ཉེ་ལམ། མཚོ་བྱང་བོད་རིགས་རང་སྐྱོང་ཁུལ་མདའ་བཞི་རྫོང་གིས་སྐྱེ་ཁམས་དཔལ་ཡོན་འཛུགས་སྐྲུན་དང་སྐྱེ་ཁམས་ཁོར་ཡུག་སྲུང་སྐྱོབ་ཨུ་ཡོན་ལྷན་ཚོགས་ཀྱི་ཚོགས་འདུ་བསྡུས་པ་དང་། དེའི་དམིགས་ཡུལ་ནི་ཀྲུང་དབྱང་དང་ཞིང་ཆེན་ཏང་ཨུ། ཁུལ་ཨུ་བཅས་ཀྱི་སྐྱེ་ཁམས་དཔལ་ཡོན་འཛུགས་སྐྲུན་གྱི་ཇུས་ཆོད་བཀོད་སྒྲིག་ལག་བསྟར་དོན་འཁྱོལ་གཏིང་ཟབ་བྱས་ནས། ནུས་ཤུགས་ཡོད་རྒུས་སྐྱེ་ཁམས་ཁོར་ཡུག་ཁྱབ་ཁོངས་ཀྱི་འབུར་ཐོན་གནད་དོན་ཐག་གཅོད་བྱེད་རྒྱུ་དེ་རེད།
རྒྱུས་ལོན་བྱུང་བ་ལྟར་ན། 2024ལོར། མདའ་བཞི་རྫོང་གིས་རི་སྔོ་ཆུ་དྭངས་ནི་གསེར་རི་དངུལ་རི་ཡིན་པའི་འདུ་ཤེས་ཕྱོགས་ཡོངས་ནས་ལག་བསྟར་བྱས་པ་དང་། སྐྱེ་ཁམས་ཁོར་ཡུག་གི་སྤུས་ཚད་ལེགས་སྒྱུར་བྱེད་པ་དེ་སྲོག་ཤིང་དུ་བྱས་ནས། སྐྱེ་ཁམས་སྲུང་སྐྱོབ་དང་ལྗང་མདོག་འཕེལ་རྒྱས། ཁོར་ཡུག་བཅོས་སྐྱོང་སོགས་གཙོ་གནད་བྱ་བར་གཅིག་གྱུར་སྒོས་སྐུལ་འདེད་བཏང་བ་དང་། སྐྱེ་ཁམས་དཔལ་ཡོན་འཛུགས་སྐྲུན་ཐད་ཕན་འབྲས་མངོན་གསལ་བླངས། རྫོང་ཡོངས་ཀྱི་སྡེ་ཁག་སོ་སོས་མཚོ་སྔོན་པོའི་རྒྱལ་ཁབ་སྤྱི་གླིང་འཛུགས་སྐྲུན་གྱི་དམིགས་འབེན་ལ་གཞིགས་ནས། ལས་བགོས་གསལ་བོ་དང་མཐུན་སྦྱོར་གཞོགས་འདེགས་བྱས་པ་དང་། བརླན་ས་དང་རྩྭ་ཐང་། མཚོ་དང་མཚེའུ་སོགས་ཁུལ་ཁོངས་གཙོ་བོར་གཞིགས་ནས། ཆུ་ཁུངས་གསོག་སྐྱིལ་འཛུགས་སྐྲུན་སོགས་སྐྱེ་ཁམས་ལས་གཞི་མགྱོགས་མྱུར་ངང་ལག་བསྟར་བྱས། སྐྱེ་ཁམས་སླར་གསོའི་ལས་གཞི་རྗེས་འདེད་དཔྱད་འཇོག་རྐྱེན་སྲོལ་བཙུགས་པ་དང་། བཅོས་སྐྱོང་གི་ཕན་འབྲས་ཡུན་རིང་སྲ་བརྟན་ཡོང་བར་ཁག་ཐེག་བྱས་ནས། ཁུལ་ཁོངས་ཀྱི་སྐྱེ་ཁམས་མ་ལག་གི་སྤུས་ཚད་དང་གཏན་འཇགས་རང་བཞིན་རྒྱུན་མཐུད་སྒོས་མཐོར་འདེགས་བཏང་། ནགས་དཔོན་ལམ་ལུགས་དང་མཚེའུ་དཔོན་ལམ་ལུགས་དོན་འཁྱོལ་ནན་མོ་བྱས་པ་དང་། གཞི་རིམ་གྱི་སྐྱེ་ཁམས་ལྟ་སྲུང་པའི་དཔུང་སྡེ་འཛུགས་སྐྲུན་དང་དོ་དམ་བྱེད་པར་ཤུགས་བསྣན་ནས། རྒྱུགས་བཤེར་ལྟ་སྐུལ་ལམ་ལུགས་འཐུས་ཚང་དུ་བཏང་ཞིང་། ཕྱོགས་ཡོངས་དང་རིམ་པ་མང་བའི་སྐྱེ་ཁམས་སྲུང་སྐྱོབ་འགན་འཁྲིའི་མ་ལག་བཙུགས་ཏེ། ཙོང་ཆུའི་འགོ་ཁུངས་ཀྱི་སྐྱེ་ཁམས་ཐོན་ཁུངས་སྲུང་སྐྱོབ་ལེགས་པོ་བྱས། དེ་དང་མཉམ་དུ། ཀྲུང་དབྱང་གི་ཁོར་ཡུག་སྲུང་སྐྱོབ་ལྟ་ཞིབ་དང་ཞིང་ཆེན་ཏང་ཨུའི་སྐོར་ཞིབ་ཕྱིར་ལྡོག་གནད་དོན་ལ་དམིགས་ནས། གཅིག་ཤེས་ཀུན་གྲོལ་གྱི་གྲལ་བཤེར་བྱ་བ་ཕྱོགས་ཡོངས་ནས་སྤེལ། ཡུལ་ཚོ་དང་གྲོང་རྡལ་སོ་སོས་ཕྱོགས་བསྡུས་ཁྲིམས་བསྟར་སྡེ་ཁག་དང་མཉམ་འབྲེལ་བྱས་ཏེ། ཕྱུགས་འཚོ་བར་བཀག་འགོག་བྱེད་པའི་རྒྱུན་རྣམ་ཅན་གྱི་སྐོར་ཞིབ་བྱ་བ་སྤེལ་བ་དང་། རྩྭ་ཕྱུགས་དོ་མཉམ་ལམ་ལུགས་དངོས་འབེབས་ནན་མོ་བྱས་ནས། སྡེ་ཁག་བརྒལ་བའི་མཉམ་འགུལ་ཐག་གཅོད་རྐྱེན་སྲོལ་བཙུགས། ཁྱད་ལྡན་སྐྱེ་ཁམས་ཐོན་ཁུངས་ལ་རྐང་བཙུགས་པ་དང་། ཁུལ་ཁོངས་ཡོངས་ཀྱི་ཡུལ་སྐོར་དང་ལྗང་མདོག་ཐོན་ལས་འཕེལ་རྒྱས་ལ་ཟུང་འབྲེལ་བྱས་ཏེ། ཚན་རིག་དང་མཐུན་པའི་སྒོ་ནས་རང་བྱུང་སྲུང་སྐྱོབ་ཁུལ་གྱི་དམིགས་བསལ་ཆོག་མཐུས་ཚོང་གཉེར་ལས་གཞི་འཆར་འགོད་བྱས་པ་དང་། སྐྱེ་ཁམས་ཡུལ་སྐོར་དང་སྐྱེ་ཁམས་ཞིབ་སློབ་སོགས་སྤུས་ལེགས་ལམ་ཐིག་དང་ཟོང་རྟགས་བསྐྲུན། རོང་འབྲོག་མང་ཚོགས་རྣམས་སྐྱེ་ཁམས་ཡུལ་སྐོར་ཐོན་ལས་ཁྲོད་ཞུགས་པར་ཁྲིད་སྟོན་བྱས་ཤིང་། ཡོང་འབབ་འཕར་བའི་ཐབས་ལམ་རྒྱ་བསྐྱེད་པ་དང་། སྐྱེ་ཁམས་སྲུང་སྐྱོབ་དང་དཔལ་འབྱོར་འཕེལ་རྒྱས་ཀྱི་སྤུས་ལེགས་མཉམ་འགུལ་མངོན་འགྱུར་བྱས་ནས། སྐྱེ་ཁམས་ཀྱི་དགེ་མཚན་དེ་འཕེལ་རྒྱས་ཀྱི་དགེ་མཚན་དངོས་སུ་ཚུལ་སྒྱུར་བྱས།
ལྷ་མོ་འཚོས་བསྒྱུར།
