ཟི་ལིང་གྲོང་ཁྱེར་གྱིས་ཞིང་ཆེན་ཡོངས་ཀྱི་འཚོ་བའི་གད་སྙིགས་མེར་བསྲེགས་པའི་གློག་འདོན་བཟོ་གྲྭ་ཐོག་མ་བསྐྲུན་པ་དང་། གྲོང་ཁུལ་གཙོ་བོའི་འཚོ་བའི་གད་སྙིགས་སྦས་མི་དགོས་པ་མངོན་འགྱུར་བྱས། མཚོ་ནུབ་སོག་རིག་བོད་རིགས་རང་སྐྱོང་ཁུལ་གྱིས་ཧུར་ཐག་གིས་འོད་ལེབ་རྙིང་པའི་ཐོན་ཁུངས་འཁོར་སྐྱོད་བེད་སྤྱོད་ཀྱི་ལས་གཞི་འཛུགས་སྐྲུན་བཀོད་སྒྲིག་བྱས། ཡུས་ཧྲུའུ་བོད་རིགས་རང་སྐྱོང་ཁུལ་གྱིས་ཧུར་ཐག་གིས་གྲང་ངར་ཆེ་ཞིང་ས་བབ་མཐོ་བའི་སྐྱེ་ཁམས་ཉམས་ཞན་ཁུལ་གྱི་སྙིགས་མེད་གྲོང་ཁྱེར་འཛུགས་སྐྲུན་གྱི་རྣམ་པ་གསར་པ་བསྐྲུན། 3ཚེས28ཉིན། གསར་འགོད་པས་མཚོ་སྔོན་ཞིང་ཆེན་སྐྱེ་ཁམས་ཁོར་ཡུག་ཐིན་ནས་རྒྱུས་ལོན་པ་ལྟར་ན། མཚོ་སྔོན་གྱིས་བཟོ་ལས་དང་ཞིང་ལས། འཚོ་བ། འཛུགས་སྐྲུན་གད་སྙིགས་བཅས་དམིགས་ཏེ། ཉེན་ཆེའི་བེད་མེད་དངོས་པོ་སོགས་གཙོ་གནད་ཁྱབ་ཁོངས་སུ་སྙིགས་མེད་གྲོང་ཁྱེར་འཛུགས་སྐྲུན་ལ་སྐུལ་འདེད་གཏོང་བ་དང་། ཡུལ་བབ་དང་བསྟུན་ནས་མཐོ་སྒང་གི“སྙིགས་མེད་གྲོང་ཁྱེར”དང“སྙིགས་མེད་གླིང་ཁུལ”སོགས་ཁྱད་ཆོས་ལྡན་པའི་རྣམ་པ་བསྐྲུན་ནས། སྲིད་གཞུང་གིས་གཙོ་ཁྲིད་བྱེད་པ་དང་ཁེ་ལས་གཙོ་བོ་ཡིན་པ། མང་ཚོགས་ཟབ་ཞུགས་བྱེད་པ་བཅས་ཀྱི་རྣམ་པ་ཆགས་རྒྱུར་སྐུལ་འདེད་གཏོང་བཞིན་ཡོད།

“སྙིགས་མེད་གྲོང་ཁྱེར”ནི་གྲོང་ཁྱེར་གྱི་ལྗང་མདོག་ཐཱན་ཉུང་ཚུལ་སྒྱུར་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་མགྱོགས་པོ་གཏོང་བའི་བྱེད་ཐབས་ནུས་ལྡན་ཞིག་ཡིན། མཚོ་སྔོན་གྱིས་མཐོ་རིམ་གྱིས་གཅིག་གྱུར་འཆར་འགོད་བྱ་རྒྱུ་རྒྱུན་འཁྱོངས་བྱས་ནས། ཞིང་ཆེན་རིམ་པའི་མཉམ་འབྲེལ་གྲོས་ཚོགས་ལམ་ལུགས་བཙུགས་པ་དང་། སྡེ་ཁག18ལ་གཅིག་གྱུར་འཆར་འགོད་བྱས་ནས་མཐུན་སྦྱོར་སྐུལ་འདེད་བཏང་ཞིང་། རྒྱལ་ཁབ་རིམ་པ་དང་ཞིང་ཆེན་རིམ་པའི་ཆེད་མཁས་པ་མི33ཡོད་པའི་ཆེད་མཁས་རུ་ཁག་བཙུགས་ཡོད་པ་དང་། དམིགས་སའི་རང་བཞིན་གྱིས་ལག་རྩལ་རོགས་སྐྱོར་བྱས་ཏེ། “མཐོ་རིམ་གྱིས་སྐུལ་འདེད་གཏོང་བ་དང་། སྡེ་ཁག་མཉམ་འགུལ་བྱེད་པ། ཆེད་མཁས་པས་འདེགས་སྐྱོར་བྱེད་པའི”བྱ་བའི་རྐྱེན་སྲོལ་ཆགས་པ་དང་། ཡུལ་བབ་དང་བསྟུན་ནས་མཐོ་སྒང་ས་ཁུལ་གྱི་སྲ་གཟུགས་སྙིགས་རོ་ཐག་གཅོད་བྱེད་དཀའ་བའི་དཀའ་གནད་སེལ། རྒྱལ་ཡོངས་ཀྱི《བེད་མེད་འོད་ལེབ་ཀྱི་ལྷུ་ལག་དང་བེད་མེད་རླུང་ཤུགས་འཕྲུལ་འཁོར་གྱི་ལྷུ་ལག་བེད་སྤྱོད་བྱེད་པའི་ཐག་གཅོད་སྦགས་བཙོག་ཚོད་འཛིན་ལག་རྩལ་ཕྱོགས་སྟོན་སྒྲིག་སྲོལ》ཐོག་མ་ཁྱབ་བསྒྲགས་བྱས་ནས། རྒྱལ་ནང་གྱི་འོད་ལེབ་ཀྱི་ལྷུ་ལག་དང་བེད་མེད་རླུང་ཤུགས་འཕྲུལ་འཁོར་གྱི་ལྷུ་ལག་བེད་སྤྱོད་བྱེད་པའི་ཐག་གཅོད་སྦགས་བཙོག་ཚོད་འཛིན་ཚད་གཞིའི་སྟོང་ཆ་ཁ་གསབ་བྱས།    

བརྒྱུད་རིམ་དེའི་ཁྲོད། ཟི་ལིང་གྲོང་ཁྱེར་གྱིས་བཟོ་ལས་ཀྱི་སྙིགས་རོ་ཕྱོགས་བསྡུས་བེད་སྤྱོད་དང་།   ཞིང་ཕྱུགས་ལས་རིགས་ཀྱི་སྒོ་ཟོག་གི་ལུད་ཕྱོགས་བསྡུས་བེད་སྤྱོད་བྱེད་པ། གྲོང་ཁྱེར་ཀྱི་འཚོ་བའི་སྙིགས་རོ་སོགས་སྲ་གཟུགས་སྙིགས་རོ་ཐག་གཅོད་ཀྱི་ཕྲེང་འབྲེལ10བསྐྲུན་པ་དང་།  སྐྱེ་ཁམས་ཕྱུགས་ར་དང་སྙིགས་མེད་གླིང་ཁུལ་སོགས“སྙིགས་མེད་རྣམ་པ”4གསོ་སྐྱོང་བྱས་ཏེ།  མཁར་ནུབ་ཁུལ་གྱི་འཚོ་བའི་གད་སྙིགས་དབྱེ་འབྱེད་ལྟེ་གནས་སོགས་བེད་མེད་དང་འབྲེལ་བ་ཡོད་པའི་ལས་གཞི་གཙོ་བོ22ལ་སྐུལ་འདེད་གཏོང་བའི་འཆར་འགོད་བཟོས་ཡོད།   མཚོ་ནུབ་ཁུལ་གྱིས་གླིང་ཁུལ་རེས་འཁོར་ཅན་གྱི་བསྒྱུར་བཀོད་ལས་གཞི་ལག་བསྟར་བྱས་ཏེ།   གཏེར་ལེན་ཁའི་བཟོ་ལས་གླིང་ཁུལ་སོགས་གླིང་ཁུལ4ཚང་མ་རྒྱལ་ཁབ་པུའུ་ཨུ་ཡིས་ཞིབ་བཤེར་རྩིས་ལེན་བྱས་པ་དང་ཆབས་ཅིག ཧུར་ཐག་གིས་འོད་ཀྱི་པང་ལེབ་རྙིང་པའི་ཐོན་ཁུངས་རེས་འཁོར་བེད་སྤྱོད་ལས་གཞི་འཛུགས་སྐྲུན་བཀོད་སྒྲིག་བྱས།

ཤ་བོ་རིན་མཚོས་བསྒྱུར།