ཟླ12ཚེས5ཉིན། མཚོ་སྔོན་ཞིང་ཆེན་ནུས་ཁུངས་ཅུའུ་ཡིས་ཁྱབ་བསྒྲགས་བྱས་པའི་གནས་ཚུལ་ལྟར་ན། ནུས་ཁུངས་ཁྱབ་ཁོངས་བརྟན་བརླིང་དང་དྲང་གཞག གསལ་བོ་བཅས་ཀྱི་སྔོན་དཔག་ཐུབ་པའི་ཚོང་གཉེར་ཁོར་ཡུག་ཅིག་བསྐྲུན་ནས། ཁྲོམ་རའི་གསོན་ཤུགས་དང་སྤྱི་ཚོགས་ཀྱི་གསར་གཏོད་ནུས་པ་རྒྱུན་ཆད་མེད་པར་བསྐྱེད་པ་དང་ནུས་ཁུངས་ལས་རིགས་སྤུས་ཚད་མཐོ་བའི་ངང་འཕེལ་རྒྱས་འགྲོ་བར་སྔར་ལས་ལྷག་པར་སྐུལ་འདེད་གཏོང་ཆེད། ཞིང་ཆེན་ནུས་ཁུངས་ཅུའུ་ཡིས་ཁྲོམ་ར་དམ་འཛིན་དང་། ལམ་སྲོལ་དམ་འཛིན། ཞབས་ཞུ་དམ་འཛིན་སོགས་ཀྱི་བྱེད་ཐབས་བརྒྱུད་དེ་ནུས་ཁུངས་ཁྱབ་ཁོངས་ཀྱི་ཚོང་གཉེར་ཁོར་ཡུག་ཇེ་ལེགས་སུ་གཏོང་བའི་འཕེལ་རིམ་ལ་སྐུལ་འདེད་ཆེན་པོ་བཏང་།
ཞིང་ཆེན་ནུས་ཁུངས་ཅུའུ་ཡིས“དུས་ཡུན་འབྲིང་རིང་དང་ད་ཡོད་དངོས་ཟོག རམ་འདེགས་ཞབས་ཞུ”བཅས་ཟུང་དུ་འབྲེལ་བའི་ཁྲོམ་རའི་མ་ལག་ཆ་ཚང་ཐོག་མར་བཙུགས་ཤིང་། དུས་ཡུན་འབྲིང་རིང་གི་ཉོ་ཚོང་ཁྲོམ་ར་དེ་ཞིང་ཆེན་བར་དང་ཞིང་ཆེན་ནང་ཁུལ་གྱི་ཁྲོམ་ར་རིམ་པ་གཉིས་སུ་གྲུབ་པ་དང་། ཞིང་ཆེན་བར་གྱི་དུས་ཡུན་འབྲིང་རིང་དང་ད་ཡོད་དངོས་ཟོག་ཉོ་ཚོང་རྒྱུན་རྣམ་ཅན་གྱི་འཁོར་རྒྱུག་ཐུབ་པ་མངོན་འགྱུར་བྱས། ཞིང་ཆེན་ནང་ཁུལ་གྱི་ད་ཡོད་དངོས་ཟོག་ཁྲོམ་ར་ལེགས་སྒྲིག་ཐེངས་གསུམ་དང་ཚོད་ལྟའི་འཁོར་སྐྱོད་ཐེངས་དང་པོ་ལེགས་འགྲུབ་བྱུང་བ་དང་། 《མཚོ་སྔོན་ཞིང་ཆེན་གྱི་གློག་ཤུགས་ཀྱི་ད་ཡོད་དངོས་ཟོག་ཁྲོམ་ར་འཛུགས་སྐྲུན་ཇུས་གཞི》སྒྲིག་འཛུགས་བྱས་ནས་བཟོས་ཏེ། ད་ཡོད་དངོས་ཟོག་ཉོ་ཚོང་གི་མ་ལག་ཚང་བའི་ཞིབ་སྲོལ་བཟོས་པ་རེད། ཞིང་ཆེན་བར་གྱི་ཉོ་ཚོང་ཐད། ཧྲང་ཧའེ་དང་། ཀྲེ་ཅང་། ཧྲན་ཏུང་སོགས་ཞིང་ཆེན་དང་གྲོང་ཁྱེར་དང་གློག་མཁོ་འདོན་གྲོས་མཐུན་བཞག་པ་དང་། ད་ལོའི་ཟླ་དང་པོ་ནས་བཅུ་པའི་བར་གློག་ཕྱིར་གཏོང་བྱེད་ཚད་སྟོང་ཝ་ཐེར་ཆེན་གཉིས་དང་ཐེར་འབུམ་གཉིས་དུང་ཕྱུར་བརྒྱད་ལྷག་ཟིན་ཡོད། གློག་མཁོ་འདོན་བྱས་པའི་ས་ཁུལ་ནང་ནུབ་བྱང་དང་། ཀྲུང་ཧྭའི་དབུས་རྒྱུད་དང་ཤར་རྒྱུད། བྱང་རྒྱུད། ལྷོ་ནུབ་བཅས་ས་ཁུལ5ཡི་ཞིང་ཆེན་དང་གྲོང་ཁྱེར13ཚུད་ཡོད། གློག་ཤུགས་རམ་འདེགས་ཞབས་ཞུའི་ཁྲོམ་ར་འཛུགས་སྐྲུན་ལ་སྐུལ་འདེད་བཏང་ནས། 2020ལོའི་ཟླ་6པར་ཞིང་ཆེན་ནང་ཁུལ་གྱི་གློག་མཁོ་འདོན་རམ་འདེགས་ཞབས་ཞུའི་ཁྲོམ་ར་དངོས་སུ་འཁོར་སྐྱོད་བྱས་པ་དང་། མེ་གློག་མཁོ་འདོན་གྱི་གཏིང་ཚད་སྙོམས་སྒྲིག་དང་། མེ་གློག་མཁོ་འདོན་གྱི་སྙོམས་སྒྲིག་བྱེད་མཚམས་འཇོག་པ། ནུས་གསོག་སྙོམས་སྒྲིག་མཉམ་སྤྱོད་བཅས་ཀྱི་རམ་འདེགས་ཞབས་ཞུའི་ཉོ་ཚོང་ཧུར་ཐག་གིས་སྤེལ་ནས། ཐོན་ཁུངས་སྙོམས་སྒྲིག་གང་ལ་དེ་འཚམ་བྱེད་པའི་ནུས་པ་སྔོག་འདོན་བྱས།
ལྗང་མདོག་གློག་གཏོང་ཉོ་ཚོང་དེ་དུས་ཡུན་འབྲིང་རིང་གི་ཉོ་ཚོང་ཁྱབ་ཁོངས་སུ་ཐོག་མར་བཅུག་པ་དང་། ལྗང་མདོག་གློག་གཏོང་ཉོ་ཚོང་དེ་ལོ་འཁོར་ནས་ཟླ་འཁོར་དང་། ཟླ་རེའི་ནང་སྣུར་སྲིང་བྱེད་པར་སྐུལ་འདེད་བཏང་སྟེ། ཞིང་ཆེན་ནང་ཁུལ་གྱི་ལྗང་མདོག་གློག་གཏོང་ཉོ་ཚོང་རྒྱུན་རྣམ་ཅན་དུ་བསྟུད་མར་འཁོར་སྐྱོད་ཐུབ་པ་བྱས་ཡོད། སླར་སྐྱེས་ནུས་ཁུངས་ཀྱི་གློག་འདོན་རྣམ་གྲངས་ཀྱི་ཡིག་ཚགས་དང་བྱང་བུ་བཟོ་བ་ཁྱོན་ཡོངས་ལ་ཁེབས་པར་སྐུལ་འདེད་དང་། ནུས་ཁུངས་གསར་པ་གཞི་ཁྱོན་སྔར་ལས་ཆེ་བའི་སྒོ་ནས་ཁྲོམ་རར་ཞུགས་པར་སྐུལ་འདེད་བཏང་། ལྗང་མདོག་གློག་ཤུགས་ཉོ་ཚོང་དང་སླར་སྐྱེས་ནུས་ཁུངས་ཀྱི་འཛད་སྤྱོད་འགན་འཁྲི་ལྕི་མོ་ཟུང་འབྲེལ་བྱེད་པའི་ལམ་སྲོལ་འཚོལ་ཞིབ་བྱས་ཏེ། ཁྲོམ་ར་ཅན་གྱི་སྤྱོད་མཁན་གྱིས་ལྗང་མདོག་གློག་ཤུགས་སམ་ཡང་ན་ལྗང་མདོག་གློག་གི་ལག་ཁྱེར་ཉོས་ནས་སླར་སྐྱེས་ནུས་ཁུངས་ཀྱི་གློག་ཤུགས་འཛད་སྤྱོད་འགན་འཁྲི་ལག་བསྟར་བྱེད་པར་སྐུལ་ལྕག་བཏང་། ད་ལོའི་ཟླ་དང་པོ་ནས་དགུ་པའི་བར་ལྗང་མདོག་གློག་ཉོ་ཚོང་སྟོང་ཝ་ཐེར་འབུམ་གཉིས་དང་དུང་ཕྱུར་བདུན་ལྷག་སྒྲིག་འཛུགས་བྱས་ཤིང་། ལོ་སྔོན་མའི་དུས་མཉམ་དང་བསྡུར་ན51%འཕར་ཡོད། དེའི་ནང་ཞིང་ཆེན་ནང་ཁུལ་གྱི་ལྗང་མདོག་གློག་ཉོ་ཚོང་བྱེད་ཚད་སྟོང་ཝ་དུང་ཕྱུར་དྲུག་ལྷག་ཟིན་པ་དེ་ལོ་སྔོན་མའི་དུས་མཉམ་དང་བསྡུར་ན་2%འཕར་ཡོད། ཞིང་ཆེན་བར་གྱི་ལྗང་མདོག་གློག་ཉོ་ཚོང་བྱེད་ཚད་སྟོང་ཝ་ཐེར་འབུམ་གཉིས་དང་དུང་ཕྱུར་གཅིག་ལྷག་ཟིན་ནས། ལོ་སྔོན་མའི་དུས་མཉམ་དང་བསྡུར་ན་75%འཕར་ཡོད།
དུས་མཚུངས་སུ་རང་འགུལ་ངང་ཁྲོམ་རའི་གྲུབ་ཆ་གཙོ་བོར་བརྟེན་ནས་ཞབས་འདེགས་ཡག་པོ་ཞུ་བ་དང་། འབྲེལ་ཡོད་ས་ཁུལ་གྱི་ལྟ་སྐུལ་སློབ་སྟོན་ལས་གཞིའི་ཁེ་ལས་བདག་པོས་ས་ཆ་སྤྱོད་པ་དང་། ནགས་ཚལ་དང་རྩྭ་ཐང་སྤྱོད་པ། ཁོར་ཡུག་དཔྱད་འཇོག་སོགས་ཀྱི་དུས་འགོའི་འགྲོ་ལུགས་སྣ་ཚོགས་ཡག་པོ་སྒྲུབ་པ། ནུས་ཁུངས་དང་། རྒྱལ་ཁོངས་ས་ཁོངས། ནགས་ཚལ་དང་རྩྭ་ཐང་། སྐྱེ་ཁམས་སོགས་སྡེ་ཁག་མང་པོས་མཐུན་སྦྱོར་མཉམ་འགུལ་བྱེད་པའི་གནས་ཡུལ་འདེམས་པ་དང་། ས་ཆ་སྤྱོད་པར་འགན་སྲུང་གྲོས་མོལ་གྱི་ཆེད་ཚན་དང་མཐུན་སྦྱོར་ལམ་སྲོལ་བེད་སྤྱོད་ཡག་པོ་བྱེད་པ། འབྲེལ་ཡོད་སྡེ་ཁག་དང་འབྲེལ་མཐུད་ལེགས་པོ་བྱས་ཏེ་འཛུགས་སྐྲུན་ལ་མཁོ་བའི་ས་ཆའི་དམིགས་ཚད་དོན་འཁྱོལ་བྱེད་པ། ཁག་ དང་ས་ཁུལ་དབྱེ་ནས་དུས་བཀག་ལྟར་འབྲེལ་མཐུད་བྱས་ཏེ་མཐུན་སྦྱོར་གྱི་ཆེད་དོན་ཚོགས་འདུ་འཚོགས་པ་བཅས་བྱས་ནས། ལས་གཞི་བདེ་ལེགས་ངང་བསྐྲུན་པ་མ་ཟད་དྲ་སྦྲེལ་གྱི་དམིགས་འབེན་མངོན་འགྱུར་བྱེད་པར་འགན་ལེན་བྱས་པ་དང་། རྒྱལ་ཁབ་ཀྱི་རྟེན་གཞི་ཆེ་གྲས་དང་། གློག་ཤུགས་གསོག་ཉར། མཐོ་སྒང་གི་རླུང་གློག་སོགས་གཙོ་གནད་ལས་གཞིར་ནུས་ཤུགས་ཡོད་རྒུས་སྐུལ་འདེད་བཏང་།
སྒྲོལ་མ་སྐྱིད་ཀྱིས་བསྒྱུར།
