ཟླ6པའི་ཚེས15ཉིན། “རབ་མཛེས་མཚོ་སྔོན·ངོ་མཚར་སྟོང་གི་རྨ་ལྷོ”ཞེས་པའི། 2025ལོའི་རྨ་ལྷོ་ཁུལ་གྱི་མཚོ་སྔོན་དང་ཀན་སུའུ། ཧྲན་ཞི། སི་ཁྲོན་བཅས་ཞིང་ཆེན་བཞིའི་རིག་གནས་ཡུལ་སྐོར་ཐོན་ཁུངས་དྲིལ་སྒྲོག་མཚམས་སྦྱོར་ཚོགས་འདུ་ཁྲིན་ཏུའུ་རུ་བསྐྱོད།

མཚམས་སྦྱོར་ཚོགས་འདུའི་ཡུལ་དངོས་སུ། 《ངོ་མཚར་སྟོང་གི་རྨ་ལྷོ·འགུག་ཤུགས་ཆེ་བའི་གཟུགས་འདས་ཤུལ་བཞག་རིག་དངོས》ཞེས་པའི་དྲིལ་སྒྲོག་གློག་བརྙན་ངོ་མཚར་ཆེན་པོའི་སྒོ་ནས་བསྟན་པ་དང་། གསོན་ཉམས་ལྡན་པའི་བརྙན་རིས་ལ་བརྟེན་ནས་ཡུལ་དངོས་ཀྱི་སྐུ་མགྲོན་དང་མང་ཚོགས་ཚང་མར་རྨ་ལྷོ་ཁུལ་གྱི་ཐུན་མོང་མ་ཡིན་པའི་རིག་གནས་སྒྱུ་རྩལ་གྱི་མཛེས་སྡུག་ཚོར་དུ་བཅུག རྨ་ལྷོ་ཁུལ་གྱི་དབུ་བཞུགས་རིག་གནས་ཡུལ་སྐོར་མཚམས་སྦྱོར་དཔོན་དབྱང་ཁྲིན་ཚའེ་ཡིས། “ནུབ་རྒྱུད་ཀྱི་མཛེས་ལྗོངས་ཆེན་མོ་སྟེ་ངོ་མཚར་སྟོང་གི་རྨ་ལྷོ”ཞེས་པའི་ཡུལ་སྐོར་ལམ་ཐིག་སྤུས་ལེགས་ངོ་སྤྲོད་ནན་མོ་བྱས་པར་བརྟེན། ཡུལ་དངོས་སུ་ཡོད་པའི་ལྟད་མོ་བ་རྣམས་ཀྱིས་རྨ་ལྷོའི་ཡུལ་སྐོར་གྱི་མཛེས་སྡུག་ལ་སྣ་སྒོ་མོ་ནས་ངོས་འཛིན་ཡག་པོ་བྱུང་།

གན་རྒྱ་འཇོག་པའི་ལས་རིམ་དེ་མཉམ་ལས་ཀྱི་མགོ་རྩོམ་ས་གསར་པར་གྱུར། སི་ཁྲོན་ཞིང་ཆེན་ཡུལ་སྐོར་མཐུན་ཚོགས་དང་རྨ་ལྷོ་ཁུལ་རིག་རྩལ་ཡུལ་སྐོར་རྒྱང་སྒྲོག་བརྙན་འཕྲིན་ཅུའུ་དང་། མཚོ་སྔོན་ཞིང་ཆེན་ཁང་ཧོས་རྒྱལ་སྤྱིའི་ཡུལ་སྐོར་ལས་དོན་ཁང་དང་ཁྲིན་ཏུའུ་ཨའེ་ཞིན་རྒྱལ་སྤྱིའི་ཡུལ་སྐོར་ཞབས་ཞུ་ཚད་ཡོད་ཀུང་ཟི་གཉིས་ཀྱིས་སོ་སོར་མཉམ་ལས་གྲོས་མཐུན་བཞག་ནས། ཡུལ་སྐོར་བ་ཕན་ཚུན་སྐྱེལ་རྒྱུ་དང་རིག་གནས་ཡུལ་སྐོར་ཐོན་རྫས་གསར་སྤེལ་སོགས་ཁྱབ་ཁོངས་སུ་མཉམ་ལས་ཟབ་སྤེལ་ལ་དམ་པོར་དམིགས་ཡོད། དུས་མཚུངས་སུ། སི་ཁྲོན་དང་མཚོ་སྔོན་གྱི་རིག་གནས་ཡུལ་སྐོར་ཁེ་ལས་སྦྲེལ་མཐུད་ཚོགས་འདུ་འཚོགས་ཏེ། ས་གནས་གཉིས་ཀྱི་ཡུལ་སྐོར་ལས་དོན་ཁང་གི་འཐུས་མིའི་ཡིད་དབང་བཀུག་ནས། ས་ཁོངས་མཉམ་འགུལ་གྱི་ཐབས་ལམ་ཐད་ནས་མཉམ་དུ་གྲོས་མོལ་བྱས་ཏེ། “ཐོན་ཁུངས་མཉམ་སྤྱོད་དང་ལམ་ཐིག་སྦྲེལ་མཐུད། ཁྲོམ་ར་མཉམ་དུ་རྒྱ་བསྐྱེད་པ”བཅས་ཀྱི་མཉམ་ལས་བྱེད་སྟངས་ལག་བསྟར་ལ་སྐུལ་འདེད་བཏང་ཡོད།

བན་དེ་སྐྱབས་ཀྱིས་བསྒྱུར།