་ཉུང་དུ་སོང་བ། འབྲོག་ཁུལ་གྱི་ཕྱུགས་རིགས་གསོ་སྤེལ་བྱེད་པའི་ཡིད་ཆེས་ཆེ་རུ་ཕྱིན་ཡོད།
ཤ་བོ་རིན་མཚོས་བསྒྱུར།
