ལྔ་གཅིག་དུས་ཆེན་སྐབས་སུ། ཞིང་ཆེན་མེ་འགོག་མེ་གསོད་མྱུར་སྐྱོབ་སྤྱི་ཁྱབ་རུ་ཁག་གིས་བདེ་འཇགས་འགོག་ཟོན་ལ་ཤུགས་སྣོན་བྱས་པས། ཞིང་ཆེན་ཡོངས་ཀྱི་མེ་འགོག་མེ་གསོད་ཀྱི་བདེ་འཇགས་གནས་བབ་སྤྱི་ཁོག་ནས་ཧ་ཅང་བརྟན་བརླིང་རེད། ཟླ5པའི་ཚེས5ཉིན་གྱི་ཕྱི་དྲོའི་དུས་ཚོད་དྲུག་བར་དུ། ཞིང་ཆེན་ཡོངས་ཀྱི་མེ་འགོག་མེ་གསོད་མྱུར་སྐྱོབ་རུ་ཁག་གིས་བསྡོམས་པས་ཉེན་བརྡ་གྱ་བརྒྱད་དང་ལེན་བྱས་པ་དང་། དེའི་ནང་མེ་སྐྱོན་ཉེན་བརྡ་ཞེ་གསུམ་དང་། ཉེན་སེལ་རོགས་སྐྱོབ་བཅུ་བཞི། ཉེན་བརྡ་གཞན་པ་སུམ་ཅུ་བཅས་ཡོད་ལ། བསྡོམས་པས་ཉེན་རྟོག་མི་སྣ་བརྒྱད་བརྒྱ་དང་སོ་དགུ་མངག་གཏོང་བྱས་པ་དང་། རླངས་འཁོར་བརྒྱ་དང་དོན་བདུན་བཏང་།
དུས་ཆེན་སྐབས་སུ། ཞིང་ཆེན་ཡོངས་ཀྱི་མེ་འགོག་མེ་གསོད་སྡེ་ཁག་གིས་འབྲེལ་ཡོད་ལས་རིགས་སྡེ་ཁག་སོ་སོ་དང་རོགས་ལས་དམ་ཟབ་བྱས་པ་དང་། གནས་སྐོར་ལྗོངས་རྒྱུ་ཁུལ་དང་བཟའ་བཏུང་རོལ་རྩེད། མཛོད་ཉར་བྱེད་ས། རྡོ་སྣུམ་ཁེ་ལས། སྣུམ་རླངས་གསོག་མཛོད་སོགས་གཙོ་གནད་ཡུལ་གནས་ཀྱི་ཞིབ་བཤེར་བྱེད་ཤུགས་ཇེ་ཆེར་བཏང་ལ། བདེ་འཇགས་ཐོན་སྒོ་དང་མེ་ཟོན་བགྲོད་ལམ་འགག་པའི་གནད་དོན་ལ་བཅོས་སྐྱོང་བྱས་པ་དང་། དུས་ཐོག་ཏུ་ཉེན་ཁ་དང་མངོན་མེད་རྐྱེན་ངན་མེད་པར་བཟོས། ཞིབ་བཤེར་མི་སྣས་དུས་ངེས་མེད་དུ་ཞིབ་བཤེར་བྱས་ནས། མེ་འགོག་མེ་གསོད་བྱེད་ཐབས་དོན་ཐོག་ཏུ་འཁྱོལ་བར་ཁག་ཐེག་བྱས། བསྡོམས་པས་ཞིབ་བཤེར་སྡེ་ཁག237ལ་ཞིབ་བཤེར་བྱས་པ་དང་། མེ་སྐྱོན་ཉེན་ཁ367རྙེད་ལ། མེ་སྐྱོན་ཉེན་ཁ218ལ་དག་ཐེར་ལེགས་བཅོས་བྱས་པ་དང་། དག་ཐེར་ཡོ་བསྲང་བྱེད་རྒྱུའི་བརྡ་སྦྱོར160སྤེལ། དེ་དང་མཉམ་དུ། ཞིང་ཆེན་ཡོངས་ཀྱི་མེ་འགོག་མེ་གསོད་མྱུར་སྐྱོབ་རུ་ཁག་གིས་ལས་རེས་ལས་སྲུང་ལམ་ལུགས་ལག་བསྟར་ནན་མོ་བྱས་ནས། མི་སྣས་ལས་རྐང་བརྟན་སྲུང་བྱེད་པར་ཁག་ཐེག་བྱས། ཞིང་ཆེན་ཡོངས་ཀྱི་གནས་སྐོར་ལྗོངས་རྒྱུ་ཁུལ་གཙོ་བོ་དང་ཚོང་ལས་ཕྱོགས་བསྡུས་ཡུལ་གནས་ཆེན་པོ་སོགས་སྡེ་ཁག་ཏུ། ལས་རེས་བྱེད་ས110བཙུགས་པ་དང་། མེ་འགོག་མེ་གསོད་རླངས་འཁོར་ཐེངས173དང་ལས་རེས་མི་སྣ849མངག་གཏོང་བྱས་ལ། སྐོར་སྐྱོད་སྐོར་སྲུང་དང་ཡུལ་དངོས་ལྟ་སྐྱོང་བྱ་བ་སྤེལ་ནས། ཉེན་ཁ་ཡོད་ཚེ་མྱུར་དུ་བྱེད་ཐབས་སྤྱད་དེ་སྔ་མོ་ནས་མེ་གསོད་པར་ཁག་ཐེག་བྱས།
དུས་ཆེན་སྐབས་ཀྱི་མེ་འགོག་མེ་གསོད་དྲིལ་སྒྲོག་བྱ་བར་ཤུགས་སྣོན་བྱེད་ཆེད། ཞིང་ཆེན་ཡོངས་སུ་བསྡོམས་པས་རྒྱུན་ཤེས་རང་བཞིན་གྱི་དྲིལ་སྒྲོག་ཐེངས325སྤེལ་བ་དང་། དྲིལ་སྒྲོག་ཡིག་ཆ་ཁྲི་གསུམ་དང་སྟོང་གཉིས་ལྷག་བཀྲམས་ལ། མེ་འགོག་མེ་གསོད་ཀྱི་སྤྱི་ཕན་བརྡ་ཁྱབ་ཐེངས་ཁྲི་བརྒྱད་དང་སྟོང་བཞི་བཏང་བ་དང་། མེ་འགོག་མེ་གསོད་ཀྱི་སྤྱི་ཕན་འཕྲིན་ཐུང་ས་ཡ་བརྒྱད་དང་འབུམ་དྲུག་བསྐུར།
རིན་ཆེན་མཚོས་བསྒྱུར།
