རྨ་ལྷོ་བོད་རིགས་རང་སྐྱོང་ཁུལ་ཐུན་རིན་གྲོང་ཁྱེར་གྱིས་སྨན་བཅོས་འཕྲོད་བསྟེན་ཁྱབ་ཁོངས་སུ་དངུལ་གཏོང་ཤུགས་མུ་མཐུད་དུ་ཆེ་རུ་བཏང་ནས། ཁྱིམ་ཚང་སྨན་པར་གན་རྒྱ་འཇོག་པའི་ཁ་ཆད་ལག་བསྟར་ཞབས་ཞུ་གཏིང་ཟབ་ཀྱིས་སྤེལ་བ་དང་།   མགྱོགས་མྱུར་སྒོས་སྨན་བཅོས་ཆ་འཕྲིན་ཅན་འཛུགས་སྐྲུན་ལ་སྐུལ་འདེད་གཏོང་བ།    སྨན་བཅོས་ཀྱི་འཕྲོད་བསྟེན་སྒྲིག་གཞི་བཅོས་སྒྱུར་གཏིང་ཟབ་ཏུ་གཏོང་བ་སོགས་ཀྱི་བྱེད་ཐབས་སྤྱད་དེ།   གཞི་རིམ་གྱི་སྨན་བཅོས་ཞབས་ཞུའི་ཆུ་ཚད་ཤུགས་ཆེན་པོས་མཐོ་རུ་བཏང་། ཟླ7པའི་ཚེས4ཉིན་བར། གྲོང་ཁྱེར་ཡོངས་སུ་ཁྱོན་སྡོམ་ཚོགས་པ་ང་ལྔ་བཙུགས་པ་དང་། གན་རྒྱ་བཞག་པའི་མི་གྲངས་ཁྲི་དགུ་དང་སྟོང་དྲུག་ལྔ་བརྒྱ་སུམ་ཅུ་ཡོད་ལ། གན་རྒྱ་འཇོག་ཚད་བརྒྱ་ཆའི་གོ་གཉིས་སུ་སླེབས་ཡོད་པ་དང་། གཙོ་གནད་མི་ཚོགས་ཀྱི་གན་རྒྱ་འཇོག་ཚད་བརྒྱ་ཆའི་གོ་གཅིག་ལ་སླེབས་ཡོད།

ཐུན་རིན་གྲོང་ཁྱེར་གྱིས་ཆེད་ལས་ཁྱིམ་ཚང་གི་སྨན་པའི་ཚོགས་པ་བཙུགས་ནས་གྲོང་ཁྱེར་ཡོངས་ཀྱི་མི་དམངས་ལ་ཁྱིམ་ཚང་གི་སྨན་པ་དང་གན་རྒྱ་འཇོག་པའི་ཞབས་ཞུ་འདོན་སྤྲོད་བྱས། གན་རྒྱ་བཞག་རྗེས། སྡོད་དམངས་ལ་བདེ་ཐང་ཡིག་ཚགས་འཛུགས་པ་དང་།    དུས་ལྟར་བདེ་ཐང་དཔྱད་འཇོག་དང་ལུས་གསོའི་མཛུབ་ཁྲིད་སོགས་ཞབས་ཞུ་མང་པོ་ཐོབ་ཐུབ།     སྨན་པས་སྡོད་དམངས་ཀྱི་བདེ་ཐང་གི་གནས་ཚུལ་གཞིར་བཟུང་ནས་ཆེད་དུ་བདེ་ཐང་དོ་དམ་འཆར་གཞི་བཟོས་པ་མ་ཟད། ཆུ་ཚོད24ཡི་བདེ་ཐང་བློ་འདྲིའི་ཞབས་ཞུ་འདོན་སྤྲོད་བྱེད་ཀྱིན་ཡོད།   འགུལ་སྐྱོད་སྟབས་མི་བདེ་བའི་རྒན་པ་དང་དལ་གཤིས་ནད་པར་སྨན་པ་ཁྱིམ་དུ་ཡོང་ནས་ཞབས་ཞུ་བྱེད་པའི་གན་རྒྱ་བཞག་པས། མང་ཚོགས་ཁྱིམ་ནས་ཕྱིར་འགྲོ་མི་དགོས་པར་སྨན་བཅོས་བདག་སྐྱོང་བྱེད་ཐུབ་ལ། བྱ་སྤྱོད་དེས་ནད་རིགས་འབྱུང་ཚད་ནུས་ལྡན་སྒོས་ཇེ་དམའ་རུ་བཏང་པར་མ་ཟད་སྡོད་དམངས་ཀྱི་སྤྱིའི་བདེ་ཐང་ཆུ་ཚད་མཐོར་འདེགས་སུ་བཏང་།

དེ་དང་ཆབས་ཅིག ཐུན་རིན་གྲོང་ཁྱེར་གྱིས་སྨན་བཅོས་ཆ་འཕྲིན་ཅན་དུ་འགྱུར་བར་སྐུལ་འདེད་བཏང་བ་དང་།    གློག་རྡུལ་བདེ་ཐང་ཡིག་ཚགས་ཁྱོན་ཡོངས་ནས་བཙུགས་པ།  གཞི་གྲངས་ནུས་མཐོའི་དོ་དམ་མཉམ་སྤྱོད་མངོན་འགྱུར་ བཅས་བྱས་ཏེ།  སྨན་བཅོས་གནད་ལ་འཁེལ་བ་དང་ཞབས་ཞུའི་ལས་ཕྱོད་མཐོ་རུ་བཏང་།  མིག་སྔའི་བར་དུ། གྲོང་ཁྱེར་ཡོངས་སུ་རིམ་རྩིས་བྱས་ན་མི་འབུམ་གཅིག་དང་སྟོང་གཉིས་བཞི་བརྒྱར་གློག་རྡུལ་བདེ་ཐང་ཡིག་ཚགས་བཙུགས་པ་དང་། ཚད་ལྡན་ཅན་གྱི་གློག་རྡུལ་བདེ་ཐང་ཡིག་ཚགས་ཀྱི་ཁེབས་ཚད85%སླེབས་ཡོད་པ་དང་། བདེ་ཐང་ཡིག་ཚགས་སྤྱོད་ཚད80%ལ་སླེབས་ཡོད།

ཐུན་རིན་གྲོང་ཁྱེར་གྱིས་མུ་མཐུད་དུ་སྨན་བཅོས་འཕྲོད་བསྟེན་སྒྲིག་གཞི་བཅོས་སྒྱུར་བྱས་ཏེ། སྨན་བཅོས་འཕྲོད་བསྟེན་གྱི་དངུལ་གཏོང་ནུས་ཤུགས་ཆེ་རུ་བཏང་། ལས་གཞི་སྣ་ཚོགས་ཧུར་ཐག་གིས་བརྩོན་ལེན་བྱས་ཏེ། ཐུན་རིན་གྲོང་ཁྱེར་ཀྲུང་ལུགས་སྨན་ཁང་གི་ཁོངས་གཏོགས་སྒྲིག་ཆས་འཛུགས་སྐྲུན་འཐུས་ཚང་དུ་བཏང་བ་དང་། བློན་ཆོས་ཡུལ་ཚོའི་འཕྲོད་བསྟེན་ཁང་གི་སྒོ་བསྟེན་ཕྱོགས་བསྡུས་ཐོག་ཁང་འཛུགས་སྐྲུན་ལ་སྐུལ་འདེད་བཏང་སྟེ། ཚང་མ་མགར་རྩེ་འཕྲོད་བསྟེན་ཁང་དང་སྨད་པ་འཕྲོད་བསྟེན་ཁང་དུ་གནས་སྤོར་བྱས་པ་དང་། མདོ་བ་གྲོང་རྡལ་གྱི་འཕྲོད་བསྟེན་ཁང་དང་མགར་རྩེ་འཕྲོད་བསྟེན་ཁང་གི་བོད་སྨན་སྒོ་བསྟེན་ཁང་གསར་དུ་བཙུགས་པས། སྨན་བཅོས་འཕྲོད་བསྟེན་ཞབས་ཞུའི་ཆུ་ཚད་མུ་མཐུད་དུ་མཐོ་རུ་ཕྱིན་ཡོད།

བྱེད་ཐབས་རབ་དང་རིམ་པ་བཏོན་པ་བརྒྱུད། ཐུན་རིན་གྲོང་ཁྱེར་གྱི་གཞི་རིམ་གྱི་སྨན་བཅོས་ཞབས་ཞུའི་ཆུ་ཚད་མངོན་གསལ་གྱིས་མཐོ་རུ་ཕྱིན་པ་དང་། དམངས་ཚིས་བདེ་སྐྱིད་དངོས་གནས་ཇེ་ལེགས་སུ་སོང་ཡོད་པས། མང་ཚོགས་ཀྱི་སྨན་བཅོས་འགན་སྲུང་ཐད་ཀྱི་ཐོབ་སྣང་དང་སྐྱིད་སྣང་སྔར་ལས་ཆེ་རུ་ཕྱིན་ཡོད། 

ཤ་བོ་རིན་མཚོས་བསྒྱུར།