ཟླ4པའི་ཚེས9ཉིན། གསར་འགོད་པས་མཚོ་སྔོན་ཞིང་ཆེན་བདེ་འཇགས་ཐོན་སྐྱེད་ཨུ་ཡོན་ལྷན་ཁང་གིས་བྲེལ་མྱུར་གྱིས་བསྡུས་པའི་ཞིང་ཆེན་ཡོངས་ཀྱི་བདེ་འཇགས་དོགས་ཟོན་བྱ་བའི་བརྙན་རིས་བཀོད་གཏོང་ཚོགས་འདུའི་སྟེང་རྒྱུས་ལོན་བྱུང་བ་ལྟར་ན། རང་ཞིང་གིས་ཕྱོགས་ཡོངས་ནས་ལས་རིགས་བདེ་འཇགས་ལྟ་སྐུལ་དོ་དམ་དང་ཁོངས་གཏོགས་ས་ཆའི་བདེ་འཇགས་འགན་འཁྲི་དངོས་འབེབས་བྱེད་པར་ཤུགས་བསྣན་པ་དང་། རྒྱུན་ལྡན་ལས་བརྒལ་བའི་བྱེད་ཐབས་སྤྱད་དེ། དོན་རྐྱེན་མང་པོ་འབྱུང་བའི་གནས་བབ་ལ་མཐའ་གཅིག་ཏུ་བཀག་འགོག་བྱས་པ་དང་། མི་དམངས་མང་ཚོགས་ཀྱི་ཚེ་སྲོག་རྒྱུ་ནོར་བདེ་འཇགས་དང་སྤྱི་ཚོགས་ཁྱོན་ཡོངས་གཏན་འཇགས་ཡོང་བར་སྲུང་སྐྱོང་ནན་མོ་བྱས།
ད་སྐབས་དུས་ཚིགས་གཉིས་པའི་ཁེ་ལས་ཀྱིས་ཕྱོགས་ཡོངས་ནས་ལས་ཐོན་སླར་གསོ་བྱེད་པའི་དུས་མཚམས་གལ་ཆེན་ཡིན་པས། བདེ་འཇགས་གནས་བབ་བརྟན་སྲུང་བྱས་ནས་བརྟན་བརླིང་སྒོས་བཟང་ཕྱོགས་སུ་འཕེལ་བའི་ལས་འགན་ཧ་ཅང་ལྕི། དམངས་སྲིད་སྡེ་ཁག་གིས་རྒན་གསོ་དང་དུར་འཇུག་སོགས་ལས་ཁུངས་ཀྱི་བདེ་འཇགས་ལྟ་སྐུལ་དོ་དམ་ལ་ཤུགས་སྣོན་དགོས། སློབ་གསོའི་སྡེ་ཁག་གིས་སློབ་མའི་ཉལ་ཁང་དང་ཟ་ཁང་། དཔེ་མཛོད་ཁང་། ལུས་རྩལ་ཁང་། ཚོད་ལྟ་ཁང་། གསོག་ཉར་ཁང་། དངོས་སྦྱོང་གསོ་སྦྱོང་རྟེན་གཞི་སོགས་འགག་རྩའི་གནས་དང་འཛུགས་སྐྲུན་བྱེད་ཀྱིན་པའི་སློབ་རའི་ལས་གཞི་བཅས་ལ་དམ་པོར་དམིགས་ནས། བདེ་འཇགས་ཀྱི་མི་མངོན་པའི་རྐྱེན་ངན་གྲལ་བཤེར་དང་དག་ཐེར་ལེགས་བཅོས་ཟབ་མོ་བྱེད་དགོས། མི་རིགས་ཆོས་ལུགས་ལས་དོན་སྡེ་ཁག་གིས་ཆོས་ལུགས་སྤེལ་ཡུལ་གྱི་འཛུགས་སྐྲུན་བདེ་འཇགས་དང་མེ་ཟོན་བདེ་འཇགས། གློག་དབུགས་བདེ་འཇགས། ཟས་རིགས་བདེ་འཇགས་སོགས་ཉེན་ཁའི་མི་མངོན་པའི་རྐྱེན་ངན་ལ་ཕྱོགས་ཡོངས་ནས་གྲལ་བཤེར་བྱེད་དགོས། འཕྲོད་བསྟེན་བདེ་འཇགས་སྡེ་ཁག་གིས་ཞིང་ཆེན་ཡོངས་ཀྱི་སྨན་བཅོས་ལས་ཁུངས་ཀྱིས་བདེ་འཇགས་འགན་འཁྲི་གཙོ་བོ་དང་མེ་ཟོན་བདེ་འཇགས་འགན་འཁྲི་དོན་འཁྱོལ་ནན་མོ་བྱེད་པ་དང་། ལམ་ལུགས་ཚད་ལྡན་དང་བཀོལ་སྤྱོད་བྱེད་ལུགས། བདེ་འཇགས་ཚད་གཞི་བཅས་འཐུས་ཚང་འཛུགས་དགོས། རིག་གནས་ཡུལ་སྐོར་སྡེ་ཁག་གིས་རི་ཆུར་འབྲེལ་བའི་ལྗོངས་ཁུལ་དང་། སྒར་རྒྱག་ས། གཟིགས་ལྗོངས་སྟེགས་བུ་བཅས་ཀྱི་ཉེན་ཁའི་མི་མངོན་པའི་རྐྱེན་ངན་གྲལ་བཤེར་དག་ཐེར་བྱེད་ཤུགས་ཇེ་ཆེར་གཏོང་བ་དང་། ཤེལ་སྒོའི་བརྒྱུད་ལམ་སོགས་གསར་དར་ཡུལ་སྐོར་ལས་གཞིའི་བདེ་འཇགས་ལྟ་སྐུལ་དོ་དམ་ལ་ཤུགས་བསྣན་ནས། མགྲོན་ཁང་དང་གསོལ་མགྲོན་ཁང་། དམངས་སྲོལ་མགྲོན་ཁང་སོགས་ཡུལ་སྐོར་དང་འབྲེལ་བའི་གནས་ཡུལ་གཙོ་བོས་མེ་ཟོན་བདེ་འཇགས་ཀྱི་ལྟ་སྐུལ་དོ་དམ་འགན་འཁྲི་དངོས་འབེབས་བྱེད་པར་སྐུལ་འདེད་གཏོང་དགོས།
མེ་ཟོན་རྒུད་སྐྱོབ་རུ་ཁག་གིས་གནས་ཡུལ་ཆུང་བ་དགུ་དང་། རིག་དངོས་བཤམས་སྟོན་ལས་ཁུངས། མི་སྣ་མང་པོ་འདུས་སྡོད་བྱེད་ས་སོགས་ཀྱི་མེ་སྐྱོན་གྱི་མི་མངོན་པའི་རྐྱེན་ངན་གྲལ་བཤེར་བྱེད་པར་ཤུགས་སྣོན་དགོས། འགྲིམ་འགྲུལ་དང་སྡོད་ཁང་འཛུགས་སྐྲུན། ཆུ་བེད་སོགས་ལས་རིགས་ཁྱབ་ཁོངས་ཀྱིས་དུས་རིམ་རང་བཞིན་གྱི་ཆོས་ཉིད་ཁྱད་རྟགས་དང་ཟུང་འབྲེལ་བྱས་ཏེ། དམིགས་གཏད་རང་བཞིན་ཡོད་པའི་སྒོ་ནས་བདེ་འཇགས་སྔོན་འགོག་ཚོད་འཛིན་བྱེད་ཐབས་ལ་བཀོད་སྒྲིག་བྱེད་པ་དང་། ལས་རིགས་ཀྱི་བདེ་འཇགས་གནས་བབ་གཏན་འཇགས་ཡོང་བར་ཁག་ཐེག་བྱེད་དགོས།
ཞིང་ཆེན་ཡོངས་ཀྱི་ས་ཁུལ་སོ་སོ་དང་སྡེ་ཁག་སོ་སོས་ཕྱོགས་ཡོངས་ནས་བདེ་འཇགས་ཐོན་སྐྱེད་འགན་འཁྲི་དངོས་འབེབས་བྱེད་པ་དང་། ཕྱོགས་ཡོངས་ནས་ས་གནས་དང་ལས་རིགས་རང་གི་ཁྱབ་ཁོངས་སུ་གནས་པའི་བདེ་འཇགས་ཉེན་ཁ་དང་དོན་རྐྱེན་གྱི་མི་མངོན་པའི་རྐྱེན་ངན་ལ་རྒྱུས་ལོན་གསལ་བོ་བྱས་ཏེ། བདེ་འཇགས་གནས་བབ་ལ་ཆེད་དུ་ཞིབ་གཅོད་བྱེད་པ་དང་། བདེ་འཇགས་དོགས་ཟོན་གྱི་བྱ་བ་གཙོ་བོ་ཞིབ་འཇུག་དང་བཀོད་སྒྲིག་བྱེད་དགོས། དེ་དང་མཉམ་དུ། ས་ཁུལ་སོ་སོ་དང་སྡེ་ཁག་སོ་སོས་མགོ་ཁྲིད་ལས་བྱེད་པའི་སྣེ་ཁྲིད་དང་ཆུ་ཚོད་ཉེར་བཞིའི་ལས་རེས་ལམ་ལུགས་དོན་འཁྱོལ་ནན་མོ་བྱེད་པ་དང་། དོན་རྐྱེན་གྱི་གནོད་འཚེ་དང་ཚོར་སྐྱེན་དོན་དག་གཙོ་བོའི་ཆ་འཕྲིན་བརྒྱུད་བསྐུར་བླང་བྱ་མཐའ་གཅིག་ཏུ་དོན་འཁྱོལ་བྱེད་དགོས། རིམ་པ་སོ་སོའི་འཕྲལ་བསྟུན་རྒུད་སྐྱོབ་རུ་ཁག་གིས་ལས་རེས་གྲ་སྒྲིག་བྱ་བར་ཤུགས་བསྣན་ནས། དངོས་རྒྱུ་སྒྲིག་ཆས་སྔོན་ལ་ཉོ་བ་དང་། དོན་རྐྱེན་དང་ཉེན་ཁའི་གནས་ཚུལ་བྱུང་ཚེ་དུས་ཐོག་ཏུ་ཁ་གཏད་འཇལ་ཐུབ་ལ་ནུས་མཐོ་སྒོས་ཐག་གཅོད་པར་ཁག་ཐེག་བྱེད་དགོས།
ལྷ་མོ་འཚོས་བསྒྱུར།
